Read Quechua Bolivia DC Bible GÉNESIS 20 Bible Online

GÉNESIS 20 - Quechua Bolivia DC Bible bible

GÉNESIS 20

¹Abrahamqa maypichus kasharqa chaymanta riporqa Neguev jallp'aman. Chaypitaj jarakuspa toldota wakichikorqa. Chaytaj karqa Cadeswan Shurwan tinkuypi. Chaypi pay tiyakorqa; chay llajtaj sutintaj Gerar.

²Chaypitaj Abrahamqa nerqa warmin Sara panan kasqanta. Gerarmanta rey Abimelectaj pusachimorqa, warmimpajtaj jap'ikorqa Sarata.

³Chay ch'isipacha Abimelecqa mosqokorqa, Diostaj chay mosqoynimpi nerqa: Qanqa wañunki, pi warmitachus warmiykipaj pusachimunki chayqa qosayoj.

⁴Abimelecri manaraj Sarawan puñuykusqachu; chayrayku payqa kuticherqa Señorman: Señorníy, wañuchillawajchu pichus manaraj ima sajratapis ruwashajtin?

⁵Noqamanqa kikin Abraham niwan Saraqa paypata panallan kasqanta, Sarapis nillawantaj Abrahamqa turampuni kasqanta. Chayrayku noqaqa allinmanta ruwani mana kajtachu tukuy cheqan sonqoywan.

⁶Diostaj nerqa chay mosqoynimpi: Noqaqa yachani qan allin sonqoykiwan kayta ruwasqaykita, chayrayku mana saqerqaykichu payman qayllanaykita ama juchallikunaykipaj contraypi.

⁷Kunanqa kutichipuy kay warmita qosanman, imarayuchus payqa profeta, Diosmanta mañapusonqa kausanaykipaj. Mana qopunki chayri, qan, tukuy qampata kajkunasnintin wañunkichejpuni.

⁸Q'ayantintaj Abimelecqa tutamanta jatariytawan, tukuy kamachisninta wajyarqa, willarqataj chay tukuy imasta. Chayta uyarispataj tukuyninku mayta mancharikorqanku.

⁹Chaymanta Abimelecqa Abrahamtañataj wajyacherqa, nerqataj: Imatataj kayta ruwawaykurí, imachus mana allin kajtari? Ima sajratataj qampa ruwarqaniri, imapajtaj chay chhikan jatun juchata apamuwankiri, jinallataj runasniypajpisri? Kayta qan ruwawanki imatachus mana ruwanaykita.

¹⁰Imatataj yuyasharqanki kayta ajinata ruwanaykipajri? Ajinata Abimelecqa Abrahamman nerqa.

¹¹Chanta Abraham kuticherqa: Noqa yuyarqani qankuna Diosta mana manchachikusqaykichejta, jinamanta warmiyrayku wañuchinawaykichejta.

¹²Cheqamanta payqa panaypuni kashan, tatamanta uj tatayojlla kayku, mamallamanta waj mamayoj. Chayrayku payta warmichakorqani.

¹³Maypachachus Dios, tataypa wasinmanta orqhowarqa chaymantapacha tukuynejta puriyku. Chayrayku payman nerqani maymanchá chayasun chaypi qanqa niwanki noqa turayki kasqayta, nispa.

¹⁴Ajinamanta Abimelecqa Sarata qosan Abrahamman qoporqa. Chanta waqellarqataj ovejasta, qhari kamachista, warmi kamachista ima.

¹⁵Nerqataj: Qhawariy, ñaupaqeykipi jallp'aypis kashan. Ajllakuy maynejtachá munasqaykita, chaypi tiyakunaykipaj.

¹⁶Abimelecqa Saramanñataj nerqa: Turaykiman qoni chayqa valen waranqa qolqe, chay kanqa qan allin warmi kasqaykita yachanankupaj, pikunachus qampa ñaupaqeykipi kashanku chaykuna. Mana pipis ima sajrata rimanqachu qampaj.

¹⁷Chaymanta Abrahamqa Diosmanta mañaporqa. Diostaj thañicherqa Abimelecta, jinallataj warminta; chanta kamachisnintapis, paykuna ajinamanta wawasniyoj kanankupaj.

¹⁸Abrahampa warmin Sararayku Señorqa nisqa Abimelecpa wasimpi kaj warmis mana wawasniyoj kanankuta.