Read Quechua Bolivia DC Bible GÉNESIS 9 Bible Online

GÉNESIS 9 - Quechua Bolivia DC Bible bible

GÉNESIS 9

¹Dios bendicerqa Noeta wawasnintawan, nispa: Miraychej ashkhayaychejtaj, mundomantaj junt'aychej.

²Qankuna manchachinkichej kharkatichinkichejtaj, tukuy laya mundopi kaj chhika animalesta. Jinallataj tukuy phawaykachajkunata, jallp'a patapi kajkunata, mar qochapi kajkunatapis manchachinkichej, qankunaj atiyniykichejpi kanqanku.

³Atinkichej mikhuyta tukuynin animalesta, jinallataj q'omer qhorastapis atisqaykichejman jina. Noqa qoykichej chay tukuyninta.

⁴Uj imallata mana mikhunaykichejchu tiyan: Yawarniyoj aychata, imaraykuchus chay yawarpi kausayqa kashan.

⁵Noqaqa cuentata mañasaj sapa uj runamanta, animalesmantapis qankunaj yawarniykichejta jich'ajtinku. Sapa uj runamanta cuentata mañasaj runa masimpa kausayninmanta.

⁶Sichus mayqen uj runata wañuchenqa chayqa, payta waj runa wañuchillanqataj, imaraykuchus runaqa Diosman rijch'ayninman jina ruwasqa.

⁷Qankunaqa ashkhayaychej, miraychej, mundomantaj junt'aychej.

⁸Dios nillarqataj Noeman, wawasninmanwan:

⁹Qhawariychej, noqa qankunawan uj tratota ruwasaj, jinallataj qhepaman mirayniykichejwampis.

¹⁰Qankunawan kaj animaleswampis jinallataj kanqa; mayqenkunachus arcamanta llojsinku: P'isqos, uywas, monte animales, tukuy animales mundopi kaj chhika.

¹¹Qankunawan ruwasqay tratoyqa manapuni jayk'ajpis uj jinayanqachu: Manaña runasta, nitaj animalestapis ujtawan yakuwan chinkachisajchu. Manaña jatun musphay para kanqachu jallp'ata p'ampaykunampaj.

¹²Kaymin chay señalqa tratota ruwasqaymanta qankunawan wiñaypaj, jinallataj qankunawan kajkuna tukuy animaleswampis.

¹³K'uychiyta churani phuyuspi, chaytaj kanqa señal tratota mundowan ruwasqaymanta.

¹⁴Maypachachus noqa phuyusta kachamusaj jallp'a pataman chayqa, k'uychiy phuyuspi rikhurenqapacha.

¹⁵Chaypacha yuyarikusaj uj tratota qankunawan ruwasqayta, jinallataj animaleswampis, manaña jayk'ajpis ni ima yaku jamuspa kausajkunata chinkachenqachu.

¹⁶Maypachachus k'uychi phuyuspi rikhurenqa chayqa, qhawarisaj, yuyarikusajtaj uj tratota wiñaypaj ruwasqayta tukuy runawan, tukuy animaleswan jallp'a patapi kajkunawan.

¹⁷Kay ari, uj señal, tratota ruwasqaymanta runawan, jinallataj jallp'a patapi tukuy animaleswampis. Ajinata Diosqa parlarikorqa Noewan.

¹⁸Noepa wawasnin arcamanta llojsejkunaqa kaykuna kanku: Sem, Cam, Jafet ima. Camqa Canaampa tatan karqa.

¹⁹Kay kinsa karqanku Noepa wawasnin; paykunaj mirayninkutaj mundoman junt'arqa.

²⁰Noeqa jallp'ata llank'ayta qallarerqa, chaypi uvasta poqocherqa.

²¹Uj kuti uvamanta vinota ujyaykorqa, machaykorqataj. Jinamanta payqa machasqa q'alapacha toldon ukhupi wijch'urpayakorqa.

²²Canaampa tatan wawan kajtaj, tatanta q'alallata rikuytawan rispa wauqesninman willamorqa.

²³Semwan Jafetwantaj usqhay usqhayta rispa tatankoj p'enqayninta uj p'achawan qhataykorqanku lijranmantapacha, sumajta mayt'uykorqanku tukuy q'ala kayninta. Tatankoj q'ala kayninta ama rikunankupajtaj, qhepaman rerqanku wajnejta qhawaspa.

²⁴Noetaj rijch'ariytawan, machasqamanta ch'aki sonqoman kutiriytawan, yacharqa sullk'a kaj wawa imatachus ruwasqanta.

²⁵Nerqataj: Canaanqa maldicisqa kachun; wauqesnimpa kamachisnimpa kamachin kachun.

²⁶Noeqa nillarqataj: Señor Diosniy bendicichun Semta, Canaantaj kachun kamachin.

²⁷Dios astawan Jafetta jatunchachun, Sempa toldosnimpi tiyachuchun, Canaantaj kamachin kachun.

²⁸Jatun musphay paraj qhepanta Noeqa kausarqa kinsa pachaj phishqa chunkayoj watasta.

²⁹Chaymanta Noé wañuporqa isq'on pachaj phishqa chunka watasniyoj.