Read Quechua Bolivia DC Bible 2 SAMUEL 3 Bible Online

2 SAMUEL 3 - Quechua Bolivia DC Bible bible

2 SAMUEL 3

¹Saulpa ayllunmanta kajkunawan Davidpata kajkunawan maqanakoqa unayta karqa. Davidpamanta kajkunaqa astawan kallpachakorqanku, Saulpamanta kajkunataj astawan pisiyaykusharqanku.

²David, Hebrompi tiyakushajtin chaypi nacejkuna wawasnin karqanku: Kuraj kaj wawan Amnón, payqa Jezreelmanta Ahinohampa wawan karqa. Sullk'a kajtaj Quileab karqa, payqa Carmelpi Nabalpa viudan Abigailpa wawan karqa. Kinsa kaj wawantaj Absalón karqa, payqa Gesurmanta rey Talmaipa ususin Maacaj wawan karqa. Tawa kajtaj Habuitpa wawan Adonías karqa, phishqa kajtaj Abitalpa wawan Sefatías karqa. Sojta kajtaj Davidpa warmin Eglaj wawan Itream karqa. Kay tukuy wawasnin nacekorqanku David Hebrompi tiyakushajtin.

⁶Saulpa ayllunwan, Davidpa ayllun kajkunawan maqanakushajtinku, Abnerqa, aswan atiyniyojman Saulpa ayllumpi tukusharqa.

⁷Saulpata tiyapusqa uj tanta warmin Rizpa sutiyoj, payqa Ajaj wawan karqa, Abnertaj chay warmiwan puñuykakapusqa. Chayraykutaj Is-bosetqa Abnerta k'amispa nerqa: Imaraykutaj tataypa warminwan puñuykakaporqankiri?, nispa.

⁸Abnertaj sinch'i phiñasqa Is-boset k'amisqanmanta, payman kuticherqa: Noqari, Judá aylloj kamachiynimpeqa uj alqollañachu kasqani? Noqaqa, sumajta yanaparqani tatayki Saulpa ayllunta, wauqesninta, kausaqesnintawan ima. Davidpa makisninmampis mana jaywaykorqaykichu. Qantaj ch'ataykuwankiman kasqa uj warmiwan juchallisqayta?

⁹Kunanqa Señor sinch'ita jasut'iwachun manachus Davidwan ruwayman chay Señorpa nisqasninta, chayqa.

¹⁰Saulpa ayllunmanta reinota qhechuspa, Davidtataj churachun Israel ayllupi, jinataj Judá ayllupipis rey kanampaj, Dan jallp'amantapacha Beerseba jallp'akama!

¹¹Is-bosettaj mana uj palabrallatapis Abnerman kutichiyta aterqachu, manchachikusqanrayku.

¹²Abnertaj Davidman willacherqa: Pejpatataj kay jallp'ari? Uj tratota ruwana: Noqa atisqayta ruwasaj tukuy Israel ayllu qanman kutimpunampaj, nispa.

¹³Davidtaj kuticherqa: Walej kanman qanwan tratoman yaykunanchejqa, kay nisusqayta ruwanayki kajtenqa: Noqaman jamuwaspaqa pusamunawaykipuni tiyan, Saulpa warmi wawan Micalta.

¹⁴Chay jawa, Davidqa kachallarqataj Is-bosetman kay willaytawan: Qopuway warmiy Micalta, noqaqa paywan casarakorqani, pachaj filisteospa phichilu qarasninta tatanman jaywaspa.

¹⁵Chaypacha Is-bosetqa kamacherqa, Laispa wawan Paltielmanta warmin Micalta qhechunankuta.

¹⁶Paltieltaj warmimpa qhepanta waqaspa rerqa Bahurim llajtakama. Chaypitaj Abnerqa Paltielta kamacherqa kutipunanta, jinataj payqa kutiporqa.

¹⁷Aswan qhepanejtataj, Abnerqa parlarqa Israelpa kurajkunasninwan nispa: Ñaupajmantaña qankunaqa David reyniykichej kananta mask'ashankichej.

¹⁸Walej, kunanqa chayta ruwaychej, Señorqa nerqapuni Davidnejta librananta Israel nacionninta chay filisteospa makisninmanta, jinataj tukuy enemigosnimpa atiyninmantapis.

¹⁹Abnerqa parlallarqataj Benjamimpa ayllunmanta kajkunawan. Chaymantataj rerqa Hebronkama Davidman willamunampaj, Israel ayllumpi imatachus ruwanayashasqankuta, jinataj Benjamimpa ayllunmanta kajkunapis.

²⁰Abnerqa, iskay chunka runaswan Hebronman chayarqa, David kasharqa chayman. Davidtaj, uj sumaj mikhuyta wakicherqa paypaj chay runasnimpaj ima.

