Read Q'anjob'al 1 S 24 Bible Online

1 S 24 - Q'anjob'al bible

1 S 24

¹A yet max meltzoj Saúl yin yak'on owal yin eb filisteo, cax max al-lay bay tol ata tu' ay David bay tz'inan tx'otx' bay En-gadi.

²Yuj tu xin, max siq'uil Saúl 3,000 eb soldado caw wal tol jelan xol masanil eb israel, max toj saylay David yetok eb ajun yetok yuj Saúl tu' bay satlak ch'en bay ay no xolakteal chiwo.

³A yet max apni oc Saúl yetok eb soldado bay juntzan corral no calnel bay ti' be, max octok cham txuljok yul jun nach'en ay cawilal tu'. Man yojtakok, ta a tu' ay David yetok eb soldado ajun yetok.

⁴Yuj tu' max yal eb ajun yetok tu': —A tinani' chi yun tzet max yal Jehová tol chi yaoc ajc'ul yul a k'ab, ach cha na' tzet chotej, ẍi eb bay. Axa tit nojnon David yin c'ojanc'ulal, max c'upon el ti' is jokan pichil Saúl.

⁵Max lajwi yuten axca tu' max cus pax aj is c'ul,

⁶max yalon bay eb ajun yetok tu': —Aokab Jehová maj chaon in mak' cam cham rey ti', yujtol a Jehová anej oc yin reyal, ẍi David.

⁷Caytu' max yun tenchanen David eb ajun yetok tu'. Maj yala' tol ay tzet max utlay Saúl yuj eb; toc'al max yiloc eb max eltek bay yul nach'en tu', cax max tojc'al.

⁸Lajwi tu', max eltok David yintak, max awjitok bay: —Mamin rey, ẍitok bay. A yet max meltzojtok t'annaj Saúl tu' yintak, max ay nojnaj David, max yaloni:

⁹—Mamin, ¿tzet yuj xan tol chekejtok bay eb anima chi aloni tol yob tzet chin say en?

¹⁰Na elok tol a Jehová max ach yaoc yul in k'ab bay yul ch'en nach'en. A masanil eb nak ajun wetok max yal eb tol a bay tu' chach in mak' camok, palta maj yal in c'ul max wunej; max in na' tol rey ach, cax tol a Jehová max ach sic'on oc yin reyal.

¹¹Mamin, iltonab janic' ti' a jokan pichil ibil oc wuj ti'. Caw wal suboj max yun ach in mak'on camok ta max yal in c'ul. Yuj tu' xan a yin jun ti' chi je' nachaj el oj tol c'am tzet yob chin na' en, c'am bay max wi can in ba ayach. Palta ¿tzet yuj xan chin a sayic' yet chin a mak' cam aloni?

¹²A tinani' beyc'ulnelayokab on el yuj Dios co cawanil, mactxel tojol yayji oc is nabal; yojtak Cham ta ay in mul ayach. A pax ayin ti' xin, maj yal in c'ul tol max wiaj in k'ab en, ach in mak'on camok.

¹³Ay jun tzet chi yal eb anima yet payxa, chi yalon eb axca ti': A yin eb yobtakwom, a tu' chi tit yobc'ulalil ẍi. Yuj wal tu' xan c'am bak'in ok wiaj in k'ab en, mamin rey.

¹⁴Na tonab wal mamin reyal israel: A mac lanan a sayon ec' a mak'on cam aloni, tokwal ay jabok yelapnok. Lajan inc'al axca no camnak tx'i', ma axca no k'ak.

¹⁵Yuj tu' xan a Jehová chon beyc'ulnen co cawanil mac on ay co mul. A Cham ok in beyc'ulnen elok, catatu' ok in col-lay el yuj ayach, ẍi David.

¹⁶Max lajwi k'anjab David xin, max yalon Saúl: —¿Tom ach David ach, chach k'anjab wetok ti'? Axca in c'ajol ayji, ẍi Saúl, cax max ok'ajok.

¹⁷Max yaloni: —Ach ti' caw wal tojol yayji oc a nabal, caw wal puch miman a c'ul, xan maj in a mak' camok. Caw wal watx' chi yun a paktzen in yobc'ulalil en.

¹⁸A wal tinani' cha tx'oxk'abnej elok tol in watx'il cha saya'. Max in yawal oc Jehová yul a k'ab, palta maj pax in a mak' camok.

¹⁹Wal yel, c'am junok mac tol a yet chi chaloj el is yajc'ul yuj cax chi bekon el yin tol c'am tzet yetal chi yutej. A Jehová ok paktzen ayach yuj jun a watx'c'ulalil win ti'.

²⁰Max nachaj el wuj tinani', tol ach wal ok ach oc yin reyal, xan a ekbej yiban co conob ti', c'am mac ok je' yion ec' ayach.

²¹Ak'can a ti' ayin tinani', tol man ok ak' c'ayil winatil, c'al eb ayto wuj in ba yetok, ẍi Saúl tu' bay.

²²Max yak'on David tu' is ti' yuj tzet max k'an Saúl tu'. Max lajwi tu', cax max meltzojtok Saúl bay is despacho, axapax David xin, yetokc'al eb ajun yetok, max oc pax cantok eb bay yul ch'en nach'en tu'.