Read Quechua Bolivia DC Bible GÉNESIS 42 Bible Online

GÉNESIS 42 - Quechua Bolivia DC Bible bible

GÉNESIS 42

¹Jacobqa Egiptopi trigo rantinapaj kasqanta yachaytawan, wawasninman nerqa: Imata kaypi ruwashankichej uyaykichejta qhawanakuspari?

²Willawanku Egiptopi trigo rantikunapaj kasqanta. Rispa trigota rantimuychej mikhunanchejpaj jaqaymanta, ama yarqhaywan wañunanchejpaj.

³Chaymanta Josej chunka wauqesnin Egiptoman rerqanku trigota rantikoj.

⁴Jacobqa mana munarqachu Josej sullk'an Benjamín rinanta. Pay yuyarqa imapis paywan kananta.

⁵Israelpa wawasnenqa rerqanku wajkuna risharqanku chaykunawan, imaraykuchus tukuynin Canaán jallp'apipis manapuni mikhuna karqachu.

⁶Chaypacha Joseqa Egiptopi kamachisharqa, trigotataj tukuynejmanta jamojkunaman vendesharqa. Wauqesnintaj chayaytawan ñaupaqenman qonqoriykukorqanku, pampaman umankuta chayachinankukama.

⁷Josetaj rikuytawan rejserqapacha wauqesninta, paytaj manapis rejsishanmanchu jina karqa; taporqataj paykunata manchay phiñasqa: Maymanta qankuna jamunkichej? Paykunataj, trigota rantikoj jamuyku Canaanmanta, nispa nerqanku.

⁸Joseqa rejserqa wauqesninta, paykunataj manapuni rejserqankuchu payta.

⁹Chaymantataj Joseqa yuyarikorqa paykunamanta mosqokusqasninta. Paykunamantaj nerqa: Qankuna qhawarajkuna kankichej. Qankunaqa imayna rijch'ajchus kay llajta kasqanta qhawarajlla jamunkichej?

¹⁰Paykunataj nerqanku: Manapuni wiraqochíy! Noqayku kamachisniykeqa trigota rantikojlla jamuyku.

¹¹Tukuyniyku kayku uj runaj wawasnillan. Noqaykoqa mana ima sajratapis ruwayta yachaykuchu. Manapuni jayk'ajpis qhawaraspa puriytayachaykuchu.

¹²Josetaj nerqa: Ajá manapuni, manapuni. Qankunaqa imayna rijch'ajchus kay llajta kasqanta qhawaraj jamunkichej, nispa.

¹³Paykunataj kuticherqanku: Kamachisniykeqa kayku chunka iskayniyoj wauqes, uj tatayojlla, jamushaykutaj Canaanmanta. Sullk'a kaj wauqeyku tataykuwan qhepakun, ujnin kajtaj chinkapun, mana rikhurinchu.

¹⁴Joseqa ujtawan nillarqataj: Chayta niniña. Qankunaqa qhawarajkunapuni kankichej.

¹⁵Kunanqa kaywan yachasunchej á: Noqa jurani faraompa sutimpi, kaymanta mana llojsinkichejchu, chay sullk'a kaj wauqeykichejta chayachimunaykichejkama.

¹⁶Ujnillaykichej rinkichej payta pusarimoj. Wakinniykichejtaj kaypi presos qhepakunkichej. Chaypi yachasunchej cheqatapunichus parlankichej manachus chayta, mana jina chayqa qhawarajkunapuni kankichej. Chaypaj faraonqa kayllapi kashan.

¹⁷Jinamanta paykunata enteronkuta kinsa diata carcelman wisq'acherqa.

¹⁸Chay kinsa diamantataj nerqa: Noqaqa Diosta manchachikuni. Qankunataj kayta ruwaychej, chacharipusqaykichajtaj.

¹⁹Sichus qankuna cheqan runas kankichej chayqa, ujnin wauqeykichejta carcelman saqeychej; wakintaj ripuychej, trigota apakuychej familiasniykichej mikhunankupaj.

²⁰Jinaspataj chay sullk'a wauqeykichejta pusamuwankichej, chaypi yachasunchej sichus cheqata parlankichej manachus chayta. Manachayqa wañunkichej. Paykunataj yastá nerqanku.

²¹Chanta paykuna ukhu ninakusharqanku: Cheqamanta noqanchejqa wauqenchejta mana allintachu ruwarqanchej, juchallikorqanchej. Mayta waqashajtin mana payta khuyakorqanchejchu, may jinata waqashajta rikushaspa. Chayrayku kunanqa noqanchejmanñataj kay llakiy chayamuwanchej.

