Read Quechua Bolivia DC Bible GÉNESIS 3 Bible Online

GÉNESIS 3 - Quechua Bolivia DC Bible bible

GÉNESIS 3

¹Katareqa may jina yuyaysapa karqa, Señor Dios tukuy monte animalesmanta ruwasqasninmanta nisqaqa. Pay warmita taporqa: Ajinatachu Diosqa nisunkichej huertapi kaj tukuynin sach'aspa poqoyninta ama mikhunkichejchu?, nispa.

²Warmitaj kuticherqa: Atiyku mikhuyta tukuynin sach'aspa poqoyninta.

³Huerta chaupipi kaj sach'allamanta Diosqa niwayku amapuni mikhunaykuta, ni llujchirinallaykutapis. Chaymanta mikhunkichej chayqa, wañunkichej, niwayku.

⁴Kataritaj nerqa warmiman: Chayqa mana cheqanchu, mana wañunkichejchu.

⁵Dios yachan allinta, maypachachus chay sach'aj poqoyninta mikhojtiykichej sumaj yachayniyojman tukunaykichejta. Ajinamanta chaywan qankunaqa Dios jina kankichej, yachankichejtaj imachus allin kajta mana allin kajtapis.

⁶Warmitaj sach'ata qhawarerqa mikhunapaj jina moq'eyta. Jinallataj chayta mikhuykuspa imatapis yachanapaj jina. Ujnin poqoyninta p'itispataj mikhuykorqa; qosanmampis jaywarqa, paypis mikhuykullarqataj.

⁷Kikimpachataj ñawisninku kicharikorqa, reparakorqankutaj q'alaslla kashasqankuta. Kikimpachataj higos laqhesmanta p'achasta sirakorqanku, chaywantaj mayt'ukorqanku.

⁸Qhareqa warminwan uyarerqanku Señor Diospa purisqanta, ch'isiyay wayra wayrapi huerta ukhupi kayman jaqayman purishajta. Paykunataj usqhay usqhayta huerta ukhupi pakaykukorqanku sach'as ukhuman.

⁹Señor Diosqa qharita wajyarqa: Maypitaj kashanki?, nispa.

¹⁰Qharitaj kuticherqa: Uyarerqayki huerta ukhupi purishajta, manchachikorqayki q'alalla kaspa, chayrayku pakaykukorqani.

¹¹Diostaj taporqa: Pitaj nisunki q'alalla kasqaykitari? Kay sach'aj poqoyninta amapuni mikhunkichu, nisqaytachu mikhorqanki?, nispa.

¹²Qharitaj kuticherqa: Qampa qowasqayki warmeqa chay sach'aj poqoyninta qowarqa, noqataj mikhuykorqani.

¹³Señor Diostaj warmita taporqa: Imatataj ruwarqankiri? Paytaj kuticherqa: Katari ch'aukiyawan, chayrayku mikhorqani chay sach'aj poqoyninta.

¹⁴Señor Diostaj nerqa katariman: Kayta ruwasqaykirayku kunanqa maldicisqa kanki tukuy uyaspa, tukuy monte animalespa chaupimpiwan. Kunanmanta jaqaymanqa qhatatakuspa purinki, jallp'atataj mikhunki tukuy kausayniykipi.

¹⁵Qantawan warmitawan chejninachisqaykichej. Jinallataj mirayniykiwan mirayninwampis chejninakonqanku. Miraynin umaykita saronqa, qantaj chaki talonninmanta khaninki.

¹⁶Warmimantaj nerqa: Nanayniykita aswan ashkhata yapasaj onqoj kashajtiyki, nanaywantaj onqokunki wawasniykita. Munasqaykitaj qosaykiman apasonqa, paytaj qanta kamachisonqa.

¹⁷Qharimantaj nerqa: Warmiykita kasusqaykirayku, chay sach'aj poqoyninta amapuni mikhunkichu mikhuspa nerqani chayta, kunanqa jallp'a maldicisqa kanqa; ancha ñak'ariywantaj poqochinki mikhunaykipaj tukuy kausayniykipi.

¹⁸Jallp'aqa wiñachipusonqa khishkasta, tukuy sajra qhorastawan; qantaj qhasi qhoraspa poqoyninta mikhunki.

¹⁹Jump'i suruyta llank'anki mikhunaykipaj ñut'u jallp'aman tukunaykikama; imaraykuchus jallp'amanta ruwasqa kanki, jallp'a kanki, jallp'amantaj kutinki.

²⁰Qhareqa warminta suticharqa Evata, imaraykuchus pay karqa tukuy kausajkunaj maman.

²¹Señor Diosqa p'achasta ruwaporqa animalespa qarasninmanta qhari warmipaj, jinaspataj paykunaman p'achallicherqa.

²²Nerqataj: Runaqa ujninchej jina kunanqa, yachan allin kajta, mana allin kajtapis. Kunanqa ama makinta oqharillachuntajchu, kausay sach'aj poqoyninta orqhospa mikhuykuspataj wiñaypaj kausanampaj.

²³Chayrayku Señor Diosqa runata Edén huertamanta qharqorqa; churarqataj jallp'ata llank'anampaj, mayqenmantachus ruwasqa karqa chayta.

²⁴Ajinata runataqa jawaman qharqorqa. Querubinestataj sayaricherqa Edén huertaj inti llojsimuyninnejman, uj larwashaj espadatawan, muyuyninta muyushajta, jark'anampaj amapuni pipis kausayta qoj sach'aman qayllaykunampaj.