Read Quechua Bolivia DC Bible 1 REYES 8 Bible Online

1 REYES 8 - Quechua Bolivia DC Bible bible

1 REYES 8

¹Chanta Salomonqa paypa ñaupaqenman Jerusalempi tantacherqa tukuynin Israelmanta kurajkunasta, sapa ayllumanta kurajkunasta, israelita familiasmanta kurajkunasninkutawan, Señorpa trato cajonninta apachimunampaj Davidpa llajtampi Sionmanta.

²Tukuynin Israelmanta runastaj rey Salomonwan tantaykukorqanku, Etanim nisqa chay killapi, chayqa qanchis kaj killa karqa, chaypacha may jatun raymita ruwarqanku.

³Israel ayllumanta tukuynin kurajkunasnin jamorqanku, sacerdotestaj Señorpa trato cajonninta jap'erqanku,

⁴Aparqankutaj Señorpa trato cajonninta, Dioswan tinkukuna toldota, chaypi imaschus karqa chaykunatawan, chay apajkunaqa karqanku sacerdoteswan levitaswan.

⁵Rey Salomonwan tukuynin Israelmanta runaspiwan Diospa trato cajonnimpa ñaupaqempi tantasqas kasharqanku, Diosman ñak'asqa ovejasta, wakastawan jaywaspa, may chhika kasqanraykutaj mana yupaytapis aterqankuchu.

⁶Sacerdotestaj apaykorqanku Señorwan trato ruwasqa cajonta wasi ukhuman, churarqankutaj Diospa tiyakunan cheqaman, querubinespa lijrasnin uraman.

⁷Chay querubinesqa lijrasninku aysarparisqas kasharqanku chay trato cajón patapi; ajinamanta lijrasninkuwan pakaykorqanku trato ruwasqa cajonta varasnintawan.

⁸Chay varasnimpa puntasnin jatuchaj kasqankurayku rikukoj kanku Diospaj t'aqasqa cheqamantapacha, chay cheqaqa Diospa tiyaykunampa ñaupaqempi karqa, chaywampis aswan jawamantaqa mana rikukorqachu, chaypi kunankama kakushan.

⁹Chay trato cajompeqa p'alqayoj p'alta rumilla kasharqa Horebpi Moisespa churasqan, chayqa karqa israelitaswan Diospa trato ruwasqan egiptomanta llojsimushajtinku.

¹⁰Sacerdotes Diospa tiyakunan llojsimojtinkukama Señorpa wasinman phuyu junt'aykorqa.

¹¹Sacerdotestaj manaña chaypi yupaychanankupaj qhepakuyta aterqankuchu phuyu kasqanrayku, imaraykuchus Señorpa k'anchaynin chay wasiman junt'aykusqa.

¹²Chanta Salomonqa nerqa: Qan Señor nerqanki laqhayaypi tiyakusqaykita.

¹³Noqataj ruwapuyki uj yupaychana wasita chaypi wiñaypaj tiyakunaykipaj.

¹⁴Chanta reyqa tukuynin israelitas sayasharqanku chaykunaman kutirikuspa bendicerqa

¹⁵Nerqataj: Bendicisqa kachun Israelpa Señor Diosnenqa, payqa tatay Davidman parlasqanta kunan junt'an kay jinata nisqanta:

¹⁶Israel llajtayta Egiptomanta orqhomorqani chay p'unchaymantapacha, manataj ajllakorqanichu ni mayqen llajtata tukuynin Israel ayllusmanta, wasita ruwapunawankupaj noqaj sutiy chaypi kanampaj. Chaywampis Davidta ajllakorqani Israel llajtayta pay kamachinampaj.

¹⁷Tatay Davidtaj sonqompi yuyarqa uj wasita ruwayta Israelpa Señor Diosnimpa sutimpi.

¹⁸Chanta Señorqa tatay Davidman nerqa: Allinman sonqoykipi uj wasita sutiykipi ruwapusqayki nispa nisqaykeqa, chay jinata yuyaspaqa cosata ruwanki.

¹⁹Chantapis mana qanchu ruwanki chay wasitaqa, qanmanta nacej wawayki, paymá noqaj sutiypi wasitaqa ruwanqa.

