Read Q'anjob'al Rt 1 Bible Online

Rt 1 - Q'anjob'al bible

Rt 1

¹A yet jun tiempoal ayoc eb juez yajawilalok conob Israel, max ayc'ay jun miman wajil bay xol conob tu'. A yet tu' ay jun winak aj conob Belén yul yet Judá max toj ec'jab yetok yistzil, yetokc'al cawan is c'ajol bay yul yet Moab.

²A jun winak tu' chi yik Elimelec, axa xal yetbi chi yik Noemí. A jun c'ajolej chi yik Mahlón, axa junxa xin, chi yik Quelión. A bay Moab tu' max cajay ec' eb.

³Axa max yun xin, max cam Elimelec, yichamil xal Noemí tu', max cancan xal yetok cawan yune' tu'.

⁴Yinxa tzunanil max oc yetbi eb nak cawanil; moabitac'al eb ix max yi eb. A jun ix, chi yik Orfa, axa junxa ix, chi yik Rut. Lajonebxa abil yayji ec' eb bay tu'.

⁵Cax max cam Mahlón c'al Quelión, xan max can xal Noemí yin c'amxa yune', c'al yin c'am yichamil.

⁶A yet tu' max yaben xal Noemí tol mayal ok' c'ul Jehová yin conob Israel, tol a bay tu' c'amxa wajil.

⁷Yuj tu' xan max meltzoj xal bay Judá, ajun eb ix cawan yalib xal tu' yetok.

⁸Axa yet max tit eb yulak be xin, max yalon xal bay eb ix yalib tu' axca ti': —A tinani' meltzojanek bay yatut e mam c'al e txutx. A Jehová ok occ'al e yetok. Ilab tol watx'c'al ch'an max e yut e ba ayin, c'al bay eb nak wune'.

⁹A Jehová ok oc e yetok, tzetbil ok yun e mojay junelxa, cax watx'c'al ok yun e yayji ec' bay e yatut, ẍi xal. Axa tz'uboncan el xal Noemí is ti' eb ix yalib tu', axa yok'aj eb ix cawanil tu'.

¹⁰Max yalon eb ix axca ti': —C'am chon cani, ok on tok etok bay a conob tu', ẍi eb ix.

¹¹Max oc tean xal Noemí yin eb ix: —Ex walib, paxanek bay e yatut. ¿Tzetto walc'al e yoc tzakan wintak? Tokwal okto jay wune' cax ok je' e yioni.*fn*

¹²Yuj tu' xan asek, paxanek bay e yatut. Axca ayin ti', caw wal ixnam inxa, tokwal okto oc wetbi. Caxc'al chi wal tinani' tol a yet jun ak'bal ti' chin mojayi, cax oktoc'al jay wune', ta quin chi,

¹³¿palta tom oktoc'al e yechbanej ch'ib eb nak, cax ok ex mojay yetok eb? ¿Tom yujc'al e yechbaneni, cax manxa ok ex mojayok? C'amakc'al ex walib, maj je' axca tu'. Axa in xin, wetc'alta' yayji yatakil max yatek Jehová wiban. Yelxac'al mi ok'bal in c'ul e yuj ta ok wila' tol ok e yab yail, ẍi xal Noemí bay eb ix.

¹⁴Cax max c'oli yok' eb ix junelxa. Axa yet tu' max tak'elaycan xal yuj ix Orfa, max tz'ublaycan el ti' xal yuj, cax max toji. Axa pax ix Rut xin, max canc'al yetok xal.

¹⁵Max yalon xal Noemí axca ti': —Chim ela' tol a ix a mu' mayal meltzoj bay is conob c'al bay is diosal. Asi' c'apax ach ti', ẍi xal Noemí.

¹⁶Max tak'wi ix Rut axca ti': —Manchak ach oc tean win yet chin toji cax chach in bekoncanok. Tzanc'al bay ok ach tok, ok in tokc'al etok. A bay ok ach ayjok ec'ok, a tu' ayin c'apax ec'ok. A a conob, a ok oc in conobok, a a Dios, a ok oc c'apax in Diosalok.

¹⁷A bay ok ach camok, a tu' ok in cam c'apaxok, a tu' ok in mukayok. Yak'okab Jehová in yailal ta chach in bekcanok masantac'al a camich ok on pojon ayok, ẍi ix.

¹⁸A yet max yilon xal Noemí tol pitz'an oc c'ul ix Rut toj yetok xal, c'amxa tzet max yala'.

¹⁹Cax max tit eb cawanil xin, masantac'al max jayoc eb bay Belén. A yet max jayoc eb bay Belén tu', a masanil eb anima ay bay tu', toxac'al max c'ayaj c'ul eb, max yalonc'al eb ix ay bay tu' axca ti': —¿Manminak xal Noemí ti'? ẍi eb.

²⁰Xan max tak'wic'al xal bay eb ix axca ti': —C'amxa che yal Noemí*fn* ayin, palta Mara*fn* che yak' wika, yujtol a Cham Chic'al Je' Yuj Masanil, max ak'on yatakil wiban.

²¹A yet max in toj cayti' ay yaxilal yul in k'ab, axa yet chin meltzoj ti', c'amxa jabok tzet ayin. Ta axca tu' chi el yin c'ul Jehová caytu' chi wunej, ¿tzetto wal yuj ok e yak'c'al wik Noemí? Yujtol mayal low win yuj Cham Chic'al Je' Yuj Masanil, ẍi xal.

²²Axca ton tu' max yun jayoc xal Noemí yetok ix Rut bay Belén, petoj eb bay yul yet Moab. Elnak wal jolay ixim cebada yet max jay eb tu'.