Read Quechua Bolivia DC Bible 2 REYES 18 Bible Online

2 REYES 18 - Quechua Bolivia DC Bible bible

2 REYES 18

¹Elaj wawan Oseas Israelpi kinsa watataña kamachishajtin, Acazpa wawan Ezequías Judapi kamachiyta qallarin.

²Kamachiyta qallarishaspataj iskay chunka phishqayoj watayoj karqa, Jerusalempitaj iskay chunka isq'onniyoj watata kamacherqa. Mamanqa Zacariaspa wawan Abi karqa.

³Payqa Señorpa ñaupaqempi maychus cheqan kajta ruwarqa, imaynatachus ñaupa tatan David ruwarqa ajinata.

⁴Payqa loma patapi altaresta chinkacherqa, rumi lantistapis t'unarqa, Aseraj lantisnintapis t'unararqa, Moisespa broncemanta ruwasqan kataristapis t'unamucharqa. Israelmanta runasqa chay tiempokama inciensota q'osñichillajpuni kanku. Chayta suticharqa Nehustán, nispa.

⁵Israelpa Señor Diosnimpitaj suyayninta payqa churarqa, Judamanta tukuynin reykunamanta mana ujwampis pay jinaqa karqachu, ni qhepata, nitaj ñaupajtapis.

⁶Imaraykuchus Ezequiasqa Señortapuni qhaterqa, manataj paymanta t'aqakorqachu, imastachus Moisesman Señorqa kamacherqa chaykunata payqa waqaycharqa.

⁷Señortaj paywampuni karqa; mayllamampis llojsejtin allimpuni paytaqa rerqa. Payqa Asiriamanta reypa contrampi oqharikorqa, payta mana sirviyta munaspa.

⁸Ajinallatataj filisteostapis payqa atipaykorqa, jap'ikaporqataj, Gazata, tukuynin jallp'asnintawan juch'uy llajtasmantapacha, sumaj jark'achisqa llajtaskama.

⁹Ezequías tawa watataña kamachishajtin, Elaj wawan Oseaspis Israelpi qanchis watataña kamachishajtin, Asiriamanta rey Salmanasar Samariaj contrampi llojsimorqa, soldadosninwantaj muyuykucherqa.

¹⁰Kinsa watapitaj jap'erqanku, chayqa karqa Ezequías sojta watataña kamachishajtin, Israelmanta rey Oseaspis isq'on watataña kamachishajtin. Chay watapi Samariaqa jap'isqa karqa.

¹¹Asiriamanta reyqa Israel runasta presosta apakaporqa Asiria nacionman, chaypitaj paykunata churarqa, Halahman, Gozán mayu cantopi Haborman, medospa llajtasninman ima.

¹²Señor Diosninkoj palabranta mana kasusqankurayku, aswampis paypa trato ruwasqanta p'akisqankuraykutaj, imastachus Señorpa kamachin Moisés paykunaman kamacherqa chay tukuyta mana uyarerqankuchu, nitaj ruwarqankuchu.

¹³Ezequías Judapi chunka tawayoj watataña kamachishajtin, Asiriamanta rey Senaqueribqa Judamanta tukuynin sumaj jark'asqa llajtaspa contrampi llojsimorqa, jap'erqataj.

¹⁴Chantá rey Ezequiasqa Laquis llajtaman kacharqa Asiriaj reyninman nichimojta: Noqaqa pantaykuni ruwasqaypi, ama noqawan maqanakoj jamuychu, mashkhatachá niwanki tasata pagasunayta, chayta noqa ruwallasaj. Chanta Asiriaj reynenqa, Ezequiasman Judamanta reyman nerqa: Isq'on waranqa isq'on pachajniyoj kilos qolqeta, isq'on pachaj isq'on chunkayoj kilos qoritawan pagananta.

¹⁵Chayrayku Ezequiasqa Señorpa wasinmanta reypa wasinmantawan tukuynin kaj qolqeta qoporqa.

¹⁶Chantaqa Ezequiastaj Señorpa wasimpa punkusninmanta, quejosninmantawan khakararqa, pay kikin qoriwan jawicherqa chay tukuyta, tantaykuspataj Asiriamanta reyman qoporqa.

