Read Q'anjob'al 1 S 6 Bible Online

1 S 6 - Q'anjob'al bible

1 S 6

¹Ukeb xajaw max ayji ec' te caẍail trato Jehová bay xol eb filisteo.

²Lajwi tu', max awtelay eb sacerdote, c'al eb naom el k'anej yuj eb filisteo. Max k'anlen eb bay eb: —¿Tzet chi jut te caẍail trato Jehová tu'? ¿Tzet wal chi yun jak'on meltzojok? ẍi eb.

³Max tak'wi eb sacerdote: —Ta che yak' meltzoj te caẍail trato Diosal eb israel tu', manchak e yak' meltzoj yin c'am tzet, palta yowalil ay sabalej che yatok yuj e tojlanen e yobtakil, yet chi oc wanaj yowal c'ul Cham. Axca tu xin, ta ok watx'jok jun ilya' ayoc e yin ti', ok nachaj el e yuj tzet wal yuj xan ayoc yailal e yiban yuj Cham, ẍi eb.

⁴—¿Tzet wal yetal chi jak' xin, yet chi tan yowal c'ul Cham? ẍi eb. —Ak'ek oyebok oro axca yili quisk'oy, junjunc'al yet junjun eb e yajawil, axa oyebxa oro axca tx'ow yili, ilab tol ya ex ay ayex ti' yetok eb e yajawil tu' yuj jun ilya' tu'.

⁵Yuj tu xin, watx'nejek yechel quisk'oy c'al yechel no tx'ow tol mayal etaxtok sat co tx'otx' ti' yuj no', cax che yion aj can is Diosal eb israel, axta wal chi yak' mimanc'ulal Cham e yin c'al yin co diosal c'al yin co nación ti'.

⁶¿Tzet yuj xan tol caw wal mimek winak chi jut co ba axca max yut ba eb reyal Egipto yetok masanil anima ay bay tu'? Masantac'al max oc mimek yailal yiban eb, catatu' max bekon el eb conob israel.

⁷Ak'ek watx'jok junok carreta, cax che yiontok cac'onok no' txutx wacax ay yune', tol c'amtoc'al junelok max oc yugo yin jolom no', junanejek oc no', cax che c'alon oc carreta tu' yin yugo no' tu'. C'am che chatok yune' no' tu' yintak, che makchejcan no' yaliẍ tu' yul corral.

⁸Lajwi tu', cax che yaon octok te caẍa Jehová yul carreta, che yaon aytok oro tu' yul junok cajón, cax che yaon ajtok yul carreta bay tz'eyil te caẍa tu', a ton juntzan tu' che yatok yuj e tojlanen e yobtakil. Lajwi tu', cax che bekontok no wacax yetok te carreta tu' tx'oklil.

⁹Ok e yila': tatol a bay beal Bet-semes ok ca toj no', tita tol a Jehová is Diosal eb israel chon uten axca ti. Tatol tx'ok beal bay ok tok no' xin, manak Jehová chi aontek jun ilya' ti' jiban, comon ilya'c'al mi chon on chi yal tu', ẍi eb sacerdote.

¹⁰Axca tu' max yut eb filisteo, cax max bet yiontek eb cac'on no txutx wacax ay yune', cax max makchen can eb no' yune' yul corral, axa c'alon oc eb te carreta yin no' tu'.

¹¹Lajwi tu', max yaon ajtok eb te caẍail trato Jehová yetok jun cajón bay ayaytok oro axca yechel tx'ow, c'al yechel jun ilya' tu'.

¹²Axa bekon el eb no' tu', yelc'ulal max toj no' yul beal Bet-semes. Chi el yaw no', c'amc'al jabok max el no' yul be tu'. Najat tzunanc'al max yut ba eb filisteo yintak no' yet chi yilon eb, masantac'al max apni oc eb bay mojonal yet Bet-semes.

¹³Ay eb aj Bet-semes ayic' bay jobe chi jowi trigo. A yet max aj t'anan eb, max yilon eb tol lanan jayoc te caẍail trato Jehová. Caw wal max tzaloj aj eb.

¹⁴A bay jun ac'al yet Josué, yul yet Bet-semes max jayoc te carreta; a bay tu' max jayoc lecan no wacax tu'. Ay jun miman ch'en bay tu' axa eb levita max ion aytek te caẍa yet Jehová, c'al te cajón bay ayaytok tzetak yetal tu'; max yaon ajtok eb yiban ch'en miman ch'en tu'. Max oc lemnaj eb aj Bet-semes tzoc'on coj te carreta tu' yin sial, axa yak'on eb no wacax tu' yin xajanbalil bay Jehová. A yet jun c'ual tu' max yak' eb aj Bet-semes xajanbal, c'al ofrenda tol chi tz'a bay Jehová.

¹⁶A yet max lajwi yilon eb owan yajawil eb filisteo, tzet max yut eb tu', cax ac'ala' yet jun c'ual tu' max meltzoj eb bay conob Ecrón.

¹⁷A oyeb oro yechel ilya' tu' max yatok eb filisteo yet chi oc tojolok mul eb satak Jehová, junjun yet junjun conob ti'; Asdod, Gaza, Ascalón, Gat c'al Ecrón.

¹⁸A pax yechel tx'ow, lajan bisil axca bisil conoblak eb owan yajawil filisteo tu', a ton conoblak ayoc is murallail, c'al ayc'al is yaldeail. A ch'en miman ch'en bay sat is tx'otx' Josué, bay max alay ajtok te caẍail trato Jehová bay Bet-semes, txequelto tinani'.

¹⁹Max cam 70 eb winak aj Bet-semes yuj Jehová, yujtol max say yil eb yul te caẍa tu'; axa masanil eb anima max ok'i, yujtol max oc camich yuj Jehová.

²⁰Yuj tu' xan max yal eb anima ay bay tu': ¿Mac wal chi je' tec'ban ba satak Jehová, yujtol ay is may Cham? ¿Bay wal chi jatok is caẍail trato Cham, cax chi elcan co c'atan? ẍi eb.

²¹A wal yet tu' max yatok eb is chekbej bay Quiriat-jearim, max yalon eb: Max yak' meltzoj eb filisteo te caẍail trato Jehová, yuj tu' ul iek ajtok, ẍi eb.