Read Quechua Bolivia DC Bible GÉNESIS 23 Bible Online

GÉNESIS 23 - Quechua Bolivia DC Bible bible

GÉNESIS 23

¹Saraqa kausarqa iskay chunka qanchisniyoj watasta.

²Pay wañuporqa Quiriat-arbapi, chayqa kashan Hebrón llajtapi, Canaán jallp'api. Abrahamqa may llakisqa mayta waqarqa warmin Sara wañupojtin.

³Chaymantaqa wañusqata saqespa rerqa Hetpa wawasninwan parlaj, kay jinata:

⁴Noqaqa karu llajtayoj qankuna ukhupi tiyakuni, jinapis venderiwaychej ari uj chhikan jallp'ata, chayman warmiyta p'ampakapunaypaj.

⁵Hetpa wawasnintaj nerqanku: Wiraqochi, uyariwayku ari. Noqayku yachayku qan Diospa ajllasqan kay chaupiykupi kasqaykita. Chayrayku qanqa sumajnin cheqaman warmiykita p'ampakapuy, ni mayqenniyku nisqaykuchu, qanqa mana kayman p'ampakunaykichu, nispa.

⁷Chanta Abrahamqa sayaykuytawan chay llajtayoj hititasman k'umuykorqa, nispa: Cheqamanta qankunaqa munankichej kaypi warmiyta p'ampakapunayta chayqa, nipuwaychej ari Zoharpa wawan Efronta, vendenawanta Macpela cuevata, mayqenchus kashan jallp'asnimpa cantosnimpi chayta. Noqa qopusaj chay cuevaj valesqanta, ajinamanta noqajtapuni kanampaj chay sepultura kay llajtapi.

¹⁰Hitita Efronqa chay runas ukhullapi kasharqa. Nerqapachataj Abrahamman tukuy ayllusnin uyarishajtin, jinallataj llajta punkuta yaykumojkunaj uyarinankuta, nispa: Mana, wiraqochíy, uyariway: Qhasilla qosqayki chay jallp'ata, maypichus cueva kashan chayta. Tukuy ayllusniy uyariwajkuna yachachunku qhasilla qosusqayta. Chayman warmiykita p'ampakapuy.

¹²Abraham ujtawan chay llajtayojkunaman k'umuykuspa, Efronman tukuy uyarishajtin nillarqataj: Uyarillaway ari. Jap'ikapullay qolqeta chay jallp'aj valesqanta, chayman tukuy sonqo wañusqayta p'ampakapusaj.

¹⁴Efrontaj kuticherqa: Mana wiraqochíy, uyarillaway jallp'aqa valen tawa pachaj qolqe. Imataj chay qolqe kanqa iskayninchejpajrí? Qanqa chayman rispa warmiykita p'ampakampullay.

¹⁶Abrahamqa chay qolqeta Efronman jaywarqapacha hititas rikushajtinku pay jinata nejtinkama, chayta qorqa qolqe ch'uyata makipura, tawa pachaj qolqeta.

¹⁷Jinamanta Efrompa jallp'anqa Abrahampa makinman chayarqa. Chaytaj karqa Macpelapi, Mamrej inti llojsimuyninnejpi, maypichus sach'asniyoj jallp'a cuevayoj karqa, chay.

¹⁸Ajinata chay jallp'ata Abrahamqa rantikaporqa. Chayta yacharqanku tukuy hititas, jinallataj llajta punkunta yaykoj llojsejkunapis.

¹⁹Chaymanta Abrahamqa warminta p'ampakamporqa Macpela jallp'api cuevaman, Mamrej inti llojsimuyninnejpi. Chay cheqaqa may rejsisqa karqa Hebrón sutiwan Canaán jallp'api.

²⁰Ajinamanta Abrahamqa chay jallp'ayoj karqa, cuevayojtaj; mayqentachus hititas venderqanku aya p'ampanapaj.