Read Quechua Bolivia DC Bible GÉNESIS 25 Bible Online

GÉNESIS 25 - Quechua Bolivia DC Bible bible

GÉNESIS 25

¹Abrahamqa ujtawan casarallarqataj, chay warmimpa sutintaj karqa Cetura.

²Abrahampa wawasnin Ceturapi karqanku: Zimran, Jocsán, Medán, Madián, Isbac, Suawan.

³Jocsampa wawasnin karqanku Sebawan, Dedanwan. Dedampa miraykunasnintaj karqanku: Asureos, letuseos, leumeos ima.

⁴Madiampa wawasnintaj karqanku: Efa, Efer, Hanoc, Abida, Eldawan. Kay tukuy karqanku Ceturaj miraynin.

⁵Abrahamtaj wawan Isaacman tukuy kapuyninta qoporqa.

⁶Jinamanta Abrahamqa wakin warmisnimpi wawasninman pisi imasllata jaywararqa. Chaymantaqa kausashaspallaraj Isaacmanta chay wakin wawasninta t'aqaspa inti llojsimuynejman kacharqa.

⁷Abrahamqa tukuynimpi kausarqa pachaj qanchis chunka phishqayoj watasta.

⁸Abrahamqa wañuporqa allin wañuypi, allin machuña, ashkha watasniyojtaj. Ajinamanta ñaupa tatasninman riporqa.

⁹Wawasnin, Isaac, Ismaelwan p'amparqanku Macpela chhanka jusk'upi; chayqa kashan Mamremanta inti llojsimuynejpi, hitita Zoharpa wawan Efrompa jallp'ampi.

¹⁰Chay jallp'ata Abraham rantikorqa hititasmanta. Abrahamta p'amparqanku warmin Sara p'ampasqa kasharqa chaypi.

¹¹Abraham wañupusqanmanta qhepata Dios bendicerqa Abrahampa wawan Isaacta; pay tiyakorqa, “Pichus kausaj rikuwan”, nisqa pujyoj qayllampi.

¹²Kaykuna kanku Abrahampa wawan Ismaelpa wawasnin, pichus karqa egipcia Agarpa wawan, Saraj kamachimpata.

¹³Chaykunaqa nacesqankuman jina kanku: Ismaelpa kuraj kaj wawanqa: Nebaiot, chanta kallarqankutaj Cedar, Adbeel, Mibsam, Misma, Duma, Massa, Hadar, Tema, Jetur, Nafis, Cedemawan.

¹⁶Chaykuna kanku chunka iskayniyoj sutis Ismaelpa wawasnimpata. Jallp'asninkupis kikin sutisninkuwan sutichasqas karqanku, jinallataj toldosninkupis. Sapa ujninku kurajkunas karqanku t'aqankupikama.

¹⁷Ismaelqa pachaj qanchis chunka qanchisniyoj watasniyoj wañuporqa, jinamanta ñaupa tatasninman riporqa.

¹⁸Miraykunasnin jamorqanku tiyakoj Havilawan Shurwan tinkuykunasman; chay kashan Egiptoj chimpampi, Asiriamanta jamunapi. Chaypi tiyakorqanku wauqesninku mana munashajtinku.

¹⁹Kaykuna kanku Abrahampa allchhisnin, Isaacpa wawasnin.

²⁰Isaacqa tawa chunka watasniyoj karqa Rebecawan casarashaspa; Rebecaqa Betuelpa wawan karqa, Labampa panantaj; paykuna arameos nisqa, paykuna tiyakorqanku Padan-arampi.

²¹Rebecaqa mana wawasniyoj kayta aterqachu; chayrayku Isaacqa Diosmanta wawata mañakorqa. Señortaj chay mañakusqanta uyarerqa; jinamanta Rebecaqa wijsayoj rikhurerqa.

²²Rebecaj wijsampi iskay wawas karqanku; takanakorqankutaj. Chayrayku nerqa: Sichus ajinallapuni kanqa chayqa, imapajtaj kausaniri?, nispa. Chaymantaqa Señorta taporqa.

²³Señortaj nerqa: Wijsaykipi iskay naciones kashan, iskay ayllus maqanakushanku manaraj naceshaspa. Ujnin kaj aswan atiyniyoj kanqa ujninmanta. Kuraj kajqa sullk'a kajpa nisqampi kanqa.

²⁴Rebecaj wachakunan p'unchay chayamorqa; pay iskayta ujllapi wachakorqa.

²⁵Ñaupajta nacej kajqa p'aqopacha, tukuy ukhun thapulla karqa, suticharqankutaj Esauta.

²⁶Ujnin kajtaj nacekorqa Esaupa chaki talonninta ujnin makinwan jap'irisqa, chayrayku suticharqanku Jacobta. Isaacqa sojta chunka watasniyojña karqa, Rebeca warmin wachakushajtin.

²⁷Wawasqa wiñarqanku. Esauqa campo runa karqa, monte animalesta sumajta jap'iyta yacharqa. Jacobtaj may lat'u runa karqa, payqa jarallapipuni tiyakuyta munaj.

²⁸Isaacqa anchata munaj mikhuyta Esaupa monte animalesta jap'isqanmanta aycha kankata, chayrayku payta astawan munakoj. Rebecataj Jacobta munakoj.

²⁹Uj kuti Jacob wayk'usharqa; Esautaj monteta risqanmanta sayk'usqa chayamuspa nerqa Jacobman: Chay puka mikhuyniykimanta uj chhikata qoriway ari, yarqhaywan wañushaniña, nispa. Chayrayku payta Edonta suticharqanku.

³¹Jacobtaj nerqa: Kuraj wawa kaspa jap'inaykita vendeway.

³²Esautaj nerqa: Qhawariy, yarqhaywan wañushaniña, ima allintaj kawanqa kuraj wawa kaspa jap'inay tiyapunawanri?

³³Jacobqa nillarqapuni, kunampacha nillayña qonawaykita, nispa. Esautaj yarqhaywan mana kayta atispa, kuraj wawa kaspa jap'inanta, nerqa qopunanta Jacobman.

³⁴Chaymantaraj Jacobqa t'antata jaywarqa, chuwismanta ruwasqa mikhunatawan. Esautaj mikhuykuspa ujyaykuspataj sayariytawan riporqa. Ajinata Esauqa kuraj kaspa jap'inanmanta mana dakorqachu.