Read Quechua Bolivia DC Bible 2 REYES 1 Bible Online

2 REYES 1 - Quechua Bolivia DC Bible bible

2 REYES 1

¹Acab wañupusqanmanta qhepata, Moab llajtayoj runas Israelpa contrampi oqharikorqanku.

²Ocoziastaj Samariapi wasimpi kashaspa ventanamanta urmaykamorqa. Ajinamanta onqosqa kashaspa kamachisninta kacharqa: Riychej, Ecrón llajtaj diosnin Baal-zebubta tapurimpuwaychej thañikapusajchus manachus chayta, nispa.

³Chanta Señorpa angelnin tisbita Eliasman nerqa: Samariamanta reypa kamachisninta taripaj riy, paykunamantaj ninki: Manachu Israelpeqa Dios tiyan Ecrompa diosnin Baal-zebubta rispa tapukamunaykichejpaj?

⁴Chayrayku Señorqa kay jinata nin: Chay camaykimanta mana jatarinkiñachu, kikimpitaj wañupunki. Chaymanta Eliasqa riporqa.

⁵Chay kachas reypaman kutimpojtinkutaj payqa nerqa: Imaraykutaj kutimpunkichejri?

⁶Paykunataj kuticherqanku: Uj runawan ñampi tinkukuyku, chanta payqa niwayku: Kutipuychej, kachamusorqachej chay reymantaj kay jinata niychej: Ajinata Señorqa nin: Israelpeqa manachu Dios tiyan Ecrompa diosnin Baal-zebubman kachaspa tapuchikamunaykipaj? Chayrayku kunanqa camaykimanta mana jatarimunkiñachu, kikimpitaj wañunki, nispa.

⁷Chanta reyqa paykunata nerqa: Imayna rijch'ayniyojtaj karqa chay palabrasta nisorqachej chay tinkusqaykichej qhariri?

⁸Paykunataj kuticherqanku: Millma p'achayoj qhari, qara chumpiyojtaj karqa. Chanta reyqa nerqa: Chayqa tisbita Elías kanqa, nispa.

⁹Chaymantaqa kacharqa phishqa chunka soldadosta capitannintawan. Paytaj wicharerqa uj orqo puntaman, maypichus Diospa runan Elías tiyasqa kasharqa chayman. Capitantaj kay jinata nerqa: Diospa runan, reyqa kunampacha uraykamuchun nisunki, nispa.

¹⁰Eliastaj capitanman nerqa: Sichus Diospa runan kani chayqa, janaj pachamanta nina uraykamuchun, qanta soldadosniykitawan q'olaykusuchun. Ninataj janaj pachamanta uraykamuspa, paytawan, phishqa chunka soldadosnintawan q'olaykorqa.

¹¹Reytaj watejmanta waj phishqa chunka soldadosta, capitán nintawan kachallarqataj. Kamachejtaj Eliasman nerqa: Diospa runan, reyqa kunampacha uraykamuchun nisunki, nispa.

¹²Eliastaj kutichispa nerqa: Sichus Diospa runan kani chayqa, janaj pachamanta nina, qanta soldadosniykitawan q'olaykusuchun. Janaj pachamantataj nina uraykamuspa, payta soldadosnintawan q'olaykorqa.

¹³Kinsa kaj kutipi watejmanta waj phishqa chunka soldadosta, capitán nintawan kachallarqataj: Paytaj rispa Eliasman chimpakuytawan qonqoriykukuspa mañakorqa: Diospa runan mañakuyki, qampa ñaupaqeykipi noqaj kausayniy kay phishqa chunka soldadosniypatawan kausaynin allimpaj qhawasqa kachun.

¹⁴Qhaway, noqamanta ñaupajta iskay capitánkunas, phishqa chunka soldadosniyojkama jamorqanku. Paykunatataj janaj pachamanta nina uraykamuspa q'olaykorqa, qampa ñaupaqeykipitaj noqaj kausayneyqa allimpaj qhawasqa kachun ari.

¹⁵Chanta Señorpa angelnin Eliasman nerqa: Paywan uraykullay, ama manchachikuychu. Eliastaj jatariytawan reypaman paywan khuska uraykorqa.

¹⁶Paytaj nerqa: Señorqa ajinata nin: Qanqa kachanki tapumojta Ecrompa diosnin Baal-zebuta, manapis Israelpi Diosqa palabranta tapurinaykipaj kanmanchu karqa jina. Chayrayku kunanqa chay camaykimanta mana jatarinkiñachu, cheqamanta kikimpi wañunki.

¹⁷Imaynatachus Señorpa palabran Eliasnejta sut'inchasqa karqa chayman jina Ocoziasqa wañuporqa. Ocoziaspa wawasnin mana ujpis kasqanrayku, paypa cuentampi wauqen Joram kamacherqa, Josafatpa wawan Joram Judapi iskay watataña kamachishajtin.

¹⁸Ocoziaspa tukuy ima waj ruwasqasnin, manachu Israelmanta reyespa ruwasqasninwan khuska libropi qelqasqa kashan?