Read Q'anjob'al 1 S 13 Bible Online

1 S 13 - Q'anjob'al bible

1 S 13

¹Caw wal tec'an winak wal Saúl yet max oc yin reyal xol eb israel. Cab abil max oc yin reyal tu'.*fn*

²Max sic'on el cham 3,000 eb soldado xol eb israel. 2,000 max can yetok bay Micmas c'al bay tzalanlak cawilal Betel, axa junxa mil eb xin, max cancan yetok Jonatán is c'ajol bay Gabaa yul yet Benjamín; axa jantakto anima xin, max cheklay pax eb yuj cham Saúl bay yatut.

³Max yak' lajwok Jonatán jun destacamento eb filisteo bay Gabaa, cax max yaben eb filisteo jun tu'. Yuj tu' ayman max chek Saúl tol chi xulay trompeta yul makbej israel yet chi wajban oc ba eb winak.

⁴Masanil eb israel max abeni, tol mayal yak' lajwok Saúl jun destacamento eb filisteo, cax max tit yowal eb filisteo yin conob Israel. Yuj tu', yin aymanil max wajbaj oc ba eb soldado yetok Saúl bay Gilgal.

⁵Ac'ala' eb filisteo, max wajbaj c'apax oc ba eb yuj yak'on owal yetok eb israel; 30,000 carruaje yet owal yuj eb, 6,000 soldado ayaj yiban chej, cax xiwilto mactxel tol chi beyi, c'amxa chi bischaj eb. Ayman max toj eb bay Micmas, max watx'nen eb is campamento bay yichcanil Bet-avén.

⁶Max oc bilc'ulal yuj eb israel, yujtol lanan yayc'ay eb yuj eb filisteo. Yuj tu' max toj eb c'ubaj el ba bay yulak nach'en, c'al bay latan telak, xolak mimek ch'en, yulak c'ob yet aej, c'al yulak jobe.

⁷Ay pax mac max k'axpoj ec' bay a' Jordán, max toj eb bay yul yet Gad, c'al bay Galaad. Axa Saúl xin, max tojcan bay Gilgal; a jantakto is soldado tzunan yintak, toxac'al chi baybon eb yuj xiwilal.

⁸Max echbanelay cham Samuel yuj Saúl bay Gilgal yin ukeb c'ual, yujtol max yala' tol ok apnok bay tu'. Palta c'amc'al chi apni oc cham Samuel bay Gilgal tu', xan lananxa beklaycan cham Saúl yuj eb soldado.

⁹Yuj tu' xan max yala': —Iektek no xajanbal tol ok ak'lay tz'aok, c'al xajanbal yet junc'ulalil yetok Jehová, ẍi Saúl. A wal caw max ak'on tz'a xajanbal tu'.

¹⁰Axa wal lajwi yak'on tz'a Saúl juntzan xajanbal tu', cax max apni oc cham Samuel. A yet max yaben Saúl tol chi apni, max eltok chaoni, c'al yak'on cawil c'ul.

¹¹Max yalon cham Samuel: —¿Tzet yuj xan ach caw max ak' tz'a juntzan xajanbal tu'? ẍi cham. —Yujtol max wila' tol lananxac'al yel eb anima in c'atan, cax c'amc'al chach jay pax axca aloni, toxac'al bulan pax ec' eb filisteo bay Micmas,

¹²xan max in na', talaj chi jay eb yak'on owal win bay Gilgal ti', cax c'amtoc'al chi wabenej in ba yul k'ab Jehová; yuj wal tu' xan max waoc wet wak'on xajanbal tu', ẍi Saúl.

¹³Max tak'wi cham Samuel: —Yin a yaxc'ayinakil max onen jun ti'. Mata tol max ekej tzet max yal Jehová ayach, max mi yal Cham tol chach can yin reyal xol eb israel yin junelnej.

¹⁴Akxa tinani' xin, manxa najatilok ok mayjok ekbej; ok say Jehová junok mac tol ok cha' c'ul tzet chi yunej, a' ok oc yajawilalok is conob, yujtol max a tenic' ach ti' tzet max yal Cham.

¹⁵Max lajwi tu', cax max el cham Samuel bay Gilgal, axa pax tu'. A jantakto eb anima tzunan yintak Saúl, max toj eb yetok yin owal; max el eb bay Gilgal tu', max tojcan eb bay Gabaa yul yet Benjamín. A bay tu' max bis Saúl jantakto eb soldado tzunan yintak; 600 to chi yil ba eb.

¹⁶A yintak Saúl tu' tzunan oc Jonatán is c'ajol, c'al eb soldado, a tu' max can eb bay Gabaa, axapax eb filisteo xin, a tu' ay is campamento eb bay Micmas.

¹⁷Oxmakan max yut ba eb filisteo tu', max toj eb yion eltek tzetak yetal eb israel; jun makan max tojcan bay yetc'ulal Ofra yul yet Sual.

¹⁸Axa junxa makan max toj bay Bet-horón, axa junxa yet is yox makan xin, max tojcan bay k'ean yiban jobeal Zeboim bay chi chaxac'altok tz'inan tx'otx'.

¹⁹Masanil yul is makbej nación israel, c'am wal junok watx'nem ch'en. C'am chi chalay c'apax watx'nej eb yuj eb filisteo, yujtol c'am chi yochej eb chi watx'nej eb israel tu' espada c'al lanza.

²⁰A yet chi el ye is ch'en eb israel, a tu' chi bet eb nik ye is ch'en tu' bay eb filisteo, mawal axca ch'en arado, ch'en asarón, ch'en echej, c'al ch'en piocha.

²¹Cab bijan plata chi k'an eb filisteo tu' yuj niklay ajtek ye ch'en arado, c'al ch'en asarón; jun bijan chi k'an eb yet chi ajtek ye junok ch'en echej, c'al junok ch'en chucbal wacax.

²²Yuj tu xin, tamwal junok eb tzunan yintak Saúl, c'al yintak Jonatán ibil oc yespada, ma lanza yet max oc owal; asan Saúl yetok Jonatán ibil oc yet.

²³Axa jun destacamentoal eb filisteo max oc makon bay lot'an beal Micmas.