Read Quechua Bolivia DC Bible GÉNESIS 47 Bible Online

GÉNESIS 47 - Quechua Bolivia DC Bible bible

GÉNESIS 47

¹Jinamanta Joseqa faraonwan parlaj rerqa. Payqa nerqa: Wauqesniy, tatay ima chayamunku Canaanmanta, paykunaqa Gosempiña kashasqanku ovejasninkuwan, wakasninkuwan, imasninkuchá tiyapun chaykunawan ima.

²Joseqa phishqa wauqesninta ajllaspa pusarqa faraonman paykunata rejsichinampaj.

³Jinamanta faraonqa paykunata taporqa: Imapitaj llank'ayta yachankichejri?, nispa. Paykunataj nerqanku: Noqayku kamachisniykeqa ovejasta mirachiyta yachayku ñaupa tatasniyku jina, nispa.

⁴Kunanqa kayman tiyakoj jamuyku ari, imaraykuchus Canaampeqa manchay yarqhay kashan, pastollapis mana kanchu uywasniykupaj. Chaypaj qan niwayku ari Gosén jallp'api tiyakunaykuta, nispa.

⁵Chaymanta faraonqa Joseman nerqa: Tatayki wauqesniyki ima qanwan tiyakoj jamunku.

⁶Egipto jallp'aqa qampa nisqaykipi. Qan qoy paykunaman Egiptopi sumajnin kaj Gosén jallp'ata, paykuna chaypi tiyakunankupaj. Sichus mayqen sumajta uywasta michiyta yachanku chayqa, churay ovejasniyta michipunawampaj.

⁷Joseqa tatantañataj pusarqa faraonman rejsichimunampaj. Jacobqa may sumajta yapaykorqa faraonta.

⁸Faraontaj payta taporqa: Mashkha watasniyojñataj kankiri?, nispa.

⁹Jacobtaj nerqa: Ujnejmantaj ujnejmantaj purisqaypi pachaj kinsa chunka watasniyojña kani. Chayqa pisillaraj, mana allin watastaqa manaraj rikunichu tukuy kausayniypi, ñaupa tatasniy rikusqanku chaytaqa manaraj rikunichu.

¹⁰Chaymanta Jacobqa faraonmanta tinkunakama nispa riporqa.

¹¹Josetaj chaymanta rak'irarqa wauqesninman Egiptopi sumajnin kaj jallp'asta chaypi tiyakunankupaj faraompa nisqanman jina. Ajinamanta tatan Jacob wauqesnin ima jallp'asniyoj karqanku Ramsés jallp'asnejpi.

¹²Chantapis Joseqa mikhunastawan qorqa sapa uj aylluman mashkhachus kasqankuman jina, jinallataj imasninkuchus kasqanman jina.

¹³Chay tukuynejpi trigoqa manapuni karqachu, yarqhaytaj astawan astawan yapakusharqa. Wakin Egiptomanta kajkuna, Canaanmanta kajkunapiwan wañuraporqanku chay jina yarqhaywan.

¹⁴Joseqa tukuy qolqesta tantaykorqa Egiptomanta, jinallataj Canaanmantapis trigomanta pagasqasninkuta; chaytataj waqaycharqa faraompa palaciompi.

¹⁵Manaña qolqenku rantikunankupaj kajtintaj, ni Egiptopi, nitaj Canaampipis, chay runas Joseman nej jamorqanku: Qan mikhunata qowayku. Ama qhawakullawaykuchu ari yarqhaywan wañojta, imaraykuchus manaña qolqeykupis tiyapuwaykuchu.

¹⁶Josetaj paykunaman nerqa: Manaña qolqeykichej tiyajtenqa uywasniykichejta apamuychej ari, noqataj trigota qosqaykichej.

¹⁷Jinata nejtintaj egipcioswan cananeoswanqa apamorqanku caballosninkuta, ovejasninkuta, wakasninkuta, burrosninkuta ima, Joseman. Josetaj trigosta qorqa uywasninkumanta chay wata junt'ata.

