Read Q'anjob'al Ap 9 Bible Online

Ap 9 - Q'anjob'al bible

Ap 9

¹Max lajwi tu', axa xuon jun yet is so' ángel is trompeta. Axa max wiloni, ayxa ec' jun waycan titnakcan satcan yiban tx'otx'. Max ak'lay laweal jun xab olan bay jun waycan tu',

²cax ayman max jak jun xab olan tu'. Max c'oli yajol wacacok mub yul jun olan tu', axca yaj wacacok mubal junok miman horno. Max k'ekk'olil c'u yuj jun mub tu'.

³Xiwil juntzan no no' axca no tzac' max eltek xol mub tu'. Max saklem no' bay yulyibank'inal. Max ak'lay yikbej juntzan no' tu' chiwaji, axca chiwaj no alacrán.

⁴Max al-lay bay no' tol manchak yetnejtok no' an ac'un, yetok tzetak yetal yaxculinak ch'ibi, c'al te te'. Asan eb anima c'amoc sello Dios yin is nan sat, asan eb chi je' chilay yuj no'.

⁵Maj beklay yak' cam no' junok anima, palta max beklay yaoc no' yailal eb yin oyeb xajaw. A wal yail bay chi chi' no' tu', caw lajan axca bay chi chi' no alacrán.

⁶A yet jun tiempoal tu', ok sayic' anima tzet chi yun cami, palta man ok ilchaj yuj eb. Caxc'al caw ok yochej eb ok camok, palta man ok je' cam eb.

⁷A juntzan no' axca no tzac' tu', watx'xa yayji no' axca no chej watx'xa yayji toj yin owal. Ayaj jun tzet yetal axca oro corona yin is jolom no'. Lajan yili sat no' axca sat anima.

⁸Axa xil no', lajan axca xil ix. Axa ye no', lajan axca ye no coj.

⁹Ay jun tzet yetal ayoc yin is mimanil no' axca ch'en ch'en pichilej chi yaoc eb soldado. Lajan wal nilili bil xic' no' axca nilili bil carruaje tokbil yuj xiwilok chej chi yak' yanej toj yin owal.

¹⁰Ay quisbal no' yin txam ne, axca no alacrán. A quisbal no' tu' chi etnen anima yin oyeb xajaw.

¹¹A yul jun xab olan, a tu' max ajol jun ángel ayoc yajawilok no no' tu'. A is yajawil no tu', chi yik Abadón yin hebreo, axa yin griego xin, chi yik Apolión. Chi yal elapnok, C'aywajwom.

¹²Axca ton ti' max yun yec' jun babel yailal. Palta ayto wal cabxa tolto ok jayok.

¹³A yet max xuon jun yet is wak ángel is trompeta, max wab yoc jun aw nan xol caneb is txiquin jun altar oro ayic' satak Dios.

¹⁴A yin jun aw tu', max al-lay axca ti' bay jun yet is wak ángel tu': —Xuyil eb canwan ángel pixan bay ti a' miman Éufrates, ẍi bay.

¹⁵Axa toj xuyon el eb canwan ángel tu', yet chi toj eb mak'oj cam anima. Txenxa maj nanjok cam anima yuj eb bay sat tx'otx'. Txequelxa is yorail, is c'ual, is xajawil c'al is yabilal yet chi oc eb yin mak'oj cam anima.

¹⁶Max waben bisil eb soldado ayaj yiban chej chi colwaj yetok eb ángel tu', tol cab ciento millón eb.

¹⁷A no chej max ak'i wil tu' yetok eb ayaj yiban chej tu', ayoc ch'en makil txamc'ulej yin junjun eb, cak, yax, c'al k'an yili ch'en. Lajan jolom chej eb tu' axca jolom no coj, chi eltek k'ak' yetok mub c'al azufre yul ti' chej eb tu'.

¹⁸Txenxa man nanok anima max cam bay yulyibank'inal ti' yuj oxeb tzet chi eltek yul ti' chej eb tu', a ton k'ak' k'ak' tu', mub tu', yetok azufre tu'.

¹⁹A juntzan no' tu', a yin is ti' ayoc is yikbej, yetok yin ne. A ne tu', ay jolom axca labaj. Caw chi yetnej no' eb anima yetok ne tu'.

²⁰Axa eb anima maj cam yuj juntzan yailal tu', c'am wal jabok max na ba c'ul eb yin is yobtakil chi el yuneni. Maj bek eb yalon ba bay eb espíritu yob. Tamwal max bek c'apax eb yalon ba bay tzet chi al-lay oc diosal, juntzan chi watx'nej eb yetok oro, yetok plata, c'al yetok bronce, ch'en dios c'al te dios, c'am chi ilwi, tamwal yabeni, tamwal chi je' beyi.

²¹A xol eb anima tu', ay eb mak'om cam anima, ay eb ajtxum. Ay eb mulwom, ay c'apax eb elk'om, palta c'am wal jabok max na ba eb yin is yobtakil tu'.