Read Quechua Bolivia DC Bible GÉNESIS 11 Bible Online

GÉNESIS 11 - Quechua Bolivia DC Bible bible

GÉNESIS 11

¹Chay tiempopi tukuy runas uj parlayllata parlaj kanku.

²Inti llojsimuynejmanta llojsimuspa tarerqanku uj pampata Sinarpi, chaypitaj qhepakorqanku unayta tiyakunankupaj.

³Uj pachataj ninakorqanku ujkuna ujkunawan: Ladrillosta ruwanachej chayachinataj ninapi. Chayta ruwarqanku rumej cuentanmanta mach'ata chhajwatawan chajruykuspa.

⁴Chaymantataj ninakorqanku: Kunanqa ruwanachej uj llajtata, uj torretawan, chay janaj pachaman chayanampaj. Ajinamanta noqanchej sumaj atiyniyoj nisqas kananchejpaj, amataj tukuynejman ch'eqerananchejpaj.

⁵Señortaj uraykamorqa chay llajtata qhawarej, chay torretawan runas ruwasqankuta.

⁶Señortaj nerqa: Runaqa kunan sumaj ujchasqa kashan, uj parlayllatataj parlanku, jinamanta kaytaqa ruwanku. Manataj kunanqa pipis saqenqachu kay ruwasqankuta.

⁷Kunanqa jaku uraykunachej parlayninkuta chajroj, parlasqankuta ama entiendenakunankupaj.

⁸Ajinata Señorqa tukuynejman ch'eqeracherqa. Paykunataj chay llajtata ruwayta saqeporqanku.

⁹Chay cheqapi Dios chajrurparerqa runaspa parlayninkuta tukuynin jallp'a patapi; chaynejmantataj tukuynejman ch'eqeraporqanku. Chayrayku chay llajtajta sutin karqa Babel.

¹⁰Kaykuna karqanku Sempa miraynin. Jatun musphay paramanta iskay watanman Semqa pachaj watasniyoj karqa, Arfaxad wawan naceshajtin.

¹¹Chay qhepata Semqa phishqa pachaj watastawanraj kausarqa, wawasnintaj karqanku qharis chanta warmis ima.

¹²Arfaxadqa karqa kinsa chunka phishqayoj watasniyoj wawan Sala naceshajtin.

¹³Chaymanta qhepaman Arfaxadqa tawa pachaj kinsayoj watastawanraj kausarqa, wawasnimpis karqankuraj qharis, chanta warmis.

¹⁴Salaqa kinsa chunka watasniyoj karqa Heber wawan naceshajtin.

¹⁵Chay qhepata Salaqa tawa pachaj kinsayoj watastawanraj kausarqa, wawasnintaj karqankuraj qharis, chanta warmis.

¹⁶Heberqa kinsa chunka tawayoj watasniyoj karqa wawan Peleg naceshajtin.

¹⁷Chay qhepata Heberqa tawa pachaj kinsa chunkayoj watastawanraj kausarqa; wawasnimpis karqankuraj qharis chanta warmis.

¹⁸Pelegqa karqa kinsa chunka watasniyoj Reu wawan naceshajtin.

¹⁹Chay qhepata Pelegqa iskay pachaj isq'onniyoj watastawanraj kausarqa; wawasnimpis karqankuraj qharis, chanta warmis.

²⁰Reuqa kinsa chunka iskayniyoj watasniyoj karqa wawan Serug naceshajtin.

²¹Chay qhepata Reuqa iskay pachaj qanchisniyoj watastawanraj kausarqa; wawasnimpis karqankuraj qharis, chanta warmis.

²²Serugqa karqa kinsa chunka watasniyoj Nacor wawan naceshajtin.

²³Chay qhepata Serugqa iskay pachaj watastawanraj kausarqa; wawasnimpis karqankuraj qharis, chanta warmis.

²⁴Nacorqa karqa iskay chunka isq'onniyoj watasniyoj Taré wawan naceshajtin.

²⁵Chay qhepata Nacorqa pachaj chunka isq'onniyoj watastawanraj kausarqa; wawasnintaj karqankuraj qharis, chanta warmis.

²⁶Tareqa kinsa wawasniyojña karqa qanchis chunka watasniyoj kashaspa. Chay wawasnintaj karqanku Abram, Nacor, Harán ima.

²⁷Kaykuna kanku Tarejpa miraynin. Pay karqa kinsa wawasniyoj, chaykunataj kanku Abram, Nacor, Harán ima. Haranqa Lotpa tatan karqa.

²⁸Pay wañuporqa tatan Taremanta ñaupajta Caldea Urpi, maypichus nacerqa chay kikin jallp'api.

²⁹Abram casarakorqa Saraiwan, Nacortaj Milcawan. Chay Milcaqa karqa Harampa wawan, ñañantaj karqa Isca.

³⁰Saraipataqa mana wawasnin karqachu, payqa manapuni wijsallikuyta atejchu.

³¹Tareqa caldeospa jallp'an Urmanta llojsiporqa, Canaán jallp'aman rinampaj, pusariykukuspa Abram wawanta, allchhin Lotta, ñojch'an Saraitawan. Rispataj Harán jallp'aman chayarqanku, chantaqa kikimpitaj tiyakorqanku.

³²Tareqa Harán jallp'api wañuporqa iskay pachaj phishqayoj watasniyoj.