Read Quechua Bolivia DC Bible 2 REYES 15 Bible Online

2 REYES 15 - Quechua Bolivia DC Bible bible

2 REYES 15

¹Jeroboam iskay chunka qanchisniyoj watataña Israelpi kamachishajtin, Amasiaspa wawan Azarías Judapi kamachiyta qallarerqa.

²Kamachiyta qallarishaspaqa chunka sojtayoj watayoj karqa. Jerusalempitaj phishqa chunka iskayniyoj watata kamacherqa, mamantaj Jerusalenmanta Jecolías karqa.

³Azariasqa Señorpa ñaupaqempi cheqan kajta ruwarqa, tatan Amasías ruwarqa ajinallatataj.

⁴Chay tukuywampis, lomas patapi kaj qhasi dioskunaj altaresnin mana chinkachisqaschu karqanku. Chay lomas pata altarespi runasqa uywa ñak'asqasta jaywallajpuni kanku, inciensotapis q'osñichej kanku.

⁵Señortajrí lepra onqoywan reyta onqoykucherqa, chay leprawantaj wañunankama onqosqallapuni karqa, uj sapan t'aqasqa wasipitaj tiyakorqa. Reypa wawan Jotamtaj israelitasta kamacherqa.

⁶Azariaspa tukuy ruwasqasnin, waj ruwasqasnimpis, manachu Judamanta reyespa ruwasqasninku libropi qelqasqa kashan?

⁷Azarías wañupojtintaj, Davidpa llajtampi p'amparqanku. Cuentampitaj wawan Jotam kamacherqa.

⁸Judamanta rey Azarías kinsa chunka pusajniyoj watataña kamachishajtin, Jeroboampa wawan Azarías Israelta kamachiyta Samariapi qallarerqa. Chaypi kamacherqa sojta killata.

⁹Señorpa ñaupaqempitaj sajratapuni ruwarqa, imaynatachus tatasnimpis ruwarqanku ajinata. Nedabpa wawan Jeroboampa juchasninmanta mana t'aqakorqachu, imaswanchus israelitasta juchallicherqa chaykunamanta.

¹⁰Jabespa wawan Salumtaj paypa contrampi oqharikorqa, maqaspataj llajtampa ñaupaqempi wañucherqa, chantá paypa cuentampi kamacherqa.

¹¹Zacariaspa tukuy ima ruwasqasnin, waj ruwasqasnin, Israelpa reyesnimpa ruwasqasninku librollapitaj qelqasqa kashan.

¹²Kaytaj Señorpa parlasqanman jina junt'akorqa, mayqentachus kamachin Jehunejta parlarqa: Israelpa tronompi wawasniykeqa tawa mirayniykikama tiyakonqanku. Chanta jinataj karqa.

¹³Judamanta rey Uzías kinsa chunka isq'onniyoj watataña kamachishajtin, Jabespa wawan Salomqa Israelpi kamachiyta qallarerqa. Samariapitaj uj killallata kamacherqa.

¹⁴Imaraykuchus Gadej wawan Manahem Tirsamanta llojsimorqa, Samariaman jamuspataj Jabespa wawan Salumta maqaspa wañucherqa, paypa cuentampitaj kamacherqa.

¹⁵Salumpa tukuy ima ruwasqasnin, waj ruwasqasnin, Zacariaspa contrampi ruwasqasnimpis, Israelmanta reyespa ruwasqasninku libropi qelqasqa kashan.

¹⁶Chanta Manahemtaj Tifsapi kajkunata tukuyninkuta wañucherqa, tukuynin qayllankupi kajkunatawan, Tirsamantapacha; ajinallatataj onqoj warmispa wijsasnintapis kicharerqa punkuta mana kicharisqankurayku.

¹⁷Judamanta rey Azarías kinsa chunka isq'onniyoj watataña kamachishajtin, Gadej wawan Manahem, Israel jallp'api kamachiyta qallarerqa. Samariapitaj chunka watata kamacherqa.

¹⁸Paytaj Señorpa ñaupaqempi sajratapuni ruwarqa, Nabadpa wawan Jeroboampa juchasninmanta mana t'aqakuspa, imaswanchus Israelta juchallicherqa chaykunamanta.

¹⁹Asiriamanta Pulqa Israel llajtayojkunata maqaj jamorqa; Israelpa reynin Manahemtaj Pulman apacherqa kinsa chunka kinsayoj waranqa kilo qolqeta, ajinamanta paypa reinonta sayachiyta yanapanampaj.