²⁰Señortaj nisqanta junt'an, imaraykuchus noqa jatarerqani tatay Davidpa cuentampi, tiyakunitaj Israelpa tornompi, Señor nisqanman jina, ruwanitaj uj wasita Israelpa Señor Diosnimpa sutimpi.

²¹Chaypitaj uj cheqata wakichini Señorpa trato ruwasqa cajonnimpaj, chaypitaj kashan ñaupa tatasninchejwan Diospa trato ruwasqan, Egiptomanta llojsimorqanku chaypacha.

²²Chanta Salomonqa Señorpa altarnimpa ñaupaqempi, tukuynin Israelmanta runas rikushantin sayaykorqa, makisninta janaj pachaman oqharispa; nerqataj: Israelpa Señor Diosnin mana qan jina waj Diosqa janaj pachapi kanchu, nitaj kay jallp'a patapipis, qanqa tratoykita waqaychanki khuyakuyniykitapis kamachisniykiman rikuchinki, qampa ñaupaqeykipi tukuy sonqowan purejkunaman.

²³

²⁴Imatachus tatay Davidman nisqaykita kunan junt'anki, nisqaykiman jina ruwaspa imaynachus kunan p'unchay kashan jina.

²⁵Kunantaj ari, Israelpa Señor Diosnin, junt'allaytaj imatachus tatay Davidman nisqaykita, nispa: Noqaj ñaupaqeypi mana pisisonqachejchu uj qhari wawa Israelpa tronompi tiyaykukojqa, sichus wawasniyki kamachisqasniyta waqaychanqanku, ñankunasniypitaj purenqanku, imaynatachus qampis purerqanki noqaj ñaupaqeypi ajinata chayqa.

²⁶Kunantaj, Israelpa Señor Diosnin, junt'ay ari kamachiyki tatay Davidman nisqaykita.

²⁷Kunanqa, cheqamantachu Diosqa jallp'a patapi tiyakunman? Janaj pachakuna aswan patapi janaj pachakunapis mana atisunkuchu jap'isuyta. Imaynatataj kay wasita ruwapususqaypi tiyakuyta atiwajri?

²⁸Chay tukuywampis, qanqa uyarillawankipuni kay kamachiykej mañakusqantaqa, willakususqantapis, Señor Diosníy, uyarispa tukuy qhaparikususqayta mañakususqaytapis qampa ñaupaqeykipi.

²⁹Tuta p'unchay kay wasita qhawarispa, ñawisniyki kicharisqa kachun, kay wasimanta qanqa nerqanki: Noqaj sutiy chaypi kanqa, nispa. Uyariytaj kay kamachiykej mañakuyninta kay wasipi.

³⁰Uyariy ari, kay kamachiykej mañakusqanta, Israel llajtaykejtapis, kay cheqapi mañakojtinu, janaj pachapi tiyakunki chaymantapacha uyariwayku perdonawaykutaj.

³¹Pillapis runa masimpa contrampi juchallikojtin, juramentotataj kay wasipi altarpa ñaupaqempi ruwachinkuman chayqa, qantaj janaj pachamantapacha uyarimunki ruwankitaj, kamachisniykita justiciata ruwanki. Juchayoj kajtaqa juchasninman jina jasut'inki, paypa patanman chay juchan urmamuchun, mana juchayojmantaj ruwasqanman jina qopunki.

³²

³³Sichus kay llajtayki enemigosninwan atipachikunman, contraykipi juchallikusqankurayku, chanta juchankumanta kutirikuspa sutiykita oqharinkuman, kay wasipitaj tukuy sonqo mañakusunkuman chayqa, janaj pachamanta uyarimunki perdonankitaj Israel llajtaykej juchasninta, ñaupa tatasninkuman jallp'a qosqaykimantaj paykunata kutichimpunki.

