Read Q'anjob'al 1 S 28 Bible Online

1 S 28 - Q'anjob'al bible

1 S 28

¹A yet juntzan c'ual tu' max wajbaj oc eb filisteo is soldado yet chi yak' eb owal yin israel. Max yalon Aquis tu' bay David axca ti': —Ach ti' t'inan ok ach eltok wetok yin owal yetok eb ajun etok, ẍi.

²Max tak'wi David bay: —Yunokabi, a tinani' mamin rey, ok ojtaknej elok tzet yetal chi je' wuj ayin, a chekbej in ti', ẍi. —Axca tu xin, max yalon pax Aquis tu' bay David: Ach chach waoc in taynemalok yin junelnej, ẍi Aquis.

³Maxax cam cham Samuel, xan masanil eb israel max ok' yuj. A tu' max muklay cham bay conob Ramá. Maxax yuktej el Saúl eb tz'akan ay c'ul c'al eb chi k'umen pixan camnak bay xol conob Israel.

⁴Max wajban ba eb filisteo, max toj eb watx'nej aj is campamento bay Sunem. Ac'ala' max wajban c'apax Saúl masanil eb israel, max wajbaj oc ba eb bay Gilboa.

⁵A yet max yilontok Saúl tu' is campamento eb filisteo, yelxac'al max xiwaj is c'ul.

⁶Yuj tu' xan max k'anlej bay Jehová, palta majc'al tak'wok bay yin wayichejal, tamwal bay eb sacerdote, tamwal bay eb chekbej Dios.

⁷A yet max yiloni tol yob yet max yabej, max yalon bay eb is chekbej axca ti': —Sayek junok ix ix tol chi je' k'umen pixan camnak, yet watx' a bay, ok in k'anlej in nabal, ẍi cham. Max tak'wi eb ayoc yin opiso yetok: —A bay Endor, ay jun ix chi je' k'umen pixan camnak, ẍi eb bay.

⁸Max q'uexon el Saúl is pichil yet reyal, cax max yiontok cawanxa anima yetok, max toj yilon jun ix tu' yet ak'balil, max yalon bay: —Chin k'anlej ayach tol chawtej pixan jun mac chi wochej, ẍi Saúl.

⁹Max tak'wi jun ix tu' bay: —Ojtak tzet max utlay eb tz'akan ay is c'ul c'al eb chi k'umen pixan camnak yuj Saúl, tol max uktelay el eb yul conob ti' yuj. ¿Tzet yuj xan che say tzet chi yun wayc'ayi yet chin mak'lay camok? ẍi jun ix tu'.

¹⁰Max yak'on Saúl is ti': —Chi wak' in ti' satak Jehová tol c'am tzet ok ach onok, ẍi bay ix.

¹¹—¿Mac pax jun ok wawtej tu' aloni? ẍi jun ix tu'. —A ton camom Samuel chawtej in k'ana', ẍi bay.

¹²Yet wal jun bek tu' max yilon jun ix tu' yin cham Samuel; caw wal ipxac'al yel yaw yuj xiwilal, max yalon bay Saúl:

¹³—¿Tzet yuj xan chin etnej, ta ach Saúl ach? ẍi jun ix tu' bay. Max tak'wi cham rey Saúl: —C'am chach xiwi, ¿tzet max el tu'? ẍi bay. —Ay jun pixan camnak chi wil yajol yul tx'otx', ẍi jun ix tu'.

¹⁴—¿Tzetbil yili? ẍi Saúl. —A jun winak caw wal ichamxa ay jun is jokan pichil ayocok, ẍi jun ix tu'. Max nachaj el yuj Saúl tol a ton cham Samuel max tx'ox ba; yuj tu' xan max ay nojan sat tx'otx'.

¹⁵Max yalon cham Samuel bay: —¿Tzet yuj xan chin etnej yuj quin awtentek? ẍi cham. Max tak'wi Saúl: —Xiwc'ulal wayji, yujtol caw wal chi tit eb filisteo win, c'amxa oc Jehová wetok, majxa tak'wok Cham bay tzet chi wala', c'amxac'al jabok chi tak'wi Cham yet chin k'anlej bay eb is chekbej, tamwal yin wayichejal, xan chach wawtej yet chal ayin tzet wal ok wut in ba, ẍi bay.

¹⁶Max tak'wi cham Samuel axca ti': —Ta maj tak'wok Jehová ayach, ¿tzet yuj xan a ayin cha k'anlej? Axq'uijan tol ajc'ulalxa yak'on Jehová etok, xan max ach beklaycan yuj.

¹⁷Lananxa yunen tzet max chek Jehová wal ayach, tzetbil maxax yiec' ekbej yin reyal, axa yul k'ab David ok occanok.

¹⁸Yujtol maj ekej a c'ayon el eb amalecita yet max yalon Jehová ayach, yuj tu' max ach beklaycan yuj.

¹⁹Cax mannejc'alnak tu', palta tol ok ach yaoc Jehová yetokc'al conob Israel yul k'ab eb filisteo, xan a yet yecal chach jay oc yetok eb a c'ajol jetok ayon camnak onxa ti', yujtol a Jehová ok aon oc eb soldado israel yul is k'ab eb filisteo, ẍi cham Samuel.

²⁰A yet max yaben Saúl axca tu', max ec' telnajok, miman pax is tel. Caw wal max xiwaj yuj tzet max yal cham Samuel bay. Max paxxac'al yip yujtol maj low yet jun c'ual tu', c'al yet jun ak'bal ayoc yulak be.

²¹Yuj tu' a yet max yilon jun ix tu' tol manxa animaok ay c'ul, max yaloni: —Ayin a chekbej in ti' masanil tzet max ala' max wikej, caxc'al ay is may in cam yuj tzet max wun ti'.

²²Yuj tu' xan ab tzet chi wal ti': Ok wak' jabok tzet ok a lo' yet watx' ok oc jabok ep cax chach toji, ẍi jun ix tu' bay.

²³Maj yal c'ul Saúl max lowi, palta eb is chekbej ajun yetok, c'al jun ix tu' max oc tean eb yin tol chi lowi. Axca tu' max aj lecanok, cax max ay chotan bay ti' jun tx'at.

²⁴Yak'ban tu' max mak'on cam jun ix tu' jun no' yune' wacax caw wal bak'ech ayic' bay yatut, max watx'nen elok, cax max watx'nen c'apax ixim pan tol c'am yich.

²⁵Max yiontok loj tu' bay Saúl c'al bay eb is chekbej ajun yetok tu', max lajwi low eb xin, cax max toj eb yet jun ak'bal tu'.