Read Quechua Bolivia DC Bible GÉNESIS 12 Bible Online

GÉNESIS 12 - Quechua Bolivia DC Bible bible

GÉNESIS 12

¹Uj kuti Señorqa Abramman nerqa: Saqey jallp'aykita, ayllusniykita, tataykej wasintawan. Jinaspataj ripuy, noqa rikuchisqayki chay jallp'aman.

²Mirayniykimanta ruwasaj uj jatun aylluta; bendicisqayki, sutiyki may yuyarisqa kanqa, qannejta wajkuna bendicisqas kanqanku.

³Qampaj allinta ruwajkunapaj allinta ruwapusaj, qampaj mana allinta ruwajkunatarí maldicisaj. Qannejta bendicisqas kanqanku tukuy ayllus kay jallp'a patapi kajkuna.

⁴Abramtaj Harán jallp'amanta llojsiporqa Señorpa kamachisqanman jina; Lotpis paywan rerqa. Abramqa qanchis chunka phishqayoj watasniyoj karqa, Canaán jallp'aman ripushaspa.

⁵Pay riporqa warmin Saraita, sobrinon Lottawan pusariykukuspa. Jinallataj Harampi kashaspa mashkha runastachus jap'erqa chaytawan, tukuy imasnintawan apariykukuspa; Canaán jallp'amantaj chayarqanku. Chaymanta Abramqa rillarqapuni Siquem jallp'aman chayanankama, More vallepi maypichus encina sach'a karqa chayman. Chay jallp'aspitaj cananeos tiyakusharqanku.

⁷Chaypi Señorqa Abramman rikhurerqa, nerqataj: Kay jallp'ata mirayniykiman qosaj. Abramtaj chaypi uj altarta Diospaj ruwaporqa, chaypi Señorqa payman rikhurisqanrayku.

⁸Chaymanta riporqa uj orqoman, chaytaj kashan Betel llajtaj inti llojsimuyninnejpi, chaypi jarakorqa. Betelqa kasharqa jaramanta inti yaykuypi. Haitaj karqa inti llojsimuynejpi. Chay cheqapi Abramqa uj altartañataj ruwarqa, Señorpa sutimpi Diosmanta mañakunampaj.

⁹Chaymanta Abramqa rillarqapuni pisimanta pisi Neguev jallp'aman.

¹⁰Chay tiempopi uj jatun yarqhay karqa jaqay jallp'api. Chayrayku Abramqa Egiptoman riporqa pisi tiempota tiyarikoj. Imaraykuchus chay jallp'api, maypichus tiyakorqa chaypi, manapuni imapis mikhuykunampaj karqachu.

¹¹Egiptoman chayashaspataj Abramqa warmin Saraiman nerqa: Qhawariy, noqa yachani qanqa sumaj k'achita warmi kasqaykita.

¹²Egipcios qanta rikuytawan nenqanku: Kay warmeqa chay qharej warmin, nispa noqata wañuchiwanqanku, qantari mana.

¹³Chayrayku niy ari, qanqa noqaj panay kasqaykita, qanrayku ama wañuchinawankupaj, allintaj rinawampaj, nispa.

¹⁴Abram Egiptoman chayajtinkama egipciosqa Saraita mayta qhawaj kanku k'achita kasqanta.

¹⁵Faraonta yanapajkunasnimpis rikorqanku k'achita kasqanta, jinallataj faraompis; pay karqa Egiptopi rey. Chaymantataj Saraitaqa faraompa palacionman pusarqanku.

¹⁶Sarairayku faraonqa Abramta munakorqa. Qortataj payman ovejasta, wakasta, qhari kamachista, warmi kamachista, burrosta, camellostawan.

¹⁷Sarairaykutaj Señorqa faraonta mayta ñak'aricherqa ashkha jasut'iykunawan, jinallataj tukuy familiantapis.

¹⁸Chayrayku faraonqa Abramta wajyacherqa, nerqataj: Imaraykutaj qan kay jinata ch'aukiyawankiri? Imaraykutaj mana qan niwankichu kay warmeqa qampa warmiyki kasqantarí?

¹⁹Qan niwanki kay warmeqa panayki kasqanta, noqatataj saqewanki payta warmiypaj jap'ikojta. Kunanqa kayqa warmiyki, jap'ikapuy, ripuytaj kaymanta.

²⁰Chaymanta faraonqa runasninta wajyaspa nerqa Abramta Egipto llajtankumanta qharqonankuta, warmintawan, pininchus, imasninchus karqa chaytawan.