³⁴

³⁵Sichus janaj pacha wisq'akunman manataj paramunmanchu, paykuna qampa contraykipi juchallikusqankurayku, juchasninkumanta kutirikuspa kay wasipi mañakusunkuman, sutiykita oqharispa qan llakichisqaykirayku chayqa, Qanqa janaj pachamanta uyarimunki, kamachisniykej juchasninta pampachaspa, Israel llajtaykejtawan, yachachispa allin ñanniykipi purinankupaj; paratapis jallp'aykiman apachimunki, mayqentachus aylluykiman chayaqenkupaj qorqanki chayman.

³⁶

³⁷Sichus kay jallp'api kanman yarqhay, chajra qhawiy, chajraspi onqoy, langostas, t'una khuruspis; sichus enemigosninku llajtasninkuta muyuykuspa maqaj sayaykunkuman, ima llakiyllapis onqoypis jamojtenqa, tukuy imata mayta mañakusqankuta mayqennillankupis, chayri tukuynin Israel llajtaykipis, pillapis sonqompi phutisqa kaspa, makisninta kay wasiman aysarisqa jamusunkiman chayqa, qan janaj pachamanta uyarimunki ari, maypichus tiyakunki chaymantapacha, perdonankitaj, sapa ujninkuman kausasqankuman jina qospa, imaraykuchus qanllamin tukuy runaspa sonqonkuta, tukuy yuyasqankutapis rejsinki.

³⁸

³⁹

⁴⁰Qanllata manchachikusunankupaj ima jallp'atachus ñaupa tatasniykuman qorqanki chaypi kausanankukama.

⁴¹Ajinallatataj mana israelita kaj karu llajtayojpis jamusunkiman jatun sutiykitaj uyarispa, imaraykuchus uyarenqanku sutiyki manchay jatun kasqanta, jatun atiyniykimantapis, kay wasiman mañakusojtaj jamusunkuman chayqa, qanqa janaj pachamanta uyarimunki, maypichus tiyakunki chaymantapacha, qantaj ruwanki karu llajtayoj mañakususqanman jina, chay jinamanta tukuy naciones rejsisunankupaj, sutiykita manchachikunankupaj Israel llajtayki jina, yachanqankutaj sutiyki oqharisqa kasqanta kay ruwapususqay wasipi.

⁴²

⁴³

⁴⁴Maypachachus llajtayki maqanakuman llojsinman enemigosnimpa contrampi, ima ñantachus qan niwaj rinankuta chaynejta, mañakunkumantaj Señormanta, qhawarimuspa kay llajta ajllakusqaykita, sutiykipi kay wasi ruwapususqaymampis chayqa, qan janaj pachamantapacha uyarimunki mañakuyninkuta, rogakusqankutapis, paykunamantaj justiciata ruwanki.

⁴⁵

⁴⁶Sichus contraykipi juchallinkuman, imaraykuchus mana kanchu uj runallapis mana juchallejqa, paykunaj contrankupi phiñakuspataj enemigosninkoj makisninkuman paykunata jaywaykuwaj, presosta waj llajtaman apanankupaj, karuman kajtin qayllaman kajtimpis.

⁴⁷Paykunataj maypichus presos kasqankupi sonqonkupi yuyarikunkuman, chantá qanman kutirikamusunkuman, chaypitaj mañakuspa nisunkuman: Noqayku juchalliyku, mana allin kajta ruwayku, juchayojpuni kayku, nispa.

⁴⁸Chantaqa tukuy sonqonkuwan tukuy almankuwantaj qanman kutirikamusunkuman, maymanchus enemigosninku presosta aparqanku chaypi, qanmantataj mañakamusunkuman tatasninkuman qorqanki chay jallp'aman kutirisqas, ajllakorqanki chay llajtaman, sutiykipi noqa ruwaporqayki chay wasinejmanwan chayqa, Qanqa janaj pachamanta uyarimunki maypichus tiyakunki chaymantapacha, mayta mañakusqankuta, qantaj paykunaman justiciata ruwanki.

⁴⁹

⁵⁰Qampa contraykita llajtayki juchallikusqanta perdonanki, tukuy imaymana pantasqankuta qampa contraykipi, qantaj ruwanki pikunachus presosta apajkuna paykunamanta khuyarikunankuta.

