Read Quechua Bolivia DC Bible 2 SAMUEL 18 Bible Online

2 SAMUEL 18 - Quechua Bolivia DC Bible bible

2 SAMUEL 18

¹Davidtaj taukuy paywan kajkuna soldadosninta waturerqa, t'aqararqataj waranqasman, pachajkunaman jinataj, sapa t'aqamantaj kamachejkunata churarqa.

²Kinsaman kacharqa tukuynin soldadosta. Joabpa kamachinman churarqa ujnin t'aqata, ujnintataj Sarviaj wawan Joabpa hermanon Abisaiman, chay ujnin t'aqatataj Gatmanta Itaejpa kamachinman. Tukuynin soldadosmantaj Davidqa nerqa: Noqa qankunawan risaj maqanakuman.

³Paykunataj kuticherqanku: Ama chayta ruwaychu reyniyku, enemigomanqa mana importanchu ayqenaykupis chayri noqaykumanta khuskampis wañunayku, chaywampis qan reyniykoqa noqaykumanta chunka waranqa runas jina valenki. Chayrayku aswan walej kanman qan reyniykoqa qhepakunallayki kay llajtapi, kaymantapacha yanapata apachimunawaykupaj.

⁴Reytaj paykunaman nerqa: Ruwasaj imachá aswan allin rijch'asunkichej chayta. Chay ratopachataj llajtaman yaykuna punkumanta uj ladoman churakorqa, chaykamataj soldadosqa llojserqanku waranqasmanta, jinataj pachajkunamanta ima.

⁵Chay jawaqa rey kamacherqa Joabta, Abisaita, Itaita ima, payta munakusqankurayku allinwan rikunankuta chay wayna Absalonta, tukuynniykutaj uyarerqanku rey imatachus kurajkunaman Absalonmanta kamachisqanta.

⁶Ajinata ari soldadosqa campoman llojserqanku Israel soldadoswan maqanakamunankupaj. Maqanakoqa karqa Efraín montepi, Israelmanta kajkunataj atipachikorqanku Davidpa kaj soldadosninwan. Chay diaqa may ashkhapuni wañorqanku, tukuypi iskay chunka waranqa jina runas wañorqanku.

⁸Tukuy chaynejman maqanakoqa junt'aykorqa. Monte ukhupi wañojkunaqa aswan ashkha karqanku espadawan t'ojsisqas wañojkunamanta nisqaqa.

⁹Absalontaj uj orqo mulapi rishaspa Davidpa soldadosninwan tinkukorqa. Chay mulotaj uj jatun encina ch'ampa sach'a uraman ayqeykorqa, Absalompa umantaj chay encina sach'aj ramasnimpi ch'ipaykukorqa, paytaj warkhusqa qhepakorqa, chay mulotaj cheqanta ripullarqapuni.

¹⁰Ujtaj chayta rikuspa Joabman willamorqa: Absalonta rikuni uj encina sach'api warkhusqata.

¹¹Joabtaj kuticherqa: Rikuspari, imaraykutaj chay kikimpi mana wañucherqankichuri?, nispa. Noqaqa kusiywan chunka qolqesta uj chumpitawan qoykiman karqa.

¹²Chay runataj Joabman kuticherqa: Waranqa qolqesta qowajtiykipis mana makiytaqa oqhariymanchu reypa wawampa contrampeqa, imaraykuchus uyarerqayku rey imatachus kamachisqanta qanman, Abisaiman, jinataj Itaimampis, chay wawan Absalonta allinta waqaychanaykichejta.

¹³Chayta ruwayman karqa chayqa, noqaj contrallaypajtaj kanman karqa, imaraykuchus reypajqa mana imapis pakasqaqa kanchu, qantaj mana imatapis ruwawajchu karqa jark'akunawaykipajqa.

¹⁴Joabtaj kuticherqa: Mana astawan tiempoyta qanwan usuchiymanchu, parlaytawantaj kinsa dardosta makimpi oqhariykukuspa Absalompa sonqonman sat'iykorqa, chay encina sach'api warkhusqa kausashajtillanraj.

¹⁵Chaymantataj Joabpa chunka soldadosnin Absalonta muyuykorqanku, wañurparicherqankutaj.

¹⁶Chaymantataj Joabqa kamacherqa putututa waqachinankuta, soldadostaj manaña astawan israelitasta qhatiykorqankuchu, Joab paykunata sayachisqanrayku.