²²Chaymanta Rubén paykunaman nerqa: Chayrayku noqaqa nerqaykichej ama ima sajratapis Joseta ruwanachu, nispa: qankunataj mana kasuwarqankichejchu, kunanqa yachaychej á llakiyninman chayanchej, wañuyninman chayanchej.

²³Paykunataj mana yacharqankuchu, José parlasqankuta entiendesqanta, imaraykuchus Josej egipcio parlayta parlasqanta chaypi uj runaqa hebreo parlayman tijrarqa.

²⁴Qayllankumanta ithiriytawantaj Joseqa maytapuni waqarikorqa. Kutirimuspataj paykunaj chaupinkumanta Simeonta presocharparerqa.

²⁵Chaymantataj kamachisninman nerqa: Costalesninkuman trigota junt'arachipunankuta, qolqe pagasqankutataj sapa ujpa costalesnillankumantaj churaykuspa siraykunankuta. Qoqawistataj churapunankuta ñampi mikhunankupaj. Ajinata ruwarqanku paykunapaj.

²⁶Chaymanta paykunaqa riporqanku burrosninkuman trigota chajnariykukuspa.

²⁷Chay ch'isitaj uj cheqaman chayaspa, ujnin kajqa costalninta phaskarasqa burroman trigota qorinampaj, paytaj chaypi qolqenta tarikapusqa costalampa simimpi.

²⁸Wauqesninmantaj nerqa: Qhawariychej qolqeyta kutichipuwasqanku! Kayqa kaypi kashan!, nispa. Tukuyninkutaj chayta rikuspa mayta mancharikorqanku, paykunapurataj ninakorqanku: Imatataj Dios ruwashawanchejri?, nispa.

²⁹Canaán jallp'aman chayaspataj tatanku Jacobman willarqanku imachus paykunawan kasqanta chay risqankupi, nispa:

³⁰Egiptopi kamachej wiraqocheqa may phiñasqa parlawayku, niwaykutaj llajtankuman qhawaraj risqaykuta.

³¹Noqaykutaj niyku allin runas kasqaykuta, nitaj ni jayk'aj qhawaraspa purisqaykuta;

³²chantapis chunka iskayniyoj uj runaj wawasnillan kasqaykuta; uj wauqeyku manaña noqaykuwanchu kasqanta, sullk'a kaj wauqeykutaj qanwan Canaampi qhepakusqanta.

³³Jinata nejtiykutaj niwayku: Ajá, kaypi yachasaj qankuna allin runas kasqaykichejta. Kayman saqeychej ujnin wauqeykichejta, qankunataj ripuychej, trigotawan apaychej familiasniykichej mikhunankupaj; qankunataj pusamuwankichej sullk'a kaj wauqeykichejta. Ajinapi yachasaj qankuna cheqamanta sumaj allin runas kasqaykichejta, mana qhawarajkunachu kasqaykichejta. Chaymantataj kacharipusaj kay uj wauqeykichejta, jinamanta kay llajtapi purinaykichejpaj, ama pipis ch'atasunaykichejpaj.

³⁵Costalesninkumanta sapa uj trigota jich'ashaspa, Josej wauqesnenqa qolqesninkuta tarikaporqanku wayaqetaspi watasqasta trigomanta qorqanku chay qolqesta sapa ujninku. Chay wayaqetasta qolqenkutawan rikukapuspataj mancharerqanku, jinallataj tatankupis.

³⁶Chaymanta Jacobqa paykunaman nerqa: Qankunaqa saqeshawankichej mana wawasniyojta. Joseqa manaña noqanchejwanchu, Simeompis manallañataj kaypichu. Kunanqa Benjamintañatajchu qhechuwankichej! Kay tukuy ima contraypi!

³⁷Chaymantaqa Rubenñataj tatanman nerqa: Noqa cuentayoj kasaj Benjaminniykimanta, noqa kutichimpusqayki. Mana kutichimpusqayki chayqa, iskaynin wawasniyta wañuchinki.

³⁸Jacobtaj nerqa: Benjaminneyqa mana qankunawan renqachu. Wauqen José wañupun, kunanqa payllaña qhepakun. Sichus ñanta rishajtiykichej imanakunman chayqa, qankuna juchayoj kankichej kay machu achachi llakiywan wañunampaj.