Read Q'anjob'al 1 S 31 Bible Online

1 S 31 - Q'anjob'al bible

1 S 31

¹Max ocxac'al eb filisteo yin eb israel, cax max elaj eb bay eb filisteo tu', cax xiwil mac max cam bay Witz Gilboa.

²Max tzaklojc'al eb filisteo yintak Saúl yetok eb is c'ajol. Babel max cam Jonatán c'al Abinadab, c'al Malquisúa.

³Max lajwi tu', axa yocxac'al eb yin Saúl, max michchaj yuj is julbal jun eb filisteo, xan max xiwxac'al aj bay eb.

⁴Yuj tu' max yal bay nak yiomal oc is mitx'k'ab: —Itek espada tu' cax chin a mak'on camok, yujtol ok in yetnej juntzan tx'ok conobal ti' yin babelal, catatu' ok in yak'on cam eb, ẍi Saúl. Palta max xiw nak tu', maj je' c'ul mak'on camok. Yuj tu' xan max bekay paknaj ba Saúl yiban is yespada, axa cam tu'.

⁵A yet max yilon nak ajun yetok tu' tol mayal cam Saúl, cax max yak'on cam ba axca max yun yak'on cam ba Saúl tu'.

⁶A yet jun c'ual tu' max cam Saúl yetok eb is c'ajol yoxwanil, c'al nak yiomal oc is mitx'k'ab, c'al masanil eb israel ibil oc yuj.

⁷A yet max yaben eb israel ayic' bay k'axepal ec'tok yac'alil Jezreel, c'al bay k'ean sataktek a' Jordán, tol mayal elaj eb is soldado, c'al mayal cam Saúl yetok eb is c'ajol yoxwanil, ajun c'apax eb tu' max elajok, max bekoncan eb yatut. Axa eb filisteo max apnican oc cajan bay yatut eb tu'.

⁸Axa yet junxa c'ual, max toj eb filisteo yion el masanil is tzetak yetal eb israel maxax cam yin owal tu', max yilon eb telantok Saúl yetok eb oxwan is c'ajol bay Witz Gilboa.

⁹Ayman max tzoq'uil eb is jolom, max yion el eb ch'en is mitx'k'ab yet owal. Max lajwi tu' max yaontok eb yabixal bay masanil conoblak eb filisteo, c'al bay yatut is diosal eb.

¹⁰Max yiontok eb is mitx'k'ab Saúl tu' bay yatut is dios chi yik Astarté, cax max locban oc eb is mimanil Saúl, c'al yetok yet eb is c'ajol, bay yin is murallail conob Bet-sán.

¹¹A yet max yaben eb aj Jabes yul yet Galaad, tol max locbanelay aj is mimanil Saúl yuj eb filisteo bay tu',

¹²max lajti'nen ba eb, c'am wal jabok max xiw eb; jun wal ak'bal max bey eb, max apni eb bay ay is mimanil Saúl yetok is c'ajol, max yiontok eb bay Jabes. A bay tu' max yak' tz'a eb.

¹³Max lajwi tu', max mukon eb bay yich jun te te' bay Jabes tu'. Ukeb wal c'ual max oc eb yin c'ajbanc'ulal yuj eb.