Read Quechua Bolivia DC Bible GÉNESIS 4 Bible Online

GÉNESIS 4 - Quechua Bolivia DC Bible bible

GÉNESIS 4

¹Evaqa wijsayoj rikhurerqa qosan Adampaj. Onqokorqataj Cainta, nerqataj: Tiyapuwan uj qhari wawa, kaytaqa Señor qowan.

²Chay qhepaman onqokullarqataj Caimpa wauqen Abeltañataj. Abelqa ovejasta michej, Caintaj jallp'ata llank'aj.

³Qhepamantaj Caenqa uj p'unchay jaywanata Señorman aparqa llank'aspa poqochisqasninmanta.

⁴Abelpis apallarqataj Señorman jaywanata ovejasninmanta uj sumajnin kajta, kuraj kaj uñasmanta. Señortaj may kusisqa Abelta qhawarerqa, jinallatataj oveja apasqan jaywanantapis.

⁵Caintari mana jinatachu qhawarerqa, nillataj jaywanantapis. Chaymanta Caenqa maytapuni phiñarikorqa, uyampis uj jinayarqa.

⁶Señortaj nerqa: Imaraykutaj jinata phiñakunkiri, uyaykipis uj jinayanri?

⁷Sichus allinta ruwawaj chayqa, mana jina uyayojchu kawaj. Qanqa mana allintachu ruwanki, chayrayku juchaqa atipaytaña munashasunki. Manachus jina kawaj chayqa, juchata atipawaj.

⁸Uj kuti Caenqa Abelta pusarqa, jaku campoman, nispa. Chay campopi kashaspataj, Caenqa wauqen Abelta maqayta qallarerqa wañuchinankama.

⁹Señortaj Cainta taporqa: Maytaj wauqeyki Abelri?, nispa. Paytaj kuticherqa: Mana yachanichu. Noqachu wauqey Abelta qhawanay karqa imatajri?

¹⁰Diostaj nerqa: Imanarqankitajri? Wauqeykej yawarninta jich'asqaykeqa jallp'amantapacha qhaparimushawan.

¹¹Chayrayku qanqa maldicisqa kanki, wijch'usqataj kanki kay jallp'amanta, mayqenchus wauqeykej yawarninta upiykun, wauqeykita wañuchisqaykej yawarninta.

¹²Kunanqa llank'ashajtiykipis jallp'aqa manaña poqosqanta jinachu poqonqa. Qanqa mundontimpi muyuskiri kanki, mana jayk'aj samarikuyta tarejtaj.

¹³Caintaj Señorman kuticherqa: Noqapaj kayqa ancha jatun jasut'i.

¹⁴Kunan qanqa qharqowanki kay jallp'amanta. Puriskiri kamusaj mundontimpi qanmanta karupi, ni jayk'aj samarikuyta tarispataj. Pipis taripaspaqa wañuchillawanqachari.

¹⁵Señortaj chayman kuticherqa: Pipis qanta wañuchejqa qanchis kutita jasut'isqa kanqa. Chaymantataj Señorqa Cainman uj señalta churarqa, pipis taripaytawan ama wañuchinampaj.

¹⁶Caenqa Señormanta t'aqakuspa riporqa. Tiyakorqataj Nod jallp'api, Edenmanta inti llojsimuyninnejpi.

¹⁷Caimpa warmin, wijsayoj rikhurerqa, onqokorqataj wawan Enocta. Chaymanta Caenqa uj llajtata sayacherqa. Chay llajtata suticharqa wawan Enocpa sutinwan.

¹⁸Enocqa karqa Iradpa tatan, Iradtaj karqa Mehujaelpa tatan. Mehujaeltaj Metusaelpa tatan karqa, Metusaeltaj Lamecpa tatan.

¹⁹Lamecqa iskay warmisniyoj karqa. Ujnin kajpata Ada sutin karqa, ujnin kajpatataj Zila.

²⁰Adaj wawan karqa Jabal, chaypa wawasnintaj karqanku toldospi tiyakojkuna, uywasta uywajkuna.

²¹Wauqenqa Jubal karqa, chaypa wawasnin karqanku arpata, qenatawan tocajkuna.

²²Zilapis wawayojllataj karqa, sutintaj karqa Tubalcaín. Chaytaj herrero karqa, ruwaj broncemanta, fierromantawan. Tubalcaimpata panan tiyarqa, sutintaj Naama karqa.

²³Uj kuti Lamecqa nerqa warmisninman: Ada, Zila, sumajta uyariwaychej imatachus nisqayta: Warmisníy: Uj runata wañuchini wajtawasqanrayku; uj waynatataj sajmawasqanrayku.

²⁴Sichus Cainta qanchis kutita jasut'enqanku chayqa, noqataqa jasut'iwanqanku qanchis chunka qanchisniyoj kutista.

²⁵Adampa warmin ujtawan onqoj rikhurerqa. Ajinamanta uj wawan kallarqataj, suticharqankutaj Setta. Nerqataj: Dios qowan uj wawatañataj Abelpa cuentanmanta, pitachus Caín wañucherqa chaymanta.

²⁶Setpatapis wawan kallarqataj, sutin karqa Enós. Chaymantapacha qallarerqanku Diosmanta mañakuyta, Señorpa sutinta oqharispa.