Read Quechua Bolivia DC Bible GÉNESIS 30 Bible Online

GÉNESIS 30 - Quechua Bolivia DC Bible bible

GÉNESIS 30

¹Raquelqa Jacobpaj mana wawayoj kayta atispa, ñañan Leata chejnikorqa, nerqataj qosan Jacobman: Wawasta qoway, manachayqa wañusaj, nispa.

²Jacobtaj phiñarikuspa payman nerqa: Noqaqa Dioschu kani? Pay ari mana munanchu mana wawayoj kanaykita.

³Paytaj nerqa: Qhaway, kamachiy Bilhawan kay, paywan puñuy. Wawasniyoj kanqa chayqa, noqapis wawasniyoj kayman jina kasaj. Ajinamanta noqaqa wawasniyoj kasaj.

⁴Ajinata Raquelqa qosan Jacobman kamachin Bilhata qorqa paypa warmisan kanampaj. Jacobtaj chaywan karqa.

⁵Jinamanta Bilhaqa Jacobpaj wawasniyoj karqa.

⁶Chaymanta Raquelqa nerqa: Dios uyariwan mañakusqayta, cheqan kajtataj ruwapuwan wawata qowaspa, chayrayku sutin kanqa Dan.

⁷Chay qhepata Bilha wawayojllataj karqa Jacobpaj.

⁸Raquelqa nerqa: Ñañaypa contranta maqanakuni, atipanitaj; chayrayku kay wawaj sutenqa kanqa Neftalí.

⁹Leapis manaña wawayoj kaspa, kamachin Zilpata Jacobman qorqa warmisan kanampaj.

¹⁰Zilpa Jacobpaj wawayoj kajtintaj, Leaqa nerqa: Suerte kayqa! Chayrayku wawaj sutenqa kanqa Gad, nispa.

¹²Chay qhepata Zilpaqa wawayojllataj karqa Jacobpaj.

¹³Leataj nerqa: Kayqa kusiy noqapajqa! Kunanqa warmis niwanqanku kusiyniyoj kasqayta; chayrayku wawaj sutenqa kanqa Aser.

¹⁴Uj kuti Rubenqa campoman rerqa trigo oqhariy tiempota. Chaypi tarerqa mandrágoras nisqa sumachaj poqoyta, jinaspataj maman Leaman aparqa. Raqueltaj chay poqoyta rikuspa Leaman nerqa: Ay, ama jinachu kay, wawaykej apamusqan wakin mandragorasta qoriway ari, nispa.

¹⁵Leataj nerqa: Qampajqa pisichu qosayta qhechuwasqaykeqa? Kunanqa wawaypa apampuwasqan mandragorastawanchu qhechuyta munashawanki? Raqueltaj nerqa: Mandragoraspa cuentanmanta kunan ch'isi Jacob qanwan puñonqa.

¹⁶Ch'isintaj campomanta Jacob kutimushajtin, Leaqa taripamuspa nerqa: Kunan ch'isi noqawan puñunki, wawaypa apampuwasqan mandragoraswan Raquelmanta mañakuyki noqawan puñunaykipaj. Chay ch'isitaj Leawan Jacobqa puñorqa.

¹⁷Jinamanta Leaqa Jacabpaj phishqa kaj wawayoj karqa, imaraykuchus Dios uyarerqa mañakusqanta.

¹⁸Leaqa nerqa: Dios kay t'inkata qowan, imaraykuchus qosayman qorqani kamachiyta; chayrayku kay wawaypa sutenqa kanqa Isacar.

¹⁹Chay qhepata Leaqa wawayojllataj karqa, chaywanqa sojtaña karqa wawasnin Jacobpaj; nerqataj payqa: Dios qowan sumaj t'inkata. Kunanqa qosay astawampuni munakuwanqa, imaraykuchus paypajqa sojta wawayojña kani. Chayrayku kay wawaypa sutenqa kanqa Zabulón.

²¹Chaymanta Leaqa uj warmi wawatañataj rejserqa, suticharqataj Dinata.

²²Diosqa Raquelmanta yuyarikorqa; uyarerqataj mañakusqanta, nerqataj wawasniyoj kananta.

²³Ña wawayojña kaspataj nerqa: Dios qhechuwan mana wawayoj kay p'enqayniyta.

