Read Quechua Bolivia DC Bible GÉNESIS 1 Bible Online

GÉNESIS 1 - Quechua Bolivia DC Bible bible

GÉNESIS 1

¹Qallariypeqa Dios janaj pachata kay pachatawan ruwarqa.

²Kay pachaqa chajrulla, yuyay chinkay ukhu laqhallataj karqa. Diospa Espirituntaj yaku patata muyuykachasharqa.

³Diostaj nerqa: K'anchay kachun, nispa; k'anchaytaj karqa.

⁴Dios rikorqa k'anchayqa sumaj kasqanta. K'anchaytataj laqhamanta t'aqarqa.

⁵Suticharqataj k'anchaytaqa p'unchay, nispa. Laqhatataj suticharqa tuta, nispa. Ajinamanta ch'isiyaywan sut'iyaywan ñaupaj kaj día karqa.

⁶Chaymantá Dios nerqa: Yaku chaupipi uj jark'achina kachun, yakuta iskayman t'aqaj.

⁷Dios jark'achinata ruwarqa yakuta iskayman t'aqajta: Khuskan qhepakorqa urapi, khuskantaj patapi.

⁸Chay jark'achinata yakuta iskayman t'aqajtaqa suticharqa janaj pachata. Ajinamanta ch'isiyaywan sut'iyaywan iskay kaj día karqa.

⁹Chaymantá Dios nerqa: Janaj pacha kaj urapi yakoqa uj cheqallapi kachun, ch'aki kaj rikhurinampaj, nispa. Ajinataj karqa.

¹⁰Chay ch'aki kajtataj Diosqa suticharqa jallp'ata. Yaku uj cheqallapi tantakojtataj mar qochata suticharqa. Chayta Dios rikorqa sumaj kasqanta.

¹¹Chantá Dios nillarqataj: Jallp'api tukuy laya q'omerkuna wiñachun: Mujoj qhoras, poqoj sach'as ima. Ajinataj karqa.

¹²Jallp'api wiñarqa tukuy laya q'omerkuna: Qhoras, mujojkuna, poqoj sach'as ima. Ajinataj karqa. Chayta Dios rikorqa sumaj kasqanta.

¹³Ajina ch'isiyaywan sut'iyaywan kinsa kaj día karqa.

¹⁴Chaymantá Dios nillarqataj: K'anchaykuna kachun cielopi, p'unchayta wajman, tutatataj wajman t'aqanampaj; jinallataj señal kanampaj tiempospaj, diaspaj, wataspajwan.

¹⁵K'anchaykuna kachun cielopi jallp'ata k'anchanampaj. Ajinataj karqa.

¹⁶Dios ruwarqa iskay jatuchaj k'anchaykunata: Sinch'i kajta p'unchaypi k'anchanampaj, pisi kajtataj tutapi k'anchanampaj. Chaymantá ruwallarqataj qoyllurkunata.

¹⁷Dios churarqa k'anchaykunata cieloman, jallp'ata p'unchaynintin, tutantin k'anchamunankupajpuni; k'anchayta wajman, laqhatapis wajman t'aqanankupaj. Chayta Dios rikorqa sumaj kasqanta.

¹⁹Ajina ch'isiyaywan sut'iyaywan tawa kaj día karqa.

²⁰Chantá Dios nillarqataj: Yakupi kausachunku ashkha animalkuna; jinallataj p'isqospis jallp'a patata phawaykachajkuna.

²¹Dios ruwarqa jatuchaj manchachikuna jina animalesta mar qochapi, tukuy laya khurustawan, layankuman jina yakupi kausajkunata, jinallataj tukuy laya p'isqostapis layankuman jina. Chayta Dios rikorqa sumaj kasqanta.

²²Dios bendicerqa chay tukuynin animalesta, nispa: Mira castas kaychej, miraychej, mar yakuman junt'achiychej. P'isqospis jallp'a patapi mirachunku.

²³Ajina ch'isiyaywan sut'iyaywan phishqa kaj día karqa.

²⁴Chantá Dios nerqa jallp'a patapi kausachunku tukuy laya animales: Monte animales, uywas, pampata qhatatakojkuna ima, layankuman jina. Ajinataj karqa.

²⁵Dios ruwarqa monte animalesta layankuman jina, uywasta layankuman jina, jinallataj pampata qhatatakoj animalestapis layankuman jina. Chayta Dios rikorqa sumaj kasqanta.

²⁶Chay qhepata Dios nerqa: Runata ruwanachej noqanchejman rijch'akojta; tukuynin animalesmanta aswan atiyniyoj kachun, mundontimpi atipanampaj challwasta, p'isqosta, tawa chakiyojkunata, qhatatakojkunatawan jallp'a patapi.

²⁷Diosqa runata ruwashaspa payman rijch'akojta ruwarqa; qharita warmitawan ruwarqa.

²⁸Chantá bendicerqataj nispa: Mira casta kaychej, miraychej, mundoman junt'aychej; atiyniyojtaj kaychej, atipaspa mar qochapi kaj challwasta, tukuy p'isqosta, tukuy qhatatakojkunatawan jallp'a patapi.

²⁹Chaymantá paykunaman nerqa: Qhawariychej, qankunaman qoykichej jallp'a patapi tukuy mujoj plantasta, tukuy sach'astawan. Chaykunataj mikhunaykichejpaj kanqa.

³⁰Tukuy monte animalesman, p'isqosman, tukuy qhatatakojkunamampis jallp'a patapi, q'omer qhorasta qoni mikhunankupaj. Ajinataj karqa.

³¹Dios rikorqa tukuy ima ruwasqanqa sumajpuni kasqanta. Ajinamanta junt'akorqa ch'isiyaywan sut'iyaywan sojta kaj día.