Read Q'anjob'al Rt 4 Bible Online

Rt 4 - Q'anjob'al bible

Rt 4

¹Axa yet max k'inibi, max bet ay chotan cham Booz bay ti' puertail conob bay chi wajbaj c'al ba anima. Junixto wal bek tu', cax max ec'tok cham ayto yuj ba yetok camom Elimelec, a ton jun max yal cham Booz tu' bay ix Rut. —Sebach cayti', tol ok on k'anjab janic'ok, ẍi cham Booz tu' bay. Max yikej cham tu' yay chotanok.

²Max lajwi tu' cax max yawtentek cham Booz tu' lajonwan eb yicham winakil conob, max yalon cham bay eb tol chi ay chotan eb junok bek yetok eb. Max ay chotan eb xin.

³Max yalon cham Booz tu' bay cham ayto yuj ba yetok eb tu' axca ti': —A xal Noemí max meltzojtek bay Moab, xan tol ok txonil xal is tx'otx' cham camom jican Elimelec.

⁴Yuj tu' xan chi wal ayach ta cha manil tx'otx'. Ta che' tx'otx', satak wal eb testigo ti' c'al eb cham yicham winakil conob ti', cax chaloncanok tol che' tx'otx'. Yujtol caw wal ecanto a ba yetok Elimelec tu', xan ach a moj wal checan tx'otx'. Palta ta c'am cha mancan el tx'otx' xin, al ayin, yujtol ayin ti' yet-xa is ca makan icanejalxa wayji, xan ay c'apax walon wet in manoncan el tx'otx', ta c'am cha man tx'otx' ach ti', ẍi cham Booz. Max tak'wi cham ayto yuj ba yetok camom Elimelec tu' axca ti': —Ok in man tx'otx', ẍi.

⁵Catatu' max yalon wal cham Booz tzetbil wal yayji ocok: —A tinani' xin, ta cha mancan el tx'otx' bay xal Noemí tu', yowalil chach mojay yetok ix Rut aj Moab, is yistzilben nak camom Mahlón, yet watx' ok binajc'al camnak yichamil ix tu' yin tx'otx', ẍi cham Booz.

⁶A yet max yaben cham tu' tol axca tu' yayji, max yaloni: —Ta axca tu' yayji, c'am chi je' in manon tx'otx'. Etax talaj el in satak yuj. Xan ta chochej cha mancan el tx'otx' ach ti', chi je' a manoni, chi wak' in derecho ti' ayach, ẍi.

⁷(A yet tu' a is beybal eb israel ta ay junok mac chi yak' is satak is sataknej junok mac ayto yuj ba yetok, yin junok tzet yetal yet chi mana' ma yet chi txono', a yet chi watx'ji ay junok k'anej tu', a is beybal eb tol chi yiel eb junok is xanab ay ocok, cax chi yak'on bay nak chi ak'laycan is satak tu'. Caytu' is beybal eb.)

⁸Yuj tu' xan a yet max yak'oncan cham tu' is satak bay cham Booz, max yiel is xanab, max yaontok bay cham Booz tu' cax max yaloni: —Ayin chi wala', mancan el tx'otx' tx'otx' tu', ẍi.

⁹Max lajwi tu xin, max yalon cham Booz bay eb yicham winakil conob, c'al eb max aben watx'ji ay jun k'anej tu': —E masanil ayex ti', testigo che yuncanok, ti' wal ok in mancan el tx'otx' tx'otx' bay xal Noemí, tx'otx' yet camom Elimelec, camom Quelión, c'al camom Mahlón.

¹⁰Ac'ala' testigo c'apax che yuncanok tol chi wican ix Rut aj Moab wistzilok, tol camnakxa yichamil, a ton Mahlón. Asan yuj beyc'altok binaj Mahlón tu' yin is tx'otx' xan ok in mancan el bay xal Noemí ti', yet watx' man ok c'aycan el binaj Mahlón tu' xol eb is yican, c'al bay yul is conobal, xan testigo che yuncan yin jun k'anej ti' tinani', ẍi cham Booz tu'.

¹¹Cax max tak'wi eb yicham winakil conob c'al masanil eb t'anan oc yet tu' axca ti': —Ja toni, ti' wal testigo chi juncanok. Yak'okab Jehová is watx'c'ulalil yiban ix ix tu', cax chi ocantok ix yul atut. Lajanokab ok yun yeloc ix axca Raquel, c'al Lea bay titnak jinatil. Ac'ala' c'apax ach ti', mimanokab a binaj yul yet tx'otx' Efrata, c'al bay conob Belén ti'.

¹²Xiwilokab oninal ok yak' Jehová yetok jun ix ix tu', cax ch'ibokabc'al aj enatil yetok ix, axca max yun ch'ibaj yinatil Fares is c'ajol Judá max yil yetok ix Tamar, ẍi eb.

¹³Axca tu' max yun yion cham Booz ix Rut. Max lajwi tu xin, cax max way yetok ix, axa Jehová max yak' yaxilal bay ix, max oc ix yobixal, cax max jay jun is winak unin ix.

¹⁴Max yalon eb ix ix cajan bay tu' bay xal Noemí axca ti': —Al-layokab watx' k'anej bay Jehová, yujtol mayal yak' jun e a txiquin elomalok. Ayokab is may ok yun nak e a txiquin ti' xol conob Israel.

¹⁵Aokab nak ok oc yipok a c'ul, c'al ach yilon yet ok ach ocxac'al ixnamil, yujtol yune' ix alib ti' nak. A ix ti' caw wal ay is camc'ulal ix en; ec'ban ix yintak axca tol ay ukwanok one' max ela', ẍi eb ix.

¹⁶Max lajwi tu', max chelon aj xal Noemí nak unin tu', cax axac'al xal max ilon ch'ib nak.

¹⁷A yet max yilon eb ix cajan bay cawilal xal tu' max yalon eb axca ti': —Axca tol max alji jun yune' xal Noemí, ẍi eb ix. Cax max yak'on eb ix yik Obed. A ton is mam Isaí, is mam icham cham rey David.

¹⁸A ton eb yichmam cham rey David yin txolilal ti', chi chail yich yin Fares: Fares,

¹⁹Hezrón, Ram,

²⁰Aminadab, Naasón, Salmón.

²¹A Salmón tu' is mam Booz, a Booz tu' is mam Obed,

²²a Obed tu' is mam Isaí, axa Isaí tu' is mam David.