Read Q'anjob'al Ap 8 Bible Online

Ap 8 - Q'anjob'al bible

Ap 8

¹A yet max nic'on el Cham chi yik Calnel tu' jun yet is suk sello, nan mi hora tz'ininixac'al max yun bay satcan.

²Axa max wiloni, lecan ec' ukwan ángel satak Dios. Max ak'lay is trompeta junjun eb.

³Lajwic'al tu', max jay junxa ángel, yetbi oc jun oro txayib bay chi tz'a sumumi jab. Max jayoc lecan yetok satak jun altar naba oro. Caw miman suk'uk'i jab max ak'lay bay, yet chi yak' tz'a yiban jun altar tu'. A tu' ayic' satak jun trono. A yet max toj woyoyok mubal jun suk'uk'i jab tu', max toj c'apax txaj eb yuninalxa Dios yetok.

⁴A yul k'ab jun ángel tu' max aj woyoyok mubal suk'uk'i jab tu' yetok txaj eb yet-xa Dios tu', satak Cham.

⁵Lajwi tu' max yak'on noj jun ángel tu' is txayib yetok tzak'ak' max yi aytek yiban jun altar tu'. Lajwi tu', cax max k'okon aytok sat tx'otx'. Max lajwi tu xin, max c'oli nilili bil c'u, c'al juntzanxa tzet chi nilili. Chi aj jopnaj rayo, cax chi ec' jun quixcab.

⁶Axa watx'nen ba eb ukwan ángel tu', yuj xuon eb is trompeta.

⁷Max xu' jun babel ángel is trompeta, cax ayman max jay sakbat, yetok k'ak'ej, calan yetok chic'. Max ayc'ay juntzan tu' sat tx'otx'. Yuj tu', txenxanej man nanok tx'otx' tx'otx' max tz'a'i. Yetok c'apax te te' masanil, jabxanej man nanok te' max tz'a'i. Axa an ac'un xin, pilan max tz'a an masanil.

⁸A yet max xuon jun yet is cab ángel is trompeta, ay jun tzet yetal axca junok miman witz ayoc k'ak'al, max k'oklay aytok yul a' mar. Yuj tu', txenxanej man nanok a' mar tu' max chic'bitok.

⁹Xan a no no' yulak a' mar tu', txenxanej man nanok no' max cami. Yetok c'apax juntzan barco, txenxanej man nanok max lajwi elok.

¹⁰A yet max xuon jun yet is yox ángel is trompeta, max titc'ay jun miman waycan bay satcan, chi yik Ixaj. Caw chi jopxi k'ak' yin tz'a'i, axca tz'a taj. Txenxanej man nanok a' mimek aej chi beyi, yetokc'al a' nuk'lak aej bay max ayc'ayi. A a' aej bay max ayc'ay tu', lajan max yuncan el a' axca yal ixaj. Xiwil anima max cam yuj a' aej tu', yujtol caw c'a' max yuncantok a'.

¹²A yet max xuon jun yet is can ángel is trompeta, txenxanej man nanok c'u max etax elok, c'al xajaw, yetok waycan, txenxanej man nanok max k'ekbi elok. Yuj tu', junjun c'u yetok junjun ak'bal, txenxanej man nanok max te k'ekbi elok.

¹³Max lajwi tu', max wiloni, ay jun ángel chi jeneni ec' nan satcan. Axa max wabeni, caw yip yaj yaw axca ti': ¡Ay, ay, ay, ok'bal wal c'ul eb anima bay yulyibank'inal, yuj oxebto mimek yailal ok ujok yet ok xuon oxwanxa eb ángel is trompeta! ẍi.