Read Q'anjob'al 1 S 3 Bible Online

1 S 3 - Q'anjob'al bible

1 S 3

¹Ayoc nak ach'ej Samuel yin mulnajil bay cajlobal Jehová, yalan yikbej cham sacerdote Elí. A yet jun tiempoal tu', man wal comonok max k'anjab Jehová bay junok mactxel, man wal comonok max tx'ox ba Cham yin wayichejal.

²Axa max yun xin, a yet max c'oli tan yilwan cham Elí, c'amxa wal chi je' yiloni, a yet jun ak'bal yet lanan way cham bay yul is cuarto,

³axa pax nak Samuel xin, chi way bay jun cuarto ay bay cawilal bay ay te caẍail trato Jehová bay yul cajlobal Cham. A yet ayto k'inibi yet c'amto chi butlay tan lámpara,

⁴max awtelay nak Samuel yuj Jehová: —¡Samuel! ẍi Cham. —¡Tix in ti'! ẍi nak.

⁵Max toj lemnaj nak Samuel bay cham Elí, max yaloni: —Tix in ti' mamin, ¿tzet chal ayin? ẍi nak. —C'am ach chach wawtej, asi' way junelxa, ẍi cham Elí. Max lajwi tu', max toj pax nak Samuel wayok.

⁶Max awtelay pax junelxa yuj Jehová: —¡Samuel! ẍi Cham. Max aj pax wan nak Samuel, max toj pax bay cham Elí, max yaloni: —Tix in ti' mamin, ¿tzet chal ayin? ẍi Samuel. —Ach c'ajol, c'am ach chach wawtej. Asi' wayok, ẍi cham Elí.

⁷Manto ojtakbilok Jehová yuj Samuel, yujtol c'amto bay max k'anjab Cham junelok bay nak.

⁸Max ajapnok yin oxel yawtelay Samuel yuj Jehová, max aj pax wan nak, max toj pax yalon bay cham Elí: —Tix in ti' mamin, ¿tzet chal ayin? ẍi nak. Catatu' max nachaj el yuj cham Elí, tol a Jehová chi awten nak Samuel tu'.

⁹Max yalon cham bay nak: —Asi', wayan. Ta chach awtelay yuj Jehová, cax chach tak'wi axca ti': K'anjaban Mamin Jehová, ti chi wab ayin a chekbej in ti' tzet chala', cachi, ẍi cham Elí. Max lajwi tu', max toj pax nak way bay is wayub tu',

¹⁰cax max apni oc lecan Jehová, max yawten axcac'alta' chi yun yawteni: —¡Samuel! ẍi Cham. —K'anjaban Mamin, ti' wal chi wab ayin a chekbej in ti' tzet chala', ẍi nak Samuel.

¹¹Max yalon Jehová bay axca ti': —Ay tzet ok wun bay xol conob Israel ti', ok tacxac'al can el c'ul tzanc'al mac ok abenok.

¹²A yet jun c'ual tu', cax ok yunen el masanil tzet albilxa wuj bay Elí tzet ok yuncan el is yinatil.

¹³Toxa mayal wal bay, tol ok wak' yailal yiban is yinatil yuj yobtakil chi yunej. Yojtakxa tol yob max yun eb is c'ajol, cax yob max yal eb win, palta maj ak'lay cuenta eb nak yuj.

¹⁴Yuj tu' max wak' in ti' yin is yinatil Elí ti', tol c'am junok tzet chi yun tanil is mul eb, tamwal yuj xajanbal, tamwal yuj junokxa makan ofrenda, ẍi Jehová.

¹⁵Max lajwi tu xin cax max ay telan Samuel, masantac'al yet max sakbi. Yet max ajapnok yorail, max jakon nak cajlobal Jehová. Max xiw c'ul yalon juntzan tu' bay cham Elí.

¹⁶Palta max awtelay nak yuj cham, max yalon cham bay axca ti': —A tinani' mam, ay tzet ok in k'anlej ayach, ẍi cham Elí. —¿Tzet ẍi mamin? ẍi nak.

¹⁷Max k'anlen cham Elí bay axca ti': —¿Tzet max yal Jehová ayach? Elokab yin a c'ul, tol chal ayin tzet max yala'. Ta man ok al masanil ayin, aokab Cham ok yaoc yailal eban, ẍi cham bay nak.

¹⁸Max yalon nak Samuel masanil bay cham Elí, c'am wal jabokxa tzet yetal tol maj yala'. Axa yaloncan cham Elí axca ti': —Tol a wal caw Jehová max aloni, yunokab bay chi cha' c'ul Cham, ẍi cham Elí.

¹⁹Max ch'ibc'al aj nak Samuel, cax ayc'al oc Jehová colwaj yetok nak, xan c'am junok k'anej chi yal nak tol c'am chi yi ba.

²⁰Yuj tu' xan masanil eb conob Israel, chi tittac'al bay conob Dan, masantac'al bay conob Beerseba, max yaloni tol yel, a nak Samuel, chekbej ton wal Jehová.

²¹Cax max tx'oxonc'al ba Jehová bay Samuel bay Silo, cax max k'anjab yetok. Catatu' chi yak'on nak yojtaknej el eb yet israelal tzet chi yal Jehová.