Read Quechua Bolivia DC Bible GÉNESIS 29 Bible Online

GÉNESIS 29 - Quechua Bolivia DC Bible bible

GÉNESIS 29

¹Chaymanta Jacob rillarqapuni inti llojsimuynejpi tiyakojkunaj jallp'ankuman.

²Chaynejpi rikorqa uj pujyuta, chay qayllaspitaj kinsa t'aqa ovejas puñurashajta, imaraykuchus chaymanta tukuy uywas yakuta ujyaj kanku. Chay pujyoj simintaj uj rumiwan kirpasqa karqa.

³Tukuy uywas tantakamojtinkutaj tukuy michejkuna chay rumita kirparaj kanku, yakuta uywasman ujyachinankupaj; chaymantataj kirpaykapullaj kanku chay rumiwan.

⁴Jacobtaj chayman qayllaykuspa michejkunata taporqa: Wauqesníy, maymanta kankichejri? Paykunataj kuticherqanku: Haranmanta kayku, nispa.

⁵Jacob tapullarqataj: Rejsinkichejchu Nacorpa wawan Labanta? Paykunataj: Arí, rejsiyku, nerqanku.

⁶Jacob tapullarqataj: Walejllachu kakushan?, nispa. Paykunataj: Arí, walejlla kakushan, nerqanku. Qhawariy jaqayqa ususin Raquel ovejasninta qhatimushan, nispa.

⁷Chanta Jacob nerqa: P'unchayllaraj, manaraj ovejasta wisq'ana horasrajchu. Manachu yakuta ujyaykuchiytawan michimuwajchejraj?

⁸Paykunataj nerqanku: Mana chayta ruwaykumanchu. Noqaykoqa suyanayku tiyan tukuynejmanta uywas tantakamunanta. Chaymantaraj tukuy michejkuna ujllapi kay pujyuta kirparasqayku, ovejasman yakuta ujyachinaykupaj.

⁹Paykunawan parlashanankukamataj, Raquelqa tatampa ovejasnin qhatirisqa chayamorqa, imaraykuchus payllapuni chay ovejastaqa michej.

¹⁰Jacobtaj tion Labampa ovejasninwan jamusqanta yachaytawan, pujyuman qayllaykuytawan chay rumita tanqarpayarqa, ovejasmantaj yakuta ujyaracherqa.

¹¹Chaymantataj Jacobqa Raquelta napaykuspa, waqarikuspataj much'aykorqa.

¹²Raquelmantaj payqa willakorqa, Rebecaj wawan kasqanta, Labampa sobrinon. Raqueltaj kachaykukorqa imachus kasqanta tatanman willaj.

¹³Labantaj Jacobmanta parlajta uyariytawan, panampa wawan kasqanta yachaytawan, usqhay usqhayta kachaykukorqa taripaj. Taripaytawantaj ujllaykuspa much'aykorqa, jinaspataj wasinman pusarqa. Chaypi Jacobqa willarqa tukuy ima kausayninkupi kasqanmanta.

¹⁴Labantaj nerqa: Cheqamanta qanqa kikin yawarniymanta, kikin tulluymantataj kanki. Jacobqa uj killata Labanwan tiyakorqa.

¹⁵Chay qhepamantaj Labanqa nerqa: Qanqa mana qhasillamanta llank'awajchu aylluy kasqaykirayku. Niway mashkhatachus pagasunayta.

¹⁶Labanqa iskay warmi wawasniyoj karqa: Kuraj kajqa Lea, sullk'a kajtaj Raquel karqa.

¹⁷Leaj ñawisnenqa mana as allinchu karqa; Raqueltaj may k'achita karqa.

¹⁸Jacobqa Raquelta munapayarqa, chayrayku nerqa: Sullk'a wawayki Raquelrayku qanchis watata llank'apusqayki, nispa.

¹⁹Labantaj kuticherqa: Arí, allin kanman qanman qopunay, waj runaman qonaytaqa. Jina kajtenqa noqawan tiyakunallaña.

²⁰Jinamanta Jacobqa Labampaj llank'aporqa qanchis watata Raquel ususinrayku; jinapis paymanqa rijch'arqa pisi tiempo, imaraykuchus anchata munakorqa.

²¹Qanchis wata junt'akojtintaj, Jacobqa Labanman nerqa: Kunanqa qopullawayña ususiykita casarakunaypaj, ñapis junt'aykiña qanchis watata llank'apusqayki nisusqayta payrayku.

²²Labantaj tukuy chay llajtayoj runasta wajyacherqa casamientota ruwachinampaj.

²³Ch'isintaj Labanqa Jacobman entregarqa Leata, Jacobtaj paywan puñorqa.

²⁴Jinaspataj Labanqa uj kamachintawan qorqa, Leaj kamachin kanampaj, sutintaj Zilpa karqa.

²⁵Jacobtaj q'ayantinraj reparakorqa Leallawan puñusqanta; chayraykutaj Labanman nerqa: Imatataj kayta ruwawankiri? Manachu Raquelrayku llank'aporqayki? Imaraykutaj kay jinata ch'aukiyawankiri?

²⁶Labantaj kuticherqa: Kaypeqa mana usuchu sullk'a kajraj casaranan, ñaupajtaqa kuraj kajraj casaranan tiyan, chaymantaraj sullk'aqa.

²⁷Leawan casarasqayki semanataraj junt'ay, chaymanta Raqueltapis entregallasqaykutaj, sichus qan uj qanchis watatawan noqawan llank'anki chayqa.

²⁸Jacobqa nerqa uj jinatawan llank'ananta. Leawan casarasqanku semanata junt'ajtintaj Labanqa Raqueltañataj warmimpaj entregarqa.

²⁹Labanqa Raquelman qollarqataj uj kamachinta Raquelta yanapanampaj, sutintaj karqa Bilha.

³⁰Ajinamanta Jacobqa casarallarqataj Raquelwan, payta munakorqa astawan Leamanta nisqaqa. Jinamanta Labampaj qanchis watatawan llank'aporqa.

³¹Señor rikorqa Jacobqa Leata mana munakusqanta, chayrayku nerqa Lea wawasniyoj kananta, Raqueltaj mana wawasniyoj.

³²Leaqa wijsayoj rikhurerqa Jacobpaj, nacejtintaj suticharqa Rubenta, Señor rikuwan llakisqa kasqayta. Chayrayku qosayqa kunan munakuwanqapuni, nispa.

³³Chaymanta qhepata Leaqa wawayojllataj karqa, Chaytaqa suticharqa Simeonta, Señorniy yachan chejnisqa kasqayta, chayrayku uj wawatawan qowan, nispa.

³⁴Chay qhepata Leaqa wawayojllataj karqa, chaytataj suticharqa Levita. Kunan qosayqa noqamampuni k'askakamuwanqa astawan, ñapis kinsa wawastaña paypaj rejsini, nispa.

³⁵Aswan qhepaman Leaqa wawayojllataj karqa, suticharqataj Judata. Chaymantataj nerqa: Kunanqa Señorta yupaychasaj, nispa. Chaymantaqa alqarqa wawayoj kayta.