Read Quechua Bolivia DC Bible GÉNESIS 43 Bible Online

GÉNESIS 43 - Quechua Bolivia DC Bible bible

GÉNESIS 43

¹Yarqhayqa chay llajtapi sinch'iña, mana muchuy atina jinaña karqa.

²Jacobtaj wawasnin ima, Egiptomanta chay trigota apamusqallankutaña mikhusharqanku. Chaypis tukukushajtillanñataj Jacobqa nerqa: Ujtawan rispa trigota rantimuychej, nispa.

³Judataj nerqa: Ña niykuña, chay wiraqocheqa sut'ita niwasqaykuta. Pay niwayku, sichus wauqeykichejta mana pusamuwankichej chayqa, amaña uyaykichejta rikuchikuwankichejchu, nispa.

⁴Sichus Benjaminta pusajta saqawasqayku chayqa, apurata rispa trigota rantimusqayku.

⁵Manapuni munanki chayqa, mana riykumanchu; imaraykuchus chay wiraqocheqa sut'inta niwayku: Manachus chay wauqeykichejta pusamuwankichej chayqa, amañapuni jamuwankichejchu uyaykichejta rikuchikojllapis.

⁶Chaymanta Israelqa nerqa: Imaraykutaj kay jina mana allinta ruwawankichejri? Ima nispataj qankuna willarqankichej chay runaman ujnin wauqeykichej kasqantari?

⁷Paykunataj nerqanku: Chay runapuni mayta tapuwayku imaynachus kasqaykuta, jinallataj familiaykumantapis. Kay jinata niwayku: Tataykichej kausashanrajchu? Ujnin wauqeykichej tiyanchu?, nispa. Noqaykutaj jinata niwajtiykoqa kutichiyku ari tapuwasqaykuman. Mana jinata nejtiykoqa imaynapitaj niwaykuman karqa wauqeykuta pusanaykutari?

⁸Chantaqa Judañataj tatan Israelman nerqa: Sichus mana munanki ama yarqhaywan wañunanchejta chayqa, noqawan saqeway Benjamín rejta, noqa paymanta cuentayoj kasaj, kunampachataj risqayku. Ajinamanta ama wañunanchejpaj ni qan nitaj noqayku, nitaj wawasniykupis.

⁹Ima kajtimpis noqa paymanta cuentayoj kasaj: noqamanta ima mana allin kajtenqa mañawanki. Noqa chayachimpusqayki kay kikillanmantaj. Mana jina kanqa chayqa noqata juchachawanki ñaupaqeykipi wiñaypaj.

¹⁰Sichus qan mana jinata jark'akuwaj karqa chayqa riykumanña karqa, rispa jamuspa iskaytaña chayamuykuman karqa.

¹¹Chaymanta tatankoqa nerqa: Mana imapis kanan kajtenqa kayta ruwaychaj: Chay runaman jaywanaykichejpaj apaychej costalesniykichejpi imachus kaypi sumaj poqoj kajta, sumajnin kajkunata: Uj chhika balsamota, uj chhika abeja misk'ita, q'apaj mirrata, nuecesta, almendrastawan.

¹²Apallaychejtaj qolqetapis uj jinatawan, chay qolqestataj pay kikinmampuni jaywankichej, kutichipususqachej chayta; ichapis pantaspa churaykorqanku.

¹³Kayqa Benjamín, pusaychej, usqhayta rispa chay runawan tinkumuychej ujtawan ima nisonqachejchus.

¹⁴Tukuy Atiyniyoj Dios qankunamanta khuyakuchun, ama imapis qankunawan kanampaj, chay runa ujnin wauqeykichejta kacharimpunampaj, jinallataj kay Benjamintapis. Sichus Diospuni munan mana wawasniyoj kanayta chayqa, jina mana wawasniyoj qhepakusaj!

¹⁵Jinata nejtinkutaj Jacobpa wawasnenqa oqharispa chaparasta, qolqetapis uj jinatawan apanankupaj Benjamintawan pusariykukuspa Egiptoman kutirerqanku. Josejpaman chayajtinkutaj, Joseqa rikorqa wauqen Benjamín paykunawan kashasqanta. Chaymantataj mayordomonman nerqa: Kay runasta wasiyman pusaykuy, jinaspataj uj wakata ñak'ay, chaymantataj sumajta wayk'unki; imaraykuchus kay runas noqawan khuska diata mikhonqanku.

