Read Quechua Bolivia DC Bible GÉNESIS 18 Bible Online

GÉNESIS 18 - Quechua Bolivia DC Bible bible

GÉNESIS 18

¹Abrahamman Señor rikhurerqa Mamre encinas sach'ararapi, jaran punkupi tiyachushajtin, khuskan p'unchayta jina.

²Abrahamqa qhawarispa rikorqa kinsa qharista ñaupaqempi sayashajta. Sayaykuspataj qayllaykorqa usqhay usqhayta, jinaspataj qonqoriykukorqa umanta pampaman chayachinankama, nerqataj: Wiraqochíy, kamachiykita waturikuwanki, yaykurimuy ari.

⁴Kunitan yakuta apamonqanku chakisniykichejta mayllakunaykichejpaj, qankunataj uj chhikallantapis kay sach'a llanthupi samarikunkichej.

⁵Qankuna ñapis chayamunkichejña kamachiykichej maypichus tiyakun chayman. Kunanqa aparimpusqaykichej uj pisi t'antallatapis mikhurikunaykichejpaj, samarikuspa kallpacharikunaykichejpaj, amaraj kaymanta ripushaspa. Paykunataj nerqanku: Yasta, ruwallay imatapis nisqaykita.

⁶Abrahamtaj jaran ukhuman yaykuytawan Saraman nerqa: Usqhayta orqhomuy tawa chunka libras sumajnin jak'uta, usqhayllata ruwaspa tortillata ninapi chayarqochiy!

⁷Chaymanta Abrahamqa usqhay usqhayta maypichus wakas kasharqa chayman rispa, ajllaspataj sumajnin kaj torillota, aysamuspa uj kamachinman nerqa ñak'ananta, paytaj chay rato ruwarqa.

⁸Chaymantaqa ña wakisqaña kajtin, Abrahamqa paykunaman jaywarqa quesota, lecheta, torillomanta wayk'usqatawan. Paykunaqa mikhorqanku chay sach'a llanthupi, Abrahamtaj paykunawan kasharqa.

⁹Mikhuyta tukuytawantaj watukojkunaqa Abrahamta taporqanku: Maypitaj warmiyki Sara kashanrí?, nispa. Paytaj nerqa: Jaqay toldo ukhupi, nispa.

¹⁰Ujnin kaj nerqa: Watapaj kutimuspa watukusqayki, chaypaj warmiyki Sara wawayojña kanqa. Jinata nishajtintaj Saraqa Abrahampa wasanmanta toldo punkumanta uyarimusharqa.

¹¹Abrahamwan Sara warminwanqa machusña karqanku, chantaqa Sarajta killampis manaña jamojchu.

¹²Chayrayku Saraqa asiywan atipachikorqa, sonqompitaj nerqa: Imaynamantataj chanta chay jina kusiy kanmanri kay jina payapiri, qosaywan noqawanqa machusña kaykoqa?, nispa.

¹³Señortaj Abrahamman nerqa: Imaraykutaj warmiyki Sara asikunri? Manachu creen jina payayaynimpi wawayoj kayta?

¹⁴Señorpajqa kanmanchu imallapis mana ruway atinaqa? Watapaj kunan jinallataj kutimuspa watukusqayki, chaypaj Saraqa wawayojña kanqa.

¹⁵Chayta uyariytawan Saraqa nerqa: Mana asinichu, nispa. Chayta nerqa manchariywan. Señortaj nerqa: Mana jinachu, qanqa asisharqankipuni.

¹⁶Chaymanta chay watukojkunaqa sayariytawan Sodomanejman jap'irerqanku. Abrahamtaj kacharpayaj jina uj chhikanta paykunawan rerqa.

¹⁷Señortaj sonqompi nerqa: Abrahamman willasaj imatachus ruwanay kasqanta, imaraykuchus pay kanan kashan uj jatun atiyniyoj naciompa tatan. Payman niniña benedicinayta paynejta kay mundopi tukuy nacionesta.

¹⁹Noqa payta ajllani, wawasninta, miraynintapis kamachinampaj noqaj ñankunasniypi purinankupaj cheqan kajta, allin kajtataj ruwaspa, noqa junt'anaypaj payman tukuy ima nisqasniyta.

²⁰Chaymanta Abrahamman Señor willarqa: Sodomapi Gomorrapiwan tiyakoj runaspa jucha ruwasqankoqa ancha millaypuni uyarikun tukuynejpi, chayqa mana allinchu.

²¹Chayrayku kunanqa rishani qhawarej, willawasqaykuman jina, cheqachus chay juchasninkoqa ancha millaypuni manachus chayta. Ajinamanta noqaqa yachasaj.

²²Chaymantaqa iskay rerqanku Sodomaman. Abrahamtaj qhepakorqa Señorwan.

²³Chantaqa uj chhikantawan qayllaykuspa Abrahamqa Señorta taporqa: Señor, mana juchayojtaqa juchayojtawan khusachu chinkachinki?

²⁴Ichapis chay llajtapi mana juchayojkuna phishqa chunka kanqanku. Chay phishqa chunkarayku manapuni chay llajtataqa perdonawajchu?

²⁵Señor, tukuchinaykeqa mana allinchu kanman, mana juchayojta juchasapastawan khuska, iskayninkupis juchallatapuni ruwankuman jina. Ama chayta ruwaychu ari. Qan kanki kay mundontinta cheqanchaj, chayrayku, manachu cheqan kajtapuni ruwanayki tiyan?

²⁶Señortaj kuticherqa: Sichus phishqa chunka mana juchayojkunata tarisaj Sodoma llajtapi chayqa, paykunarayku chay llajtata mana chinkachisajchu.

²⁷Abraham ujtawan nillarqataj Señorman: Perdonaway, noqa ñut'u jallp'a jinalla kashaspa qan Señorniyta tapukususqaymanta.

²⁸Phishqa chunkamanta, phishqa mana kajtinkuri, llajtataqa chinkachillankipunichu, chay phishqa mana kasqankurayku? Señortaj kuticherqa: Sichus tawa chunka phishqayojllata tarisaj chaypis, chay llajtataqa mana chinkachisajchu.

²⁹Abrahamqa nillarqapuni: Tawa chunkalla kajtinkuri? Señortaj nerqa: Chay tawa chunkalla kajtinku manapuni chinkachisajchu chay llajtataqa.

³⁰Abraham nillarqapuni: Mañakuyki, Señor, ama phiñakunawaykita ajinata nejtillaypuni. Kinsa chunkalla kajtinkuri? Paytaj nerqa: Kinsa chunka kajtinkupis, manapuni chay llajtataqa chinkachisajchu.

³¹Abraham nillarqapuni: Señor, perdonariway ari anchataña tapususqaymanta. Sichus qan tarinki iskay chunka mana juchayojkunallata chayri? Señortaj kuticherqa: Chay iskay chunkarayku chay llajtataqa mana chinkachisajchu.

³²Chaywampis Abrahamqa nillarqapuni: Señorníy, ama phiñakuwankichu ari, kayllatawanña tupurisqayki. Imanankitaj Señor, sichus chunkallata tarinki chayri? Señortaj kuticherqa: Chay chunka mana juchayojkunarayku manapuni chay llajtataqa chinkachisajchu.

³³Señorqa ajinata Abrahamwan parlaytawan riporqa chaymanta. Abrahamtaj jaranman kutimporqa.