²¹Chaymanta Abnerqa Davidman nerqa: Kunanqa rinay kanqa tukuy Israel ayllumanta kajkunata tantamoj qanwan uj tratoman yaykunankupaj, jinamanta qan kamachinaykipaj munasqaykiman jina. Davidtaj, Abnerta kacharpayarqa, paytaj kusisqa riporqa.

²²Joabtaj, Davidpa runasninwan ima, chay kikin ratopuni purisqasninkumanta chayamorqanku, enemigosninkumanta tukuy imasta qhechumusqasninkuta aparisqas. Abnerqa mana Davidwanñachu Hebrompi kasharqa, payqa David kacharpayajtinkama kusisqalla ripusqa.

²³Joab tukuy soldadosninwan khuska chayamojtinkama, payman willarqanku, Nerpa wawan Abnerqa reywan kasqanta, chanta kusisqalla ripusqanta rey kachapojtinkama.

²⁴Chaypacha Joab rerqa reyta watukoj, nerqataj: Imatataj ruwarqanki reyníy? Abnerqa qanman jamusqa, qanrí ripojta saqellasqanki.

²⁵Manachu reyníy reparakunki Nerpa wawan Abnerqa, qanta ch'aukiyasoj jamususqanta, wateqanasojtaj, maymanchus risqasniykita, tukuy ruwasqasniykitapis yachanampaj?

²⁶Joabqa, Davidwan parlasqanmanta llojsiytawan, Abnerta mask'achejta kacharqa, Davidpa mana yachasqallan. Chay kachasqa, Sira nisqa pujyumanta Abnerta kutichimorqanku.

²⁷Abner, Hebronman chayamojtinkamataj, Joabqa llajta punkumanta wajnejman pusarqorqa sapallampi parlamunampaj, chaypitaj wijsampi t'ojsispa wañorparicherqa, hermanon Asaelpa wañuchisqanmanta vengakuspa.

²⁸Davidtaj chayta yachaytawan nerqa: Noqawan reinoywanqa mana juchayojchu kayku Señorpa ñaupaqempi Nerpa wawan Abner wañusqanmantaqa.

²⁹Juchachasqa kayqa urmachun Joabpa patanman, jinataj tukuy ayllumpa patanman, kunanqa wasimpi kajkunaqa onqollachunkupuni yawar apaywan, lepra onqoywan, chayri wist'u chaki kaywan, wañuchisqas kachunku chayri yarqhaymanta ñak'arichunku!

³⁰Joabwan Abisaiwan wañucherqanku Abnertaqa, Gabaón maqanakupi hermanonkuta wañuchisqankurayku.

³¹Chaymantaqa David kamacherqa Joabta, paywan kaj runasninta ima: P'achasniykichejta llik'iychej, qhashqa p'achastataj churakuychej, waqaychejtaj, Abner wañusqanmanta, nispa. Rey Davidtaj aya cajompa qhepanta rerqa.

³²Abnertarí p'amparqanku Hebrón llajtapi. Chaypi reyqa sinch'ita waqayta qallarerqa Abnerpa ayan p'ampasqa kasharqa chaypi, tukuy runaspis waqallarqankutaj.

³³Chaypacha reyqa kay llakiy wayñuta takerqa: Abner, imaraykutaj uj wampu runa jina wañunayki karqarí?

³⁴Makisniykeqa mana watasqaschu karqanku, nitaj chakisniykipis cadenaswan ch'ipasqaschu karqanku. Qanqa, chay sajra runaspa makimpi wañunku, jinata wañorqanki! Ajinallatataj runaspis Abnermanta ujtawan waqarqanku.

³⁵Chaymanta tukuynin ayllu Davidman jamorqanku, mañanankupaj pay mikhunanta manaraj ch'isiyamushajtin. Davidtaj jurarqa paykunaman nispa: Señor sinch'ita jasut'iwachun, t'antata chayri ima mikhuyllatapis manaraj ch'isiyamushajtin llamejteyqa!

³⁶Tukuy aylluntin chayta yachaspa allimpaj reyta qhawarqanku, tukuy ruwasqasnenqa allimpuni paykunaman rijch'arqa.

³⁷Chay diapi tukuy israelitasqa, cheqamanta yacharqanku rey Davidqa mana ima juchayoj kasqanta Nerpa wawan Abnerpa wañuyninmantaqa.

³⁸Chaymanta reyqa chay yanapajkunasninman nerqa: Qankuna yachankichej jina, Israel ayllu ukhupi uj kuraj kamachejninku, wapu runa kunan chinqasqanta.

³⁹Diospa churasqan rey kayniywampis mana kallpayoj jina kashani, Sarviaj wawasnin chay millayta ruwasqankurayku. Señor, chay juchanman jina, qopuchun chayta ruwaj runamanqa!