Read Q'anjob'al 1 S 27 Bible Online

1 S 27 - Q'anjob'al bible

1 S 27

¹Palta a David max naobtanejc'al: Ay mi wal bak'in ok in mak'lay cam yuj Saúl tu', xan a tzet watx' chi wun tinani', chin tojcan bay tx'otx'al eb filisteo yet watx' c'amxa chin saylay yuj Saúl yul co makbej ti', caytu' ok yun in colchaj yul is k'ab, ẍi David.

²Xan max toj David yetok eb 600 winak ajun yetok, yet chi toj yaoc ba eb chekbejok cham Aquis, is c'ajol Maoc, rey bay Gat.

³Max ayji ec' David yetok eb ajun yetok tu' bay Gat, yetok cham Aquis, junjunc'al yetok yetbi c'al yetok yuninal. A David tu' max yitok eb xal yistzil cawanil, a ton xal Ahinoam, aj Jezreel, yetok xal Abigail is yistzilben camom Nabal, aj Carmel.

⁴A yet max yaben cham Saúl tol mayal tojcan elaj bay Gat, axca tu' majxa tzakloj yintak.

⁵Max yalon David bay Aquis: —Ta chi el yin a c'ul mamin rey, chin tewi ayach tol chin ak' cajay bay junok yaliẍ conob bay yul a nación ti'. C'am chi je' mamin rey, tol chin cajay etok bay yul miman conob ti', ẍi David.

⁶A yet jun c'ual tu', max yak'on cham Aquis jun conob Siclag bay, yuj tu' xan a tinani', a jun conob Siclag tu', yet eb reyal Judá yayji.

⁷Jun abil yetok caneb xajaw max ayji ec' David yul is tx'otx'al eb filisteo.

⁸Max eltek yetok eb ajun yetok ul yuchon eltek eb aj Gesur, eb aj Gezer, c'al eb amalecita, a ton eb tu' mimanxa tiempo cajay bay jun lugar tu', bay yetc'ulaltok Shur masantac'al bay Egipto.

⁹Max mak' cam eb anima bay tu', c'amxa junok winak c'al ix maxto cani. Max yion c'apaxtok eb no wacax, no calnel, no burro, c'al no camello, yetok pichilej c'apaxok. Max lajwi tu' max meltzojpaxtek eb bay ayic' Aquis.

¹⁰A cham tu' max k'anlej bay: ¿Tzet conobal max och lajwok tinani'? ẍi. Max yalon David bay: A ton bay sur yet Judá, c'al bay sur yet Jerameel, c'al bay sur is tx'otx'al eb quenita, ẍi David.

¹¹C'amxa eb winak tamwal eb ix ix maxto can yin yiquisal yuj David; junelnej c'amxa mac chito toj alon bay Gat tzet max yunej. A masanil tiempoal cajan ec' bay yul is tx'otx'al eb filisteo, axcac'al tu' max yunej.

¹²Caytu' max yun yaon oc Aquis tu' David yipok is c'ul, max naoni: Tol a eb israel ajc'ulxa oc eb yin David, axca tu' ok yun canxac'al can in yak'on serbil, ẍi cham Aquis tu'.