Read Q'anjob'al Rt 3 Bible Online

Rt 3 - Q'anjob'al bible

Rt 3

¹A yet jun c'ual max yalon xal Noemí bay ix Rut axca ti': —Ach wune', tekan wal ok in say junok echamil yet watx' chak' tzalojbok a c'ul yetok.

²A cham Booz, cham ay is chekbej eb ix junej max ach mulnaj yetok tu', ayto yuj ba jetok. A yet jun ak'bal ti' ok tok cham xuoj el cebada.

³Yuj tu' xan ok ekej masanil tzet yetal ok wal ayach ti': Achinwan, chaon oc perfume en, a a tec'an pichil chaocok, cax chach toj bay ayic' cham tu', palta ato yet chi lajwi lowi, catatu' cha tx'oxon aj a ba bay.

⁴Toc'al chela' bay ok ay telanok, catatu' ok ach ay telan bay yakantak, cax chaon aj ti' is txow bay yakantak tu' eban. Axa ok alonok tzet wal ok onej, ẍi xal Noemí.

⁵Max tak'wi ix Rut axca ti': —Ok wikej masanil tzet max al ti', ẍi ix.

⁶Cax max toj ix Rut bay chi mulnaj cham Booz, max yiken axca max yun yalon xal is yalib tu' bay.

⁷A cham Booz tu' max lowi c'al yuq'uena', cax yelxac'al chi tzaloji. Lajwi tu' max ay telan way bay cawilal bay bulan ay ixim bak' cebada tu'. Axa yet max ajc'al ak'bal xin, yinxac'al c'ojanc'ulalil max yun yapni oc ix Rut, max yion aj ix is txow cham bay yakantak, cax max ay telan ix way bay tu'.

⁸Axa yet chuman ak'bal max meltzonen ba cham Booz yet chi wayi, cax max yabentek tol ay jun ix ix telan ay bay is yakantak.

⁹—¿Mac ach txel? ẍi cham. —Ayin Rut in, a chekbej in. Ach ti', a moj chach colwaj ayin, yujtol ayto wuj in ba etok, xan chi wochej tol chach mojay wetok, ẍi ix.

¹⁰—Yak'okab Jehová is watx'c'ulal ayach. A tinani' max nachaj el wuj tzetbil tol max tit yul a c'ul a sayon ec' is binajbilal camom echamil. K'inalok ta man axcaok tu', chi je' a mojay yetok junok nak tol ach'ejto, caxc'al meba' ma beyom, asan ta chi yal a c'ul, palta maj ot axca tu'.

¹¹Manchak ach oc il txo ix, yujtol a bay yul in conobal ti', ojtakbilxa tol watx' a binaji, xan ok wikej masanil tzet chal ti' tinani'.

¹²Manak tu', yel toni ayto wuj in ba etok; palta ayto wal junxa cham yelxac'al ayto oj a ba yetok.

¹³Canan yet jun ak'bal ti' cayti'. A yet yecal ok wala', ta ok je' c'ul cham tu' mojay etok axca is leyal, watx' xin. Ta man ok je' c'ul xin, chi wak' in ti' satak Jehová ach wioni. Wayan tinani'. Ato yet ok sakbok cax chach toji, ẍi cham.

¹⁴Xan ac'al tu' max way ix Rut bay yakantak cham Booz yet jun ak'bal tu'. Ayto sakbi max aj wan ix, yujtol max yal cham tol c'amokab mac chi iloni tol max betic' ix bay chi mulnaj tu'.

¹⁵Max yalon cham bay ix axca ti': —Iel a k'util tu' en, cax cha pixon is txam an, ẍi bay ix. A yet mitx'bil is txam an is k'util ix tu' yuj, cax max secon aytok cham ixim cebada yul, aymi cabok arroba ixim cebada tu' max yaytok. Cax max lacon ajtok cham tu' jolom is xic' ix, max toj ix bay conob tu' yetok.

¹⁶A yet max apni ix bay ayic' xal is yalib tu', max k'anlen xal: —¿Tzet ẍi xin wune'? ẍi xal. Cax max yalon ix Rut tzet max yal cham Booz tu' bay.

¹⁷Max yalonc'al ix axca ti': —A masanil ixim cebada ti' max yak' ayin. Max yalon c'apax ayin, tol c'am chin jay ayach yin tol c'am jabok tzet ibil oc wuj, ẍi ix.

¹⁸Max yalon xal Noemí: —A tinani' xin, ach wune', echbanej tzet ok yun yelocok. Ti wal c'amc'al xewilal chi yun cham Booz tu', masantac'al ok yi ba jun ti' tinani', ẍi xal bay ix.