Read Quechua Bolivia DC Bible GÉNESIS 26 Bible Online

GÉNESIS 26 - Quechua Bolivia DC Bible bible

GÉNESIS 26

¹Chaypacha manchay yarqhay karqa chay jallp'api tukuynejpi. Chaykama manaraj yarqhaykunas karqankuchu Abrahampa tiempompi. Chayrayku Isaacqa Gerarman tiyakoj riporqa, maypichus filisteospa reynin Abimelec tiyakorqa chayman.

²Chaypi Señor rikhurerqa, nerqataj: Ama riychu Egiptoman. Tiyakullay maypichus noqa nisqayki chaypi.

³Kunanraykoqa kay jallp'allapiraj tiyakushay. Noqa qanwan kasaj, bendicisqaykitaj. Qanman, mirayniykimanwan kay jallp'asta qosqaykichej. Ajinamanta junt'asaj tatayki Abrahamman imatachus qosqayki nerqani chayta.

⁴Mirayniykita ashkhata mirachisaj cielopi qoyllurkunata jina, jinaspataj paykunaman kay jallp'asta qosaj. Chantapis paykunanejta tukuy naciones kay mundopi bendicisqas kanqanku, imaraykuchus Abrahamqa kasuwan, junt'antaj kamachisqasniyta, leyesniyta, kamachisqasniytawan.

⁶Jinamanta Isaacqa Gerarpi qhepakorqa.

⁷Chay cheqaspi tiyakojkunataj warminmanta taporqanku; paytaj nerqa: Panay, nispa. Imaraykuchus manchachikorqa warmiy, niyta, yuyaspa warmin Rebecarayku wañuchinankuta. Rebecaqa alajita karqa.

⁸Chay qhepata unaytaña tiyakusqankumanta, uj kuti filisteospa reynin Abimelec wasi ventanamanta qhawarqa; rikorqataj Isaacqa warmin Rebecata lulushajta.

⁹Chaymantaqa wajyachimuspa nerqa: A…já, chay warmeqa, warmiykipunichu, manachu? Imaraykutaj qan niwanki panayki kasqantarí? Isaactaj kuticherqa: Yuyarqani payrayku wañuchinawaykichejta, nispa.

¹⁰Abimelectaj nerqa: Imaraykutaj kayta ruwawaykurí? Uj chhicamanta mana llajtamanta mayqen qharillapis mana puñuykunkuchu warmiykiwan; qanqa ajinamanta juchallichiwaykuman karqa.

¹¹Chaymantaña Abimelecqa kamacherqa tukuy runasninman: Pichus kay runata, chayri warminta t'ojpejqa wañonqa, nispa.

¹²Chay wata Isaacqa chay jallp'api tarporqa, sumajtataj poqocherqa, imaraykuchus Señora payta bendicerqa.

¹³Jinamanta payqa tukuy imasniyoj canankama maytapuni qhapajyaykorqa.

¹⁴Tiyaporqa ashkha ovejasnin, ashkha wakasnin, jinallataj michejkunasnimpis. Chaymanta filisteos maytapuni chhoqoykukorqanku.

¹⁵Tatan Abraham kausashaspa chaynejpi, kamachisninwan yaku pujyusta jusk'ucherqa, chaykunamampis filisteosqa tarpurarqanku, wakintataj jallp'awan junt'aracherqanku.

¹⁶Abimelectaj Isaacman nerqa: Ripuy kaymanta, qanqa anchataña qhapajyanki, noqaykumantapis astawanña.

¹⁷Jinamanta Isaacqa riporqa chaynejmanta Gerar valleman, chaypitaj jarakorqa tiyakunampaj.

¹⁸Chaypi yaku pujyusta ujtawan jusk'uchillarqataj, tatan Abraham chaynejpi tiyakushaspa jusk'ucherqa chaykunata, mayqenkunatachus filisteos p'ampararqanku wañupusqanmanta qhepaman. Sutisnintapis sutichararqa tatan ima nispachus suticharqa chayllawantaj.

¹⁹Uj kutitaj Isaacpa kamachisnin uj pujyuta allashaspa tarerqanku phullchimushaj yakuta.

²⁰Chayta rikuspataj Gerarmanta michejkuna Isaacpa ovejerosninwan maqanakorqanku, noqaykojta chay yakoqa, nispa. Chayrayku Isaacqa chay pujyuta suticharqa, maqanaku, nispa.

²¹Kamachisnenqa waj pujyutañataj jusk'orqanku, chay patapipis maqanakullarqankutaj; chayrayku chaytaqa Isaac suticharqa, chejninaku, nispa.

²²Isaacqa chay cheqamanta karunejman rispa waj pujyutañataj allacherqa. Chaypeqa manaña maqanakorqankuchu; chayrayku chay pujyuta suticharqa, allimpi kausay, nispa. Kunanqa Señor saqewanchej allimpi, chayrayku tukuy imapi ñaupajman rinanchej tiyan, nispa nerqa.

²³Chaymanta Isaacqa wicharerqa Beersebaman.

²⁴Chay ch'isi Señorqa rikhurerqa, nerqataj: Noqa kani tatayki Abrahampa Diosnin. Ama manchachikuychu, noqa qanwan kashani. Kamachiy Abrahamrayku bendicisqayki, mirayniykitapis ashkhayachisaj.

²⁵Isaacqa jaqaypi uj altarta ruwarqa, chaypi mañakunampaj Señorpa sutimpi. Chaynejpi jarakuspa toldota sayachikorqa, kamachisnimpis uj yaku pujyuta allachillarqataj.

²⁶Uj kuti Abimelecqa Gerarmanta jamorqa Isaacwan parlaj Paywantaj jamorqanku kausaqen Ahuzarwan, soldadosta kamachej Ficolwan ima.

²⁷Isaacqa paykunaman nerqa: Qankuna chejnikushawaspa, jallp'asniykichejmantapis qharqomushawaspa, imamanta taripaj jamuwankichejri?

²⁸Paykunataj kuticherqanku: Noqayku rikuyku qanwan Señor kasqanta, chayrayku noqayku munayku qanwan uj tratota ruwayta. Chay tratoqa kay jina kanqa:

²⁹Qan ama ima sajratapis ruwawasqaykuchu, noqaykoqa mana qanta imanarqaykuchu. Astawanqa qampaj allinta ruwarqayku, kachamporqayku k'achamanta, chayman jinataj qanqa Señorpaj allin qhawasqa kanki.

³⁰Chaymanta Isaacqa sumaj mikhuykunata wayk'ucherqa, jinaspata mikhorqanku, ujyarqankutaj.

³¹Q'ayantintaj tutamanta jatariytawan tratota ruwarqanku purajmanta. Jinaspataj Isaacqa paykunata kacharpayarqa, tinkunakama, nispa; jinallataj paykunapis, ripusqayku nerqanku tukuy sonqo kausaqesnin jina.

³²Chay kikin p'unchayllataj Isaacpa kamachisnin jamorqanku willaj, yakuta tarisqankuta chay allasharqanku chay pujyupi.

³³Isaactaj chay pujyuta suticharqa, Seba, nispa. Chayrayku chay llajtaqa kunankama Beerseba nisqa kashan.

³⁴Chaypacha Esauqa tawa chunka watasniyojña karqa. Casararqataj heteo Beerej ususin Juditwan. Chanta casarallarqataj ujnin heteo Elompa ususin Basematwan.

³⁵Chay iskay warmis Isaacta Rebecatawan mayta phiñachej kanku.