⁵¹Imaraykuchus paykunaqa llajtayki chayaqeykitaj kanku, mayqentachus qan orqhomorqanki Egiptomanta fierro hornomanta jina.

⁵²Kamachiykej mañakusqantataj ñawisniyki allinta qhawamuchun ari, Israel llajtaykej mañakusqantawan, uyarinaykipaj tukuy imatachus mañakusqankuta.

⁵³Imaraykuchus qanqa paykunata ajllakorqanki chayaqeykipaj kay jallp'a patapi tukuy naciones ukhumanta, imaynatachus kamachiyki Moisesnejta nisqaykiman jina, maypachachus tatasniykuta Egiptomanta orqhomorqanki, Señor Diosníy, nispa.

⁵⁴Salomonqa altarpa ñaupaqempi mayta mañakuyta tukuytawan, qonqorikusqanmanta makisninta janaj pachaman oqharispa jatarikorqa.

⁵⁵Sayarikuspataj tukuynin israelitas tantasqasta bendicerqa, jatunmanta parlaspa, nerqataj: Yupaychasqa Señorqa kachun, sonqo tiyakuyta Israel llajtanman qosqanmanta, imaynachus pay nisqanman jina, manataj ujpis mana junt'asqanqa kanchu, kamachin Moisesnejta nisqantaqa.

⁵⁶

⁵⁷Señor Diosninchejqa noqanchejwampuni kachun, imaynatachus tatasninchejwan karqa ajinata, amataj saqerpariwasunchu, nitaj qhesachawasunchu.

⁵⁸Sonqonchejta payman k'umuykuchichun tukuynin ñankunasnimpi purinanchejpaj, waqaychananchejpaj kamachisqasninta, leyesninta, nisqasninta ima; ñaupa tatasninchejman kamacherqa chaykunata.

⁵⁹Kunan kay mañakusqasneyqa Señorpa ñaupaqempi tuta p'unchay kachun, pay kamachinta, Israel llajtantawan sapa ujta maychus tiempompi jark'anampaj.

⁶⁰Ajinamanta chay jallp'a patapi tukuynin naciones yachanankupaj, Señorlla Dios kasqanta, manataj waj kasqanta.

⁶¹Señor Diosninchejwan sonqoykichej cheqampuni kachun, purispa nisqasnimpi, tukuy kamachisqasninta waqaychaspataj kunan p'unchay jina.

⁶²Chaymanta, reyqa tukuynin israelitaspiwan uywa ñak'asqasta Señorman jaywarqanku.

⁶³Salomontaj Señorman allinyakuy jaywanasta qorqa, iskay chunka iskayniyoj waranqa torosta, pachaj iskay chunkayoj waranqa ovejastawan. Ajinata reywan tukuynin israelitaspiwan Señorpa wasinta Diosman jaywarqanku.

⁶⁴Jaqhay p'unchayllapitaj reyqa, Señorpa wasimpa ñaupaqempi kasharqa chay patioj chaupinta llimphucharqa; imaraykuchus chaypi jaywarqa q'olachinasta, ch'aki mikhuyta, allinyakuy wirastawan; Señorpa ñaupaqempi broncemanta chay altarqa juch'uy rikhurisqanrayku chayman mana yaykuyta aterqañachu q'olachinas, ch'aki mikhuy jaywanas, allinyakuy wiraspis.

⁶⁵Chay p'unchaykunapi Salomonqa tukuy israelitaswan khuska jatun fiestata ruwarqa, ashkhapuni tantakamorqanku, Hamat chaymantapacha Egipto mayu chaynejkama, chay fiestataqa Señor Diosninchejpa ñaupaqempi qanchis p'unchayta ruwarqanku, chanta uj qanchis p'unchaytawanraj ruwallarqankutaj, tukuynimpi chunka tawayoj p'unchayta.

⁶⁶Pusaj kaj p'unchaypitaj tukuynin runasta kacharpayaporqa, paykunataj reyta bendicispa wasisninkuman riporqanku, ancha jatun kusiywampuni, sonqo junt'asqastaj, Señor chay jina bendicionesninta kamachin Davidman, Israel llajtanmanwan qosqanrayku.