Read Quechua Bolivia DC Bible 2 SAMUEL 10 Bible Online

2 SAMUEL 10 - Quechua Bolivia DC Bible bible

2 SAMUEL 10

¹Uj chheqa unayninmantaj, amonitaspa reyninku Nahas wañuporqa, paypa cuentanmantataj wawan Hanún kamacherqa.

²Chaypacha Davidqa yuyarqa chay Nahaspa wawan Hanunwan allimpi kausakuyta, imaynatachus tatan payta khuyakorqa ajinallatataj. Kacharqataj chay yanapajkunasninmanta wakinta, tatan wañupusqanmanta Hanunta sonqochanankupaj. Davidpa kachasnin asmonitaspa jallp'ankuman chayajtinkukamataj, chay amonitaspa kuraj kamachejkunasnintaj reyninku Hanunman nerqanku: Qan reyníy, yuyankichu David chay runasninta kachamusqanta tataykej wañupusqanmanta qanta sonqochasunallampaj? Payqa kachamun sumajta qhawaqanankupaj wateqanankupajtaj kay llajtata, chantá jamuspa phirinankupaj.

⁴Chaypacha Hanonqa kamacherqa Davidpa kachasninta jap'inankuta, sunkhasninkuta khuskanmanta k'uturparinankuta, p'achasninkutataj siki patasninkukama llik'irparinankuta. Jinata ruwachispataj paykunata kachaporqa.

⁵Davidtaj kay tukuyta yachaspaqa, kamachisninta kacharqa taripamunankupaj, chay runas may p'enqaypi kasqankurayku. Chantá Davidqa chay kachasninman nichillarqataj qhepakunankuta Jericó llajtapi sunkhasninku wiñanankama, chaymantataj kutimpunankuta.

⁶Amonitasqa yacharqanku Davidqa paykunapaj phiñasqa kasqanta, chayrayku qolqewan mink'akorqanku iskay chunka waranqata siriosmanta kaj soldadosta, Bet-rehobpi kajkunamanta, chantá Sobapi kajkunamantawan. Mink'akullarqankutaj Maacamanta reypa waranqa soldadosninta, Is-tobmantataj chunka iskayniyoj waranqata.

⁷Chayta yachaspataj Davidqa Joabta kacharqa tukuynin soldadosnintawan ima.

⁸Amonitasqa llojsispa kikin llajtaman yaykunapi maqanakunapaj wakichikorqanku. Chaykamataj sirio soldadosqa Sobamanta kajkuna, Rehobmanta kajkunapiwan, Is-tobmanta soldadoswan, Maacamanta kajkuna soldadospiwan imaqa, chay campopi wakichikorqanku.

⁹Joabqa maypachachus reparakorqa ñaupajmanta jinataj qhepamantapis maqanakunankupaj muyuykusqankuta, chaypacha ajllarqa aswan sumachaj kaj soldadosninta israelitas ukhumanta, sirioswan maqanakunampajtaj wakichikorqa.

¹⁰Chay wakin soldadostataj hermanon Abisaipa kamachiyninman churarqa, Amonitaswan maqanakunampaj.

¹¹Nerqataj: Sichus sirioskuna noqamanta astawan atinkuman chayqa, jamuspa yanapawanki; sichus amonitas qanmanta astawan atinkuman chayqa, noqa jamuspa yanapasqayki.

¹²Kallpachakuy, jallp'anchejrayku, jinataj Diosninchejpa llajtasninraykutaj sinch'ita maqanakunachej. Señortaj munasqanman jina ruwachun!

¹³Joabqa, soldadosninwan khuska sirioswan maqanakamoj rerqa, paykunataj Joabpa ñaupaqenta ayqerikaporqanku.

¹⁴Amonitastaj siriosmanta kaj soldados ayqesqankuta rikuytawan, paykunapis Abisaipa ñaupaqenta ayqellarqankutaj, llajtamantaj yaykurikaporqanku. Chaypacha Joabqa amonitaswan maqanakuyta saqerqa, Jerusalenmantaj kutiporqa.

¹⁵Siriosqa, israelitaswan atipachikusqankuta reparakuspa, watejmanta tantakullarqankutaj.

¹⁶Hadad-ezerqa, Eufrates mayu chimpapi kajkuna siriosta wajyachimorqa, chaykunaqa Helamman jamorqanku. Paykunaj ñaupaqenkupi Adad-ezerpa soldadosnimpa kamachejnin Sobac kasharqa.

¹⁷Kay imasta Davidman willajtinkutaj, payqa tukuy israelitasta tantaykorqa, Jordán mayuta pasaspataj Helamman chayarqa. Chaypitaj siriosqa Davidwan maqanakorqanku.

¹⁸Chaymantataj siriosqa israelitaspa ñaupaqenmanta ayqellarqankutaj. Chaypacha Davidqa tukuypi wañucherqa tawa chunka waranqa soldadosta caballospi maqanakojkunata, jinallataj qanchis pachaj maqanakuna carrostapis t'unallarqataj; chay jawaqa, sirio soldadospa kuraj kamachej ninku Sobacta Davidqa chaypi wañuchillarqataj.

¹⁹Hadad-ezerta yanapajkuna reyesqa israelitaswan atipaykuchikusqankuta rikuspa, paykunawan allinyakorqanku, jinamanta israelitaspa kamachimpi karqanku. Chaymantapachataj siriosqa amonitasta yanapayta manchachikorqanku.