²⁴Pay munachun ari ujtawan wawayoj kanayta, nispa. Chaypacha wawanta Joseta suticharqa.

²⁵Raquelqa Joseta nacechikusqanmanta qhepaman, Jacobqa Labanman nerqa: Saqeway llajtayman kutipojta.

²⁶Qopuway wawasniyta, warmisniytawan; paykunarayku qampaj llank'apuyki, chayrayku niway ripunayta. Qan yachanki may jinatachus llank'apususqayta.

²⁷Labantaj kuticherqa: Ama ripuychu ari, kakullay. Noqa yachani qanrayku Señorqa bendiciwasqanta.

²⁸Niway mashkhatachus ganayta munasqaykita, pagapusqaykitaj.

²⁹Jacobtaj nerqa: Qan allinta yachanki imaynatachus llank'apususqayta, uywasniykitapis imaynatachus qhawapususqayta.

³⁰Manaraj kayman chayamushajteyqa pisilla tiyapusorqa, kunantaj ashkhaña tiyapusunki. Chayamusqaymantapacha Señorqa ashkhata qosunki. Kunanqa mayk'ajkamataj mana familiasniypaj llank'akusajchuri?

³¹Labanqa taporqa: Mashkhatapunitaj pagapunayta munankiri?, nispa. Jacobtaj nerqa: Ama imatapis pagawaychu qan munanki chayqa, ovejasniykita qhawapullasqaykipuni.

³²Saqeway tukuy uywasniykej chaupisninta puriykachajta, ajllakunaypaj ovejasniykimanta, cabrasniykimantawan ch'ejchisninta, yanasninta, alqasninta ima. Chaykuna llank'apususqaymanta pagoy kanqa.

³³Ajinamanta mayk'ajpis qhawaripuwanki, imaynatachus qanmanta ganakususqayta, qan yachanki imaynatachus pagawasqaykita Sichus uywasniy ukhupi kanqanku mana ch'ejchis, yanas, sañis chayqa, qan niwanki suwasusqayta.

³⁴Labantaj nerqa: Walejpacha, ruwallay qampa nisqaykiman jina.

³⁵Labantaj chay kikimpacha t'aqararqa cabrasta, ovejasta, ch'ijchisninta, alqasninta, yanasninta, sañisninta; jinaspataj wawasninman michicherqa.

³⁶Chaymantaqa chay uywasninwan Labanqa kinsa p'unchay puriyta jina rerqa, maypichus Jacob kasharqa chaymanta. Chaykamataj Jacobqa Labampa t'aqapusqan uywasninta michisharqa.

³⁷Chaymanta Jacobqa q'omer sach'aspa ramasninta k'uturarqa: Alamosta, almendrosta, castañostawan; qarasnintataj t'ijpararqa yuraj alqas rikukunampaj.

³⁸Chay t'ijpasqa qarasnintataj uywaspa ñaupaqenman churararqa, yaku larq'asman, maymanchus uywas yakuta ujyaj jamoj kanku chayman, maypichus ovejas, cabras turukoj kanku yakuta ujyaj jamuspa.

³⁹Ajinamanta ovejasqa chichuyaraj kanku chay qaran laymasqa k'aspispa ñaupaqempi. Jinamanta ovejas cabras uñachararqanku ch'ejchista, yanasta, sañista ima.

⁴⁰Chay qhepatataj Jacobqa t'aqakaporqa tukuy yanasta, paypa t'aqantawan khuska. Ajinata payqa t'aqakaporqa wajman uywasninta, manaña juntucharqachu Labampa uywasninwan.

⁴¹Sapa kuti Jacobqa churaj wira kajkunata uywas jamojtin chay k'aspita chajrukushajtinku yakuta ujyaj kanku chayman, ajinamanta uñas kanampaj.

⁴²Tukuy uywas tulluslla kajkunamanri mana chay k'aspista churajchu. Chay tulluslla kajkunaqa Labampaj karqa, allin wirasnin kajkunataj Jacobpaj karqa.

⁴³Ajinamanta Jacobqa maytapuni qhapajyaykorqa: tiyaporqa ashkha ovejasnin, qhari kamachis, warmi kamachisnin, camellosnin, burrosnin, ima.