²⁰Manahemtaj chay qolqetaqa israelitasmanta orqhorqa, kamacherqataj tukuy qhapajkuna uj libra qolqeta qonankuta, ajinamanta rey Asiriaman qolqeta pagayta atinampaj. Chaymantataj Asiriamanta reyqa llajtanman kutiporqa, manañataj astawan Israel jallp'api sayarqachu.

²¹Manahempa tukuy ima ruwasqasnin, waj ruwasqasnimpiwan manachu Israelmanta reyespa ruwasqasninku librollapitaj qelqasqa kashan?

²²Chaymantataj Manahemqa wañuporqa. Paypa cuentampitaj wawan Pekaía kamacherqa.

²³Judamanta rey Azarías phishqa chunka watataña kamachishajtin, Manahempa wawan Pekaía Israelpi kamachiyta qallereqa. Samaria llajtapitaj iskay watata kamacherqa.

²⁴Señorpa ñaupaqempitaj sajratapuni ruwarqa Nabadpa wawan Jeroboampa juchasninmanta mana t'aqakuspa imaswanchus Israelta juchallicherqa chaykunamanta.

²⁵Ujnin kuraj kaj kamachin Remaliaspa wawan Pekaqa paypa contrampi oqharikorqa, wañucherqataj Samariapi reypa palaciompi. Pekaqa yanapachikorqa Galaadmanta phishqa chunka runaswan, Argobwan, Ariewan ima. Rey Pekaiata wañuchispa, Pekaqa paypa cuentampi kamacherqa.

²⁶Pekaíaj tukuy ima ruwasqasnin, waj ruwasqasnimpiwan, Israelmanta reyespa ruwasqasninku libropi qelqasqa kashan.

²⁷Judamanta rey Azarías phishqa chunka iskayniyoj watataña kamachishajtin, Remaliaspa wawan Peka Israelpi kamachiyta qallarerqa Samaria llajtapi. Chaypi kamacherqa iskay chunka watata.

²⁸Señorpa ñaupaqempitaj sajratapuni ruwarqa, Nadabpa wawan Jeroboampa juchasninmanta mana t'aqakuspa, imaswanchus Israelta juchallichej chaykunamanta.

²⁹Israelmanta rey Pekaj p'unchaykunasnimpitaj asiriospa reynin Tiglat-pileser jamuspataj Israelmanta wakin llajtasta jap'ikaporqa: Ijonta, Abel-bet-amaacata, Janoata, Cedestsa, Hazorta, Galaadta, Galileata tukuynin Neftalitawan. Chaymantataj Asiriaman presosta aparqa.

³⁰Elaj wawan Oseastaj Pekaj contrampi oqharikuspa, maqaspataj wañuchiytawan, paypa cuentampi kamacherqa, Uziaspa wawan Jotam iskay chunka watataña kamachishajtin.

³¹Pekaj tukuy ruwasqasnin, waj ruwasqasnin, Israelmanta reyespa ruwasqasninku libropi qelqasqa kashan.

³²Israelmanta Remaliaspa wawan Peka iskay watataña kamachishajtin, Uziaspa wawan Jotam Judapi kamachiyta qallarerqa.

³³Kamachiyta qallarishaspataj, iskay chunka phishqayoj watayoj karqa, Jerusalempitaj chunka sojtayoj watata kamacherqa. Mamantaj Sadocpa wawan Jerusa karqa.

³⁴Jotamqa Señorpa ñaupaqempi cheqan kajta ruwarqa, imaynatachus tatan Uzías ruwaj ajinata.

³⁵Chay tukuywampis loma patapi kaj altaresqa mana chinkachisqachu karqanku, imaraykuchus llajtamanta runasqa chaypi uywa ñak'asqata jaywaspa inciensotapis q'osñichillajpuni kanku. Payqa Señorpa wasimpi jatun kaj punkutapis jallch'acherqa.

³⁶Jotampa tukuy ima ruwasqasnin waj ruwasqasnimpiwan, manachu Judamanta reyespa ruwasqasninku libropi qelqasqa kashan?

³⁷Señorqa Judáj contrampi Siriamanta rey Rezinta, Remaliaspa wawan Pekatawan, kachamuyta qallarerqa.

³⁸Jotam wañupojtintaj tatasnimpa covachasnimpi p'amparqanku, ñaupa tatan Davidpa llajtampi. Paypa cuentampitaj wawan Acaz kamacherqa.