¹⁷Mayordomotaj kikinta ruwarqa Josej nisqanman jina, chaymantataj wasinman pusarqa.

¹⁸Paykunataj ninakusharqanku may mancharisqas wasinman pusajtin: Kayqa nisqalla! Kayman pusachimushawanchej qolqenmanta, chay waj kuti kutichipuwasqanchejmanta. Kunanqa jasut'iwasunchej, ruwawasuntaj kamachisnin kananchejpaj burrosninchejwan khuska.

¹⁹Wasi punkuman qayllaykushaspañataj, mayordomoman qayllaykuspa parlapayarqanku, nispa: Wiraqochíy! Cheqamanta qayna wata uj kuti trigota rantikoj jamorqayku.

²¹Chaymanta ripushaspataj uj cheqapi uj ch'isi jarakorqayku, chaypi costalesniykuta qhawaykuspa trigomanta pagasqayku qolqesniykuta tarikaporqayku sapa ujniykojpapi tukuyninta. Chayta kunanqa apampuyku.

²²Chantaqa apamullaykutaj waj qolqetawan trigota rantikunaykupaj. Kunantaj mana yachaykuchu pichus chay rantisqayku qolqeta costalesniykuman churaykorqapis.

²³Paytaj kuticherqa chaymantaqa ama llakikuychejchu, amataj manchachikuychejchu. Diosniykichejchá á, tataykichejpa Diosnin chay qolqetaqa churaykorqa; noqa chay qosqaykichej qolqetaqa jap'erqani. Chaymantataj mayordomoqa Simeonta carcelmanta orqhomuspa paykunaman pusamorqa.

²⁴Jinaspataj tukuyninkuta Josej wasinman pusaykorqa. Chaypitaj yakuta jaywarqa chakisninkuta mayllakunankupaj, chaymantataj burrosninkuman qaramorqa.

²⁵Paykunataj chapara apasqasninkuta wakicherqanku khuskan diata José chayamojtin jaywanankupaj; paykuna yacharqanku chaypi paykunawan mikhunanta.

²⁶José chayamojtintaj qonqoriykukuspa, pampakama umankuta chayachispa paykunaqa chapara apasqankuta jaywarqanku.

²⁷Joseqa paykunata taporqa: Imaynataj kashankichej, walejllachu?, nispa. Chaymanta tapullarqataj: Imaynataj kashan tataykichej, mayqenmantachus willawarqankichej chay, kausakushanrajchu?, nispa.

²⁸Paykunataj k'umuykuspa nerqanku: Kamachiyki tataykoqa walejlla kakushan. Kausakushanraj, nispa.

²⁹Joseqa muyuyninta qhawarispa Benjaminta rikorqa, mayqenchus karqa wauqen uj mamamanta uj tatamantawan; nerqataj: Kaychu chay sullk'a kaj wauqeykichej, mayqenmantachus willawarqankichej chay? Kunanqa Dios bendicisuchun wawáy!

³⁰Chayta nispataj Joseqa yaqhapuni waqaywan atipachikorqa, imaraykuchus kusiywan sonqonta wawayacherqa wauqenta rikukapuspa; chayrayku apurata cuartonman yaykuporqa, chaypitaj waqarikorqa.

³¹Sonqon tiyaykojtintaj, waqayninta mayllarqokuspa llojsimuytawan nerqa: Mikhunata apamullaychejña, nispa.

³²Josemanqa waj mesapi qararqanku, wauqesninmantaj waj mesapi. Egipciospajtaj waj mesaman churaporqanku, imaraykuchus paykunaqa mana jayk'ajpis mikhojchu kanku hebreoswan khuska.

³³Josetaj wauqesninta tiyaracherqa kurajmanta sullk'aman jina. Paykunataj mancharisqas t'ukusharqanku ujkuna ujkuna qhawarinakuspa.

³⁴Josetaj mesamanta mikhunata jaywarqa tukuyninkuman, Benjaminmanrí aswan yapasqata mikhunataqa jaywarqa uj phishqa jinatawan tukuyninkumanta nisqaqa. Jinata Joseqa wauqesninwan mikhorqanku ujyarqankutaj asirikunankukama.