Read Quechua Bolivia DC Bible 2 REYES 13 Bible Online

2 REYES 13 - Quechua Bolivia DC Bible bible

2 REYES 13

¹Judamanta rey, Ocoziaspa wawan Joás iskay chunka kinsayoj watataña kamachishajtin, Jehojpa wawan Joacazqa Israel aylluta Samariapi kamachiyta qallarerqa. Chunka qanchisniyoj watatataj chaypi kamacherqa.

²Señorpa ñaupaqempitaj sajrata ruwarqa, Nabadpa wawan Jeroboampa jucha ruwasqasninta qhatispa, imaswanchus Israelta juchallicherqa, chaykunamanta mana t'aqakuspa.

³Señorpa sinch'i phiñakuynintaj Israelpa patanman jamorqa, Siriamanta rey Hazaelman, wawan Ben-adadmanwan unaypaj jaywaykorqa.

⁴Joacazqa Señorpa ñaupaqempi mañakorqa, Señortaj payta uyarerqa, imaraykuchus Señorqa imaynatachus Siriamanta rey Israelta ñak'arichisqanta rikorqa.

⁵Señorqa Israelman uj salvajta qorqa. Chaywan siriospa atiyninmanta llojserqanku. Ajinamanta israelitasqa ñaupajta jina wasisninkupi tiyakaporqanku.

⁶Chay tukuywampis Jeroboampa ayllumpa juchasninmanta mana t'aqakorqachu, imaswanchus israelitasta juchallicherqa chaymanta. Paykuna chaykunallapitaj purej kanku. Ajinallatataj Aseraj lantimpis Samariapi kakushallarqapuni.

⁷Joacazpata manaña ashkhachu runas karqa, imaraykuchus Siriamanta rey Hazael tukuyninkutapuni wañuykucherqa, pampapitaj jallp'ata jina saruykorqa. Paypataqa tiyaporqaraj phishqa chunka soldados caballospi rejkuna, chunka carretas, chunka waranqa soldadospiwan.

⁸Joacazpa tukuy ima ruwasqasnin, waj ruwasqasnimpiwan, chhika wapupuni kasqanmantawan, manachu Israelmanta reyespa ruwasqasninku libropi qelqasqa kashan?

⁹Joacaz wañupojtintaj, Samariapi p'amparqanku, paypa cuentampitaj wawan Joás kamacherqa.

¹⁰Judamanta rey Joás kinsa chunka qanchisniyoj watataña kamachishajtin, Joacazpa wawan Joás Samariapi Israelta kamachiyta qallarerqa. Chaypitaj kamacherqa chunka sojtayoj watata.

¹¹Payqa sajrallatapuni Señorpa ñaupaqempi ruwarqa; Nabadpa wawan Jeroboampa tukuy juchasninmanta mana t'aqakorqachu, imaswanchus israelitasta juchallichej chaykunamanta. Chaykunapi payqa purerqa.

¹²Joaspa tukuy ima ruwasqasnin, waj ruwasqasnin, imayna atiywampunichus Judamanta rey Amasiaswan maqanakusqampiwan, manachu Israelmanta reyespa ruwasqasninku libropi qelqasqa kashan?

¹³Joás wañupojtintaj Samariapi p'amparqanku, Israelmanta reyespa covachasnimpi. Paypa tronompitaj Jeroboam tiyaykukorqa.

¹⁴Eliseotaj onqosqa kasharqa, chaywampunitaj wañuporqa. Israelpa reynin Joastaj payta watukoj uraykamorqa, Eliseoj ñaupaqempi waqaspataj nerqa: Tatáy, tatáy! Qanqa Israelpa carretasnin, caballosnin jina karqanki.

¹⁵Eliseotaj payman nerqa: Jap'iy uj flechaj k'aspinta, flechasnintawan. Paytaj uj flechaj k'aspinta jap'erqa, flechasnintawan.

¹⁶Chantataj Eliseoqa Israelpa reyninman nerqa: Makiykita churay flechaj k'aspinman. Paytaj makinta churarqa flechaj k'aspin pataman. Chantataj Eliseoqa reypa makisnin pataman, paypa makisninta churaykorqa.

¹⁷Chanta nerqataj: Inti llojsimuy lado kaj ventanata kichariy. Paytaj ventanata kicharerqa. Eliseotaj nerqa: Flechaykuy, reytaj flechaykorqa. Chanta Eliseoqa qhaparerqa: Señorpa salvación flechan, Siriamanta salvasunampaj flecha! Kunanqa siriostaqa atipanki Afecpi tukuchinaykikama.

¹⁸Watejmanta Eliseoqa reyta nillarqataj: Oqhariy chay flechasniykita. Chanta rey oqharejtintaj, payman nerqa: Pampata flechay, nispa. Paytaj kinsa kutita flechaytawan sayarparerqa.

¹⁹Chantataj Diospa runanqa phiñakuspa payta nerqa: Sichus phishqata sojtatapis flechawaj karqa chayqa, siriostaqa tukuchinaykikama atipaykuwaj karqa, mana uj qhepakunankama. Kunanqa kinsa kutillata ciriostaqa atipanki.

²⁰Eliseo wañupojtintaj, payta p'ampaykaporqanku. Sapa wata tukukuyta suwas moabitasmanta runas Israel jallp'asman jamoj kanku.

²¹Jinataj karqa uj kutipi, uj runata p'ampashajtinku, ujllata rikorqanku chay suwa soldadosta. Kay runaj ayantataj Eliseoj sepulturanman choqaykuytawan ayqekorqanku. Eliseoj tullusninman chay aya chayajtinkamataj chay rato kausariporqa, sayaykamorqataj.

²²Siriamanta rey Azaelqa, Joacazpa tukuy p'unchaykunasnimpi Israelta llakicherqa.

²³Paykunamantataj Señorqa khuyakorqa, khuyaqaspataj paykunata qhawarerqa, Abrahamwan, Isaacwan, Jacobwan ima uj tratota ruwasqanrayku, paypa ñaupaqenmanta manataj wijch'uyta, chinkachiytapis kunankama munarqachu.

²⁴Siriamanta rey Azaelqa wañuporqa, paypa cuentampitaj wawan Ben-adad kamacherqa.

²⁵Joacazpa wawan Joastaj Hazaelpa wawan Ben-adadpa makinmanta kutirachikaporqa, tukuy chay llajtasta, paypa tatan Joacazmanta maqanakupi qhechusqankuta. Joasqa kinsa kutita Ben-adadta atipaspa Israelman chay llajtasta watejmanta kutichiporqa.