Read Quechua Bolivia DC Bible GÉNESIS 2 Bible Online

GÉNESIS 2 - Quechua Bolivia DC Bible bible

GÉNESIS 2

¹Ajinata janaj pachata, kay pachatapis, chaypi kajkunatawan Dios ruwayta tukorqa.

²Qanchis kaj diapi, Diospa tukuy ima ruwanasnin tukusqaña kajtin, samarikorqa.

³Chaymanta qanchis kaj diata Dios bendicerqa, churanoqarqataj samarikuna diata, imaraykuchus Pay chay p'unchaypi samarikorqa tukuy imata ruwasqanmanta.

⁴Chaymin janaj pachaj qallarikuynin, kay pachaj qallarikuynintaj. Maypachachus Dios ruwarqa janaj pachata kay pachatawan chaypacha, manaraj ni ima sach'apis karqachu, nitaj ima q'omer qhorapis jallp'api wiñarqarajchu, imaraykuchus Señor Dios manaraj parachimorqarajchu jallp'a pataman, nitaj pipis karqarajchu jallp'ata llank'anampaj.

⁶Chaywampis Diosqa wausita chhullata jina pampamanta llojsichimorqa, chaywantaj jallp'ata joq'ocharqa.

⁷Chaymanta Señor Dios runata ruwarqa ñut'u jallp'amanta, senqanmantaj kausay samayta samaykorqa. Ajinamanta runaqa kausayta qallarerqa.

⁸Señor Dios uj qhallallaj huertata Edempi ruwarqa inti llojsimuynejpi; chaymantaj churarqa chay runa ruwasqanta.

⁹Chay huertapi Señor Dios wiñacherqa tukuy laya sumaj poqoj sach'asta mikhunapaj. Huerta chaupitaj karqa kausay sach'a, wiñachillarqataj allin kajta mana allin kajta rejsina sach'atapis.

¹⁰Huertata qarpanampaj kikin Edenmanta uj mayu llojserqa, chaymantataj tawa mayusman t'aqakorqa.

¹¹Ñaupaj kaj mayoj sutin karqa Pisón. Chayqa muyuykushan Havila jallp'aj muyuyninta, chaypitaj qori tiyan.

¹²Chay jallp'api kaj qoreqa sumaj karqa. Chaypi kallarqataj sumajta q'apashaj mach'a sach'a waqaywan, ónice rumiwan.

¹³Iskay kaj mayoj sutenqa Gihón; chaytaj muyuykushan tukuy Cus jallp'ata.

¹⁴Kinsa kaj mayoj sutenqa Tigris; chaytaj muyuykushan Asiriaj inti llojsimuyninnejta. Tawa kaj mayoj sutintaj Eufrates.

¹⁵Señor Diostaj runa ruwasqanta Edén huertaman churarqa llank'anampaj, qhawanampajtaj.

¹⁶Chaymanta Señor Diosqa kamacherqa runata: Huertapi tukuynin kaj sach'asmanta mikhullanki;

¹⁷Allin kajta mana allin kajta rejsina yachay sach'aj poqoynillanta amapuni mikhunkichu; chay sach'aj poqoynintachus mikhunki chayqa, wañunki.

¹⁸Señor Diosqa nerqa: Mana allinchu runaqa sapallan kanan. Paywan kanampaj, uj yanapajta ruwapusaj.

¹⁹Señor Dios ruwarqa jallp'amanta tukuy laya monte animalesta, tukuy laya p'isqostawan. Jinaspataj runaman qhaterqa, sapa ujta sutichanampaj. Chay runaj sutichasqasninwantaj sapa uj kashanku.

²⁰Runataj sapa uj animalesta sutichararqa: Monte animalesta, p'isqosta, uywasta ima. Manataj tarikorqachu payta yanapajqa.

²¹Señor Diostaj runata misk'ejta puñurpayacherqa, chaykamataj ujnin wajtanninta orqhorqa, jinaspataj aychallanwantaj k'askaykuchiporqa.

²²Señor Dios runaj wajtanninta orqhosqanmanta uj warmita ruwarqa, jinaspataj runaman pusamorqa.

²³Runataj payta qhawarispa nerqa: Kayqa kikin tulluymanta, kikin aychaymanta; kaypa sutintaj kanqa warmi, imaraykuchus Diosqa payta qharimanta ruwasqa.

²⁴Chayrayku qhareqa tatanta mamantawan saqenqa, warminwantaj ujchakonqa, iskayninkutaj uj runa jinalla kanqanku.

²⁵Iskayninkutaj qhari warmi q'alaslla kasharqanku, manataj p'enqakorqankuchu ajina kasqankumanta.