¹⁷Chaypacha Absalompa ayanta chay montepi uj jatun jusk'u karqa chayman wijch'uykorqanku, patanmantaj rumista may jatunta qolluykorqanku. Tukuy israelitastaj sapa uj wasisninkuman ayqerqanku.

¹⁸Absalonqa kausashaspallaraj uj pilarta rumimanta jatarichikusqa Reypa Vallen nisqapi, chaymantaj sutinta churasqa, mana uj wawampis sutinta apanampaj kasqanrayku. Kunankamataj chayqa sutichasqa kashan, “Absalompa rumi pilarnin” nisqa.

¹⁹Chaymantataj Sadocpa wawan Ahimaasqa Joabman nerqa: Mañayki saqenawaykita reyman usqhayta rispa willamunayta, Señor justiciata ruwasqanta enemigosnimpa atiyninmanta libraspa.

²⁰Joabtaj kuticherqa: Mana walejchu kunan willaj rinaykeqa, waj diataj rinki. Mana kunanqa willayta atiwajchu, reypa wawan wañusqanrayku.

²¹Chaywampis Joabqa Etiopiamanta uj soldado karqa chayman nerqa: Riy qan, reyman willamuy imastachus rikusqaykita. Etiopiamanta runataj Joabpa ñaupaqempi k'umuykukuytawan, usqhayta rerqa.

²²Ahimaasqa Joabman nillarqataj: Imapis kachun, saqeway rejta etiopej qhepanta. Joabtaj kuticherqa: Imapajtaj qan riyta munanki wawáy, mana ima t'inkatapis chay willamusqaykimantaqa jap'inkichu.

²³Ahimaastaj kuticherqa: Imapis kachun usqhayta risajpuni. Joabtaj kuticherqa: Rillay!, nispa. Chaypacha Ahimaasqa vallenta usqhayta rispa etiopeta atiparqa.

²⁴Chaykamataj Davidqa llajtaman yaykuna punkus chaupipi tiyakusharqa, chay qhawaj soldadotaj perqa patapi kasharqa chay llajtaman punku yaykuna chaynejpi. Qhawarispataj chay soldadoqa rikorqa uj runata sinch'ita corresmushajta.

²⁵Reymantaj qhaparispa willarqa. Reytaj nerqa: Sapallan jamushan chayqa walej willayta apamushan. Chay runa astawan qayllamushajtintaj, chay qhawaj soldadoqa rikullarqataj waj runata corremushajta, qhaparerqataj punkupi kasharqa chay soldadoman: Waj runa jamushallantaj!, nispa.

²⁷Chay soldadoqa astawan nillarqataj: Jamusqampeqa ñaupaj kaj runaqa Sadocpa wawan Ahimaasman rijch'akun. Reytaj kuticherqa: Payqa sumaj runa, cheqamanta walej willaytachá apamushan, nispa.

²⁸Ahimaastaj sinch'ita qhaparispa reyta napaykorqa pampakama k'umuykuspa, nerqataj: Bendicisqa kachun Señor, qampa Diosniyki, qampa contraykipi oqharikojkunata chinkachisqanrayku.

²⁹Walejllachu kashan wayna Absalonqa?, nispa taporqa reyqa. Ahimaastaj kuticherqa: Kamachiyki Joab kachamusqawajtenqa rikorqani ashqha runas qhollpirakushajta, manataj yacharqanichu imachus kasqanta.

³⁰Chaypacha reyqa kamacherqa: Ithiriy uj ladoman chaypitaj qhepakuy. Ahimaastaj nisqanta ruwarqa.

³¹Chay ratopachataj etiopepis chayamorqa, nerqataj: Reyníy, uyariy kay sumaj willayta: Kunan Señorqa justiciata ruwasunki, kacharichisuspa contraykipi tukuy karqanku chaykunamanta.

³²Reytaj chay etiopeta taporqa: Absalón waynaqa walejllachu kashan?, nispa. Chay etiopetaj kuticherqa: Chay wayna jina tukuchunku enemigosniyki contraykipi oqharikojkuna, qampa sajra kajta mask'apusunku chaykunapis.

³³Reyqa sinch'ita llakikuspa, chay punku patapi wasi kasharqa chayman wicharispataj waqayta qallarerqa. Puriykachaj jinataj nisharqa: Absalón wawáy, Absalón wawáy! Qan wañunaykimantaqa noqa wañuyman karqa! Wawáy, Absalón wawáy!, nispa.