Read Quechua Bolivia DC Bible 1 REYES 19 Bible Online

1 REYES 19 - Quechua Bolivia DC Bible bible

1 REYES 19

¹Acabtaj Jezabelman willarqa Eliaspa tukuy ima ruwasqanmanta, imaynatachus chay Baalpa tukuy profetasninta cuchillowan wañurachisqanmantawan.

²Chaymantaqa Jezabelqa Eliaspaman ujnin kamachinta kacharqa, nichispa. Sichus q'aya kay horasta profetasta wañucherqanki chaykunata jina mana ruwasojteyqa, dioskunasniy jasut'iwachunku, nispa.

³Chay jina paypaj mana allin kasqanta rikuspa, Eliasqa jatariytawan riporqa kausayninta librananrayku, Judapi Beerseba llajtaman chayarqa, chay pitaj kamachinta saqeporqa.

⁴Ch'in pampanejta riporqa uj p'unchay puriyta jina, chaypitaj retama sach'a uraman tiyaykukorqa wañupuyta munaspa, nerqataj: Chayllaña kachun, Señorníy, kausayniyta qhechupuwan, noqaqa mana aswan sumajchu kani tatasniymanta nisqaqa.

⁵Retama sach'a urapi winkuspa puñurpariporqa. Chaymantataj Señorpa uj angelnin chimpaykuspa, nerqa: Jatarikuy mikhuytaj, nispa.

⁶Chanta paytaj qhawatataspa, uman chaynejpi rikorqa un t'antata nina k'ajajpi chayasqata, uj yurupitaj yakutawan; mikhuykuspa ujyaykuspataj, watejmanta puñuykullarqataj.

⁷Señorpa angelnintaj kutimorqa, chimpaykuspataj, nerqa: Jatarikuspa mikhuy, imaraykuchus karutaraj rinayki kanman.

⁸Jatarikuytawanqa, mikhorqa ujyarqataj; chay mikhusqanwantaj kallpachakorqa chanta tawa chunka p'unchayta tawa chunka tutatawan purerqa Diospa orqon Horebman chayanankama.

⁹Chaypitaj uj chhanka jusk'uman yaykorqa, chaypitaj chay tutaqa puñorqa. Señorpa palabrantaj payman jamorqa: Elías, imata kaypi ruwashankiri?, nispa.

¹⁰Paytaj kuticherqa: Tukuy Atiyniyoj Señor Diosníy, noqaqa anchatapuni qanmanta sienteni, imaraykuchus israelitasqa tratota ruwasqaykita saqerparinku, altaresniykita urmachinku, profetasniykitapis espadawan wañurachinku; noqa sapallayña qhepakuni, chaywampis wañuchinawankupaj mask'ashawankuraj.

¹¹Señortaj nerqa: Llojsimuy jawaman, chay orqopitaj Señorpa ñaupaqempi sayakuy. Señortaj pasarqa, uj jatun wayrataj qaqasta urmachimuspa wayrarqa Señorpa ñaupaqempi, Señortaj mana chay wayrapichu kasharqa; chay wayraj qhepampitaj uj jallp'a ikhakuy karqa, Señortaj mana chay jallp'a ikhakuypichu kasharqa.

¹²Chay jallp'a ikhakuypa qhepampitaj uj ninañataj karqa, Señortaj mana chay ninapichu kasharqa. Chay ninaj qhepampitaj uj k'acha wayrata silvay jina uyarikorqa.

¹³Eliastaj chayta uyarispa, ponchonwan uyanta suk'umpaykukorqa; llojsimuspataj chay chhanka jusk'u punkuman jamorqa. Chaypitaj payman uj parlay jamorqa: Elías, imata kaypi ruwashankiri?, nispa.

¹⁴Eliastaj kuticherqa: Tukuy Atiyniyoj Señor Diosníy, noqaqa anchatapuni qanmanta sienteni; imaraykuchus israelitasqa tratota ruwasqaykita saqerparinku, altaresniykita urmachinku, profetasniykitapis espadawan wañurachinku; noqa sapallayña qhepakuni, chaywampis wañuchinawankupaj mask'ashawankuraj.

¹⁵Señortaj payta nerqa: Jatariy, ñan jamusqaykita kutipuy, Damasco ch'in pampanejta, chayaspataj Azaeltaqa jawiykunki Siriapi kamachej kanampaj.

¹⁶Nimsej allchhin Jehuta jawiykunki Israelpi kamachej kanampaj; Abel-meholamanta Safatpa wawan Eliseotataj jawiykullankitaj qampa cuentaykipi profeta kanampaj.

¹⁷Pichus Hazaelpa espadanmanta ayqekojtaqa Jehú wañuchenqa, Jehój espadanmanta ayqekojtataj Eliseo wañuchenqa.

¹⁸Israelpitaj noqaqa qanchis waranqata qhepachikusaj pikunachus Baalpa ñaupaqempi mana qonqorikorqankuchu, nitaj siminkupis lantinta much'arqankuchu.

¹⁹Chaymanta ripuspataj Eliasqa Safatpa wawan Eliseota tarerqa, paytaj chunka iskayniyoj yuntaswan llank'achisharqa, chaykunamanta ujnin yuntawantaj aswan qhepata risharqa. Eliastaj paypa ñaupaqenta pasarqoshaspa ponchonta Eliseoj patanman choqaykorqa.

²⁰Chanta paytaj chay yuntasta saqerpayaspa Eliaspa qhepanta apurayta rerqa, nerqataj: Mañakuyki ari, tatayta mamantawan rispa much'aykamunayta, chantataj qanta qhatisqayki. Eliastaj payta nerqa: Rispa kutillay, noqa qanta imanashaykitajri?

²¹Kutispataj Eliseoqa iskay torosta jap'ispa ñak'arqa, chay aradosllawantaj aychasta kankarqa, tukuynin runasmantaj mikhunankupaj qorqa. Chaymantataj jatarikuspa Eliaspa qhepanta rerqa, paytataj sirverqa.