Read Q'anjob'al 1 S 26 Bible Online

1 S 26 - Q'anjob'al bible

1 S 26

¹A eb cajyom bay Zif max toj eb yilon cham Saúl bay Gabaa, max yalon eb bay axca ti': A David, a tu' chi c'ubaj el ba bay jolomlak witz yet Haquila, bay yichcanil tz'inan tx'otx', ẍi eb.

²Catatu' max toj cham Saúl yetok 3,000 eb soldado israel caw wal jelan. Caytu' max yun tojcan eb bay tz'inan tx'otx' yet Zif yuj saylay ec' David yuj eb.

³Max watx'nen aj eb is campamento bay tzalan Haquila bay ti' be chi toj bay tz'inan tx'otx', palta David xin, a ton tu' ayic' bay tz'inan tx'otx' tu'. Max yabej tol lanan saylay ec' yuj Saúl bay tu',

⁴xan max chektok jaywan yilomal ta yel mayal apni oc Saúl tu'.

⁵Max lajwi tu', max toj David bay ayic' Saúl, max cam wal yilon bay chi way Saúl tu' yetok Abner, is c'ajol Ner, a ton jun tu' yajawil eb is soldado Saúl. Axa max yun xin, a bay nan yul campamento tu' a tu' chi way cham Saúl, oyan oc eb soldado yinlak.

⁶Xan max yal David bay Ahimelec hitita c'al bay Abisai, yune' xal Sarvia,*fn* yuẍtak ba yetok Joab; max yalon bay eb: —¿Mactxel bekan c'ul chi toj wetok bay ayic' Saúl yul campamento? ẍi. —Ayin ti' ok in aytok etok, ẍi Abisai.

⁷A yet jun ak'bal tu', max toj David yetok Abisai bay campamento tu'. A Saúl lanan way bay tu'. A bay is jolomtak, a tu' aycan ay is lanza, wac'an can ay ch'en yul tx'otx'. Axa pax Abner yetokc'al masanil eb soldado chi way eb bay is tz'eyil tu'.

⁸Axca tu xin max yalon Abisai bay David: —A wal tinani' mayal wal yaoc Dios jun ajc'ul ti' yul a k'ab. Elok yin a c'ul chin mak' cam tinani'; a is lanza ti' chin jekaytok yul is c'ul masantac'al chi ec'ay ch'en yul tx'otx', junocnej chi lajwi, ẍi Abisai.

⁹Palta max tak'wi David, max yaloni: —Manchak a mak' camok, yujtol tzanc'al mactxel chi mak'on cam cham rey tol sic'bil el yuj Jehová, a jun tu' yowalil ok jayoc yailal yiban.

¹⁰Ayin ti' chi wak' in ti' bay Dios, tol aokab Cham ok mak'on camok, axca tol ok apnokc'alta' is tiempoal cami, ma xin a xol owal ok camok.

¹¹Aokab Jehová c'am chi chaon in mak'on cam cham rey tol sic'bil el yuj. Asan tol chetek is lanza ayic' bay is jolomtak tu' yetok jun netal aej, cax chon toji, ẍi David.

¹²Caytu' max yun yiontek David ch'en lanza yetok jun netal aej ayic' bay is jolomtak Saúl, cax max tita; c'amc'al mac max iloni, tamwal ay mac max abeni. C'am mac max el wayan; masanil camnak el wayi yujtol a Jehová max aontek jun miman wayan yiban eb.

¹³Lajwi tu xin, max ec'tok David bay junxa k'axepal jobe, cax max ajtok bay jolom jun witz, bay najat; axca tu xin, najat max yuncan xol eb.

¹⁴Max awji David bay Abner c'al bay eb soldado cham rey yin ipejal: —Abner, tak'wan ayin, ẍi David. Axa tak'wi Abner tu' axca ti': —¿Mac ach txel xan tol chach awji bay cham rey? ẍi Abner.

¹⁵Max yalon David axca ti': —¿Manminak ach jun soldado tol c'am mac chi je' lajlen ba etok xol eb jet israelal? ¿Tzet yuj xan tol c'am cha taynej cham rey a yajawil? Ay junok mactxel max octok bay tu' max yochej max mak' camok.

¹⁶Caw wal yob tzet yetal chon tu'. Ayin ti' chi wal satak Jehová tol e moj wal chex cam e masanil, yujtol c'am che taynej cham rey sic'bil el yuj Jehová. Sayto wal il ch'en lanza cham rey, yetok jun netal aej ayic' bay is jolomtak, catawal tu' ok eloni tatol ok ilchaj oj, ẍi David.

¹⁷A yet max yaben cham Saúl tol a David chi oc yul is nuk', max aj yaw: —¿Tom ach David ach tu', ach tol axca wal in c'ajol ayji, chach k'anjab tu'? ẍi Saúl. Max tak'wi David max yaloni: —Ja' ayin ton mamin.

¹⁸Palta a tinani', mamin rey, ¿tzet wal yuj xan chin oktej ec' ayin, a chekbej in ti'? ¿Tzet yetal wal yob max wun ayach? ¿Tzet wal in mul max oc ayach?

¹⁹Chin tewi ayach mamin rey, tol cha cha ab tzet ok wal ayin, a chekbej in ti': Ta a Jehová max ach aon oc ajc'ulal win, matawal chi el yin c'ul Cham chaon junok ofrenda. Palta tatol yetc'al anima jun ti' xin, aokab Cham chi yak' catab yiban. Yujtol max in uktelay el yuj eb bay in satak bay jun tx'otx' tol yet Jehová yayji, axcaxac'al tol chin tenlaycantek yuj eb yin wak'on serbil juntzan comon dios.

²⁰Matawal man najatok ayin el satak Jehová yet chin cami. Palta ach ti', mamin rey, ¿tzet yuj chach eltek ul a sayon ec' jun mac lajan axca junok no k'ak, cax chin okten ec' bay jolomlak witz ti' axca junok chi sayon ec' junok no ub? ẍi David.

²¹Catatu' max yalon cham Saúl: —Ach David, axca tol in c'ajol ach, chi wojtaknej elok tol ayin max oc in mul, axcaxac'al junok c'am nabal chi wut in ba. Mayal waoc in c'aynakc'ulal. Palta xin, meltzojan. Majxa in say yobc'ulalil en, yujtol a yet jun c'ual ti' max a tx'oxo' tol ay welapnok yul a sat, ẍi Saúl.

²²Max yalon pax David: —A cayti' ay ch'en a lanza mamin rey, titokab junok eb nak a chekbej tu', ul yion ch'en cayti'.

²³Aokab Jehová chi paktzen ayin yuj in watx' nabalil. Caxc'al a tinani', max ach yaoc Cham yul in k'ab, maj wal yal in c'ul max ach in mak' cam mamin rey, yujtol a Cham max ach sic'on oc yin opiso.

²⁴Axca ton max yun tinani', caw wal miman elapnok yul in sat, caywal tu' chi wochej tol ayokab welapnok yul sat Jehová. Aokab chin colon el bay masanil yatakilal chi jayoc wiban, ẍi David.

²⁵Max aj pax yaw cham Saúl junelxa, max yaloni: —Ayokab watx'c'ulalil en ach David, ach tol axca wal in c'ajol ayji. Ayc'al tzet mimek yayji oc ok onej, watx'c'al ok ach elocok, ẍi. Max lajwi tu', max meltzojtok cham Saúl bay yatut, axa tojc'al can David tu'.