¹⁸Chay wata tukukojtintaj qhepan wataqa ujtawan rillarqankutaj Joseman nej: Mana qanmanqa imatapis pakayta atiykumanchu wiraqochíy, manaña tiyapuwaykuchu qolqeyku; uywasniykupis qampallataña. Manaña imaykupis kanchu qanman trigomanta qonaykupaj; manachayqa jallp'asniykuwan, noqallaykuwanña.

¹⁹Qanllaña ari noqaykuta jallp'asniykutawan trigowan rantikapuwayku. Jinamanta faraompa kamachisnin kasqayku, jallp'asniykuta payllapajña llank'apusqayku. Qan qowayku ari mujuta tarpuspa kausanaykupaj, ajinamanta jallp'asniyku ama usunankupaj. Imaraykutaj qan qhawakullawaykuman jallp'asniykuwan khuska wañojtari?, nispa.

²⁰Chaymanta Joseqa tukuy jallp'asta rantirarqa egipciosmanta faraompaj, imaraykuchus munaspa mana munaspa jallp'asninkuta vendepunanku karqa yarqhaywan ama wañunankupaj. Ajinamanta jallp'asninkoqa faraompa makinman chayarqa.

²¹Tukuynin Egiptopi kaj chhika kamachisman tukorqanku.

²²Joseqa sacerdotespa jallp'asnillanta mana ranterqachu, imaraykuchus paykunamanqa faraón qorqa khuskan trigota. Chayrayku paykunaqa jallp'asninkuta mana venderqankuchu, imaraykuchus faraompa qosqan trigo mikhunankupaj kallarqa.

²³Chaymanta Joseqa runasman nerqa: Kunanqa qankuna jallp'asniykichejwan khuska faraompata kankichej, noqa qankunata paypaj rantiykichej.

²⁴Kayqa muju kunanqa tarpumuychej. Chay poqojtataj khuskampa khuskanninta cosechasmanta faraonman qonkichej. Chay wakintaj qankunapaj kanqa, tarpunaykichejpaj, mikhunaykichejpaj, wawasniykichej mikhunankupaj, pikunachá wasiykichejpi tiyakun chaykunapiwan mikhunankupaj.

²⁵Paykunataj nerqanku: Qanqa k'acha runa kanki, noqaykuta khuyakuwayku, salvawaykutaj kausayniykuta; chayrayku kunanqa faraompa kamachisnin kasqayku.

²⁶Ajinata Joseqa chay leyta churarqa Egiptopi, faraonman poqojmanta khuskampa khuskanninta qonata. Chay leyqa kunankama kashanrajpuni. Sacerdotesqa mana imatapis qonankuchu karqa, imaraykuchus paykunaj jallp'asninkoqa mana jayk'ajpis faraompa makinman chayarqachu.

²⁷Israelitasqa Egiptopi tiyakaporqanku Gosén jallp'api, chaymanta qhepata paykunaqa ashkhata mirarqanku.

²⁸Jacob tiyakorqa chunka phishqayoj watasta Egiptopi, jinamanta payqa chayarqa pachaj tawa chunka qanchisniyoj watasniyojman.

²⁹Uj día Israelqa wañupoj jina kaspa, José wawanta wajyachimorqa ninampaj: Sichus qan cheqamanta noqata khuyayta munawanki chayqa, makiykita ukhuyman churaspa juray ari, imatachus nisusqayta ruwanaykipaj. Qanqa wawáy, ama ari kay Egiptopi p'ampawankichu.

³⁰Maypachachus ñaupa tatasniywan samarikoj risaj chayqa, Egiptomanta orqhoway, tatasniypa sepulturanman p'ampamuwanki. Josetaj kuticherqa ajinata ruwasaj tatáy, nispa.

³¹Tatan Israelqa José wawanta jurachinankama karqa paytaj jurarqa. Chaymantataj Israelqa camampi saunan chaynejman k'umuykorqa.