Read Quechua Bolivia DC Bible 1 REYES 10 Bible Online

1 REYES 10 - Quechua Bolivia DC Bible bible

1 REYES 10

¹Sabamanta reinaqa Salomompa may mentasqa kasqanta uyarispa, atiytataj taripasqanta Señorpa sutimpi, jamorqa mana kutichiy atina tapuykunaswan.

²Jerusalenmantaj ashkha compañamojkunaswan chayamorqa, camellospi chajnaykuspa q'apaj imasta apamorqa, ashkha qorita, valorniyoj k'acha rumistawan. Salomonman chayamuspataj imatachus sonqompi yuyarqa chay tukuyta taporqa.

³Chanta Salomonqa tukuy tapusqanta willarqa, manataj imapis mana kutichiyta atisqanqa karqachu.

⁴Chanta Sabamanta reinaqa rikuspa Salomompa tukuy yachayninta, chay wasita ruwachisqantapis, jinallataj mesampi mikhunasta rikuspa, kurajkunasnimpa wasisninta, kamachisnimpa rijch'ayninta p'achasnintawan, ujyanasninta jaywajkunata, Señorpa wasimpi q'olachinasta jaywasqantapis rikhuspa, t'ukushaj qhepaqorqa.

⁶Reymantaj nerqa: Llajtaypi kashaspa qampa ruwasqasniykimanta yachayniykimantawan uyarisqayqa cheqapuni kasqa.

⁷Manataj noqaqa creerqanichu, noqa kikiy jamuspa ñawisniywan rikunaykama, chaywampis mana khuskallampis niwasqankuchu, yachayniykeqa kapuyniykipis uyarisqaymanta astawanraj kasqa.

⁸Kusikuyniyojmin runasniyki kamachiyniykipis kanku, qampa ñaupaqeykipipuni kaspa, yachayniykimanta uyarispa.

⁹Señor Diosniyki yupaychasqa kachun, qanta ajllakususqanmanta, Israelpa trononman churasunampaj; imaraykuchus Señorqa Israelta munakumpuni wiñaypaj, kamachej kanaykipajtaj churasunki, cheqanta cheqa kajtataj ruwanaykipaj.

¹⁰Paytaj reyman kinsa waranqa isq'on pachaj sojta chunkayoj kilos qorita qorqa, ashkha q'apaj jawinasta, ashkha valorniyoj rumistawan. Mana jayk'ajpis chay chhika jawinasqa Israelman jamojchu, rey Salomonman Sabamanta reinaj qosqan jinaqa.

¹¹Hirampa jatuchaj buquesnintaj Salomompaj apamullarqataj Ofirmanta qorita, sándalo sach'amanta ashkha k'aspista, valorniyoj rumistawan.

¹²Chay sándalo k'aspismantataj Salomonqa ruwacherqa Diosta yupaychana wasipi jap'ikuna k'aspisninta, jinallataj reypa wasimpipis, takejkunapajpis chay k'aspismanta ruwachillarqataj arpasta, salteriostawan: Manataj jayk'ajpis chay chhika sándalo k'aspisqa jamojchu, nitaj ujtawampis kunankama rikukunñachu.

¹³Rey Salomontaj Sabamanta reinaj tukuy mañasqanta qorqa; Salomompa qosqasnintaj wajllaraj karqa. Chanta Sabamanta reinaqa llajtanman kutiporqa tukuynin kamachisninwan khuska.

¹⁴Salomompa sapa wata qori jap'isqanqa iskay chunka iskayniyoj waranqa kilos pesarqa.

¹⁵Wajllaraj karqa chay rantikojkunas, chay sumaj q'apaj jawinasta qhatojkunas, Arabiamanta tukuynin reyes, Israelmanta tukuy kurajkunaspiwan tasata apamuskankoqa.

¹⁶Rey Salomonqa ruwacherqa iskay pachaj jatuchej escudosta qori puro unuyachisqamanta, sapa ujnin escudomantaj sojta kilos qori yaykorqa.

¹⁷Ruwachillarqataj kinsa pachaj juch'uy escudostawan, chaykunamantaj yaykorqa uj kilo khuskanniyoj qori, Monte Líbano nisqa wasinmantaj chaykunata reyqa churarqa.

¹⁸Jatun tiyanata reyqa ruwachillarqataj marfilmanta, chaytataj qori purowan lluch'iykorqa.

¹⁹Chay tiyanataj sojta patillasniyoj karqa, qhepa ladompitaj patanman muyulla khatayoj karqa, puraj ladopitaj iskay maki atikunasniyoj karqa, chaykunaj qayllampitaj iskay leones churasqas karqa.

²⁰Kallarqataj chunka iskayniyoj leones churasqas sojtantin sarukunaspi puraj ladompi ujkama. Manataj ni mayqen reinopipis chayman rijch'akoj ruwakorqachu.

²¹Rey Salomompa tukuynin ujyanan vasosqa qori puromanta karqa, ajinallataj tukuynin mikhunapaj imasnin Monte Líbano nisqa wasimpi qori puromanta karqa. Manataj qolqemanta imapis karqachu, imaraykuchus Salomompa p'unchaykunasnimpi qolqeqa mana ancha munasqachu karqa.

²²Imaraykuchus reypata tiyaporqa jatuchaj buquesnin mar qochapi Hirampa buquesninwan khuska, sapa kinsa watamantataj uj kutita Tarsismanta chayamoj kanku, apamuspa: qorita, qolqeta, marfilta, monosta, pavo realesta ima.

²³Ajinata rey Salomonqa kay pachapi tukuynin reyesta atiparqa yachaypi qhapaj kaypipis.

²⁴Tukuy runastaj Salomompa uyanta rikuyta munaj kanku, uyarinankupaj chay chhika yachayta Dios payman qosqanta.

²⁵Tukuytaj payman apamoj kanku sapa wata chaparata jina, qolqeta, qorita, p'achasta, armasta, sumaj q'apaj jawinasta, caballosta, mulasta ima.

²⁶Salomontaj tantaykorqa carretasta, caballospi purejkunatawan; tiyaporqataj waranqa tawa pachajniyoj carretasnin, chunka iskayniyoj waranqa caballospi purejkunasnin, chaykunatataj churarqa carretaspaj chay llajtasman, wakintaj Jerusalempi reywan qhepakorqanku.

²⁷Reytaj Jerusalempi qolqetaqa tantaykorqa rumista jinapuni; cedro k'aspistapis chay pampaspi k'ita higos sach'asta jinapuni.

²⁸Salomonmantaj Egiptomanta apamoj kanku, caballosta, p'achastawan; imaraykuchus reypa rantejkunasnin rantimoj kanku caballosta p'achastapis.

²⁹Egiptomanta apachimusqa carretaqa valej sojta pachaj qolqes, caballostaj sapa uj, pachaj phishqa chunkayoj qolqes, Salomompa rantejkunasninmanta tukuy reyes heteos, siriamanta kajkunapis rantikoj kanku chay tukuy imasta.