Read Quechua Bolivia DC Bible 2 SAMUEL 12 Bible Online

2 SAMUEL 12 - Quechua Bolivia DC Bible bible

2 SAMUEL 12

¹Señorqa profeta Natanta Davidman kacharqa. Natán paywan tinkuspataj nerqa: Uj llajtapi iskay runas karqanku. Ujnenqa qhapaj karqa, ujnintaj wajcha karqa.

²Chay qhapaj runaqa ashqha ovejasniyoj wakasniyojtaj karqa, chay wajcha runajtarí rantikusqan un k'ata ovejitallan karqa. Pay kikin uywakorqa, ovejitataj paywan wawasninwan ima khuska wiñarqa, mikhunallanmantataj mikhorqa, chay ujyana vasollanmantataj ujyarqa, kikin ojllaynillampitaj puñukojpis. Chay runaqa uj warmi wawanta jina munakorqa!

⁴Uj diapirí uj ñan purej runa chay qhapaj runata waturej rerqa, chay qhapaj runataj chay watukoj runaman mikhuyta jaywarinampajqa, mana munarqachu ni wakanmanta nitaj ovejanmantapis ñak'achiyta, manachayqa chay wajcha runaj ovejitanta ñak'acherqa, chay wasinman chayakamoj runaman jaywarinampaj.

⁵Davidtaj sinch'ita phiñakorqa chay runapaj, Natanmantaj nerqa: Diospa sutimpi jurayki, chayta ruwajqa wañunan tiyan!

⁶Chay ovejita valesqanmantataj uj tawa jinastawanraj kutichinan tiyan, mana uj chhikan khuyakuywan chayta ruwasqanrayku!

⁷Chaypacha Natanqa Davidman nerqa: Qan chay runaqa kanki! Ajinata Señor, Israelpa Diosnin nisunki: Noqa ajllarqayki Israelpa reynin kanaykipaj, Saulpa atiyninmantapis waqaycharqayki; Señorniykej palacio wasintapis warmisnintawan qorqayki, jinataj Israelpa reynin, Judajpa reynin kanaykitapis qollarqaykitaj. Chaychus pisi kanman karqa chayqa aswan ashkha imastawanraj yapaykiman karqa. Imaraykutaj qhesacharqanki palabrayta, mana munasqayta ruwaspari? Qan wañuchinki chay hitita Uriasta, amonitaswan wañuchichispa, warmintataj qampaj jap'ikaporqanki.

¹⁰Kunanqa noqata qhesachaspa chay hitita Uriaspa warminta warmiykipaj jap'ikapusqaykirayku, mana jayk'ajpis aylluykipaj faltanqachu wañuchikuykuna.

¹¹Noqa Señor, nini: Aylluyki ukhullamantataj rikunaykita llakiykunas contraykipi oqharikunankuta, aylluykimanta ujninman warmisniykitaqa jaywaykapusaj, paytaj warmisniykiwan sut'i p'unchaypi puñuykaponqa.

¹²Qanqa pakaypi ruwarqanki, noqataj chayta ruwachisaj sut'i p'unchaypi, Israelpa rikunanta.

¹³Davidtaj Natanman nerqa: Señorpa contrampi juchallikuni. Natantaj kuticherqa: Chay juchallisqaykimanta, Señorqa mana jasut'isonqachu, manataj wañunkichu.

¹⁴Señorta enemigosninwan rimachisqaykirayku chay nacekoja wawayki wañunampuni tiyan.

¹⁵Natán wasinman kutipojtinkama, Señorqa sinch'ita onqocherqa Uriaspa warmimpi Davidpata karqa chay wawanta.

¹⁶Chaypacha Davidqa wawanrayku Señormanta mañarqa, ayunaspataj, ch'isisnintin pampapi sirisqa puñorqa.

¹⁷Palaciompi tiyakojkuna, chay kurajkunataj rerqanku pampamanta sayarichinankupaj, paytaj mana munarqachu sayarikuyta, manataj paykunawan mikhorqachu.

¹⁸Qanchis días qhepamantaj wawaqa wañuporqa, Davidpa yanapajkuna runastaj manchachikorqanku payman willamuyta, kay jinata yuyaspa: Wawa kausashajtillanraj parlasqanchejta mana uyariwarqanchejchu. Kunantaj wawan wañupojtinñaqa imaynatataj willasunrí? Ichapis payqa ima sajrata ruwakunman!, nispa.

¹⁹Davidtaj, chay runasnin paykuna pura parlanakojta rikuspa, jinamanta yacharqa wawan wañupusqantaña, chayrayku paykunata taporqa: Wawaqa wañunchu?, nispa. Paykunataj kuticherqanku: Arí wañupun, nispa.

²⁰Chaypacha Davidqa pampamanta jatarikuspa mayllakorqa chay q'apaj jampiswantaj jawikorqa, p'achantapis wajta churakorqa, Diosta yupaychana wasimantaj Señorta yupaychaj yaykorqa. Chaymantataj wasinman rispa mikhunata mañakuspa mikhorqa.

²¹Chantá chay yanapaj runasnin taporqanku: Imatataj ruwashanki reyníy? Wawa kausashajtillanrajqa ayunarqanki, waqarqankitaj payrayku; kunantaj wawa wañupojtinñari, qan reyniykoqa jatarikuspa mikhunki!

²²Davidtaj kuticherqa: Wawa kausashajtillanrajqa ayunarqani waqarqanipis, yuyaspa ichapis Señorqa noqamanta khuyakuspa wawayta kutirichinanta.

²³Kunantaj wañupojtinñarí, imapajñataj ayunaymanrí qhasita mana kausarichinaypajri? Noqaqa risaj paywan tinkukoj, payrí mana atinchu jamuyta noqawan khuskachakoj!

²⁴Chaymantataj Davidqa sonqocharqa warmin Betsabeta. Watukoj rispataj paywan khuska puñorqa, Betsabetaj uj qhari wawata nacechikorqa, Salomontataj suticharqa. Señortaj munakorqa chay wawataqa.

²⁵Chaytaqa profeta Natannejta Señorqa Davidman willacherqa. Señorta munakusqanraykutaj, Davidqa chay wawata Jedidiasta suticharqa.

²⁶Chaykamataj Joabqa amonitaspa llajtanku Rabaman maqanakoj kachaykukorqa, reypa tiyakunan llajtata jap'ikapunayasharqa.

²⁷Chaypacha Joabqa Davidman willacherqa kay jinata: Rabá llajtaman yaykorqani, jap'iniñataj yakuyoj llajtata.

²⁸Chayrayku qan reyníy tantaykuy chay wakin soldadosta, kikin llajtamantaj yaykuspa jap'ikapuy, ama noqanejta atipasqa kanampaj, chaymantaj sutiyta churaykunankupaj.

²⁹Chaypacha Davidqa tukuy soldadosta tantaykuspa, rerqa Rabaj contrampi maqanakoj, yaykuykuspataj jap'ikaporqa.

³⁰Chaymantataj reypa umanmanta lluch'orqa, chaytataj Davidman churaykorqanku, chay pilloqa qorimanta karqa, k'acha rumiswan k'achanchasqataj, pesarqataj kinsa chunka kinsayoj kilos jina. Davidqa orqollarqataj chay llajtamanta waj valorniyoj imastawan.

³¹Chay llajtapi puchoj runastataj orqhomuspa llank'acherqa sierraswan trilloswan, fierro hachaswan; llank'achillarqataj ladrillo hornospipis. Ajinallatataj ruwarqa amonitaspa tukuy llajtasninkupi. Chaymantataj Jerusalenman tukuy soldadosninwan kutiporqa.