¹⁷Chantá Asiriamanta reyqa Ezequiaspa contrampi kuraj kamachejkunata kachaykamorqa, Tartanta, Rabsaresta, Rasacestawan ashkha soldadostawan, Laquismantapacha Jerusalempa contrampi, jamuspataj Jerusalén chaykama chayamorqanku. Paykunataj jamuspa pata estanqueman yaku pusanaj larq'asnejman t'ajsana cheqaman ñan rejpi jaraykukorqanku.

¹⁸Chanta Reyta wajyarqanku, reytaj kacharqa Hilciaspa wawan mayordomon Eliaquimta qelqerin Sebnata reypa yanapajninta, Asafpa wawan Joatawan.

¹⁹Asiria soldadospa kurajnintaj, nerqa: Ezequiasman kunanqa ajinata niychej: Asiriamanta jatun reyqa ajinata nin: Imapitaj qanqa atienikushanki sayanaykipajri?

²⁰Yuyankichu k'acha palabrasqa maqanakupaj, unanchakuy, kallpataj kasqanta? Imapi atienikuspataj noqaj contraypi oqharikushankiri?

²¹Qanqa Egiptoj yanapaynimpi atienikushanki, chay p'akisqa soqosopi atienikushanki, pichus chayman makinta taunakunman chayqa, chay rato makinta t'ojsirparenqa; Egiptomanta rey faraonqa ajinamin suyajkunapajqa.

²²Sichus niwankichejman: Noqaykoqa atienikuyku Señor Diosniykupi, manachu lomas patapi kaj altaresninta Ezequías urmacherqa, chanta nerqataj Judata Jerusalentawan: Altarpa ñaupaqempi Jerusalenllapi yupaychankichej, nispa?

²³Kunanqa Asiriamanta wiraqochi reyniywan uj parlayman yaykuychej, noqaj iskay waranqa caballosta qosqayki, sichus atiwaj runasta tariyta chay iskay waranqa caballospi rinankupaj chayqa.

²⁴Imaynatataj qan ayqechiyta atiwaj reyniypa ujnin juch'uy kaj soldadosnimpa kamachillantapisri? Egiptomanta apakamuy chay tukuy carrestasninta, caballospi purej runasnintawampis, chay tukuywan manaraj atipankichu.

²⁵Manachu noqapis Señorwan jamushani kay cheqata chinkachinaypaj? Señor noqatapis niwarqa: Wicharispa chay jallp'ata chinkachimuy, nispa.

²⁶Chantaqa Hilciaspa wawan Eliaquimwan, Sebnawan, Joawan ima kuraj kamachejman nerqanku: Kay kamachisniykimanqa arameo parlaypi parlawayku. Noqaykoqa chayta yachayku, amataj Judea parlaypi parlawaykuchu kay perqa patapi runaspa uyarinantaqa.

²⁷Kuraj kamachejqa nerqa: Wiraqocheyqa qankunallaman ninaypajchu kachamuwarqa, manachu kay tukuypi runas perqa patapi kashanku chaykunamampis? Paykunaqa qankunawan khuska jatun jisp'ayniykichejta mikhunkichej, jisp'ayniykichejtawan ujyankichej.

²⁸Chanta kuraj kamachejqa sayariytawan jatunmanta qhaparerqa judiospa parlaynimpi: Asiriamanta jatun reypa parlasqanta tukuy uyariychej: Ajinata reyqa nin: Ezequías reywan ama qhasi mana kajta ch'aukiyachikuychejchu, payqa makiymanta mana librayta atisonqachejchu.

³⁰Ezequiasqa amataj qhasita Señorpi qankunata atienichichunchu. Cheqamanta Señorqa librawasun. Asiriamanta reymantaj kay llajtaqa mana jaywasqachu kanqa, nispaqa.

³¹Ezequiasta ama uyariychejchu, Asiriamanta reyqa ajinata nin: Noqawan ujchakuychej, noqawantaj jamuychej, ajinamanta sapa ujniykichej kikin uvas sach'asniykichejmanta, higos sach'aykichejmantataj mikhunkichej; sapa ujtaj kikin pozosniykichejmanta yakuta ujyankichej.

³²Chanta jamuspa qankunata uj sumaj jallp'aman pusasqaykichej chaykama, qankunaj jallp'aykichej jinallamantaj. Chaypeqa tiyan trigo, uvas, grano, uvas sach'a, olivo sach'as, aceite, misk'i ima. Chaypitaj sumajta tiyakunkichej, manataj wañunkichejchu. Ezequiastaqa ama uyariychejchu, Señorqa librawasun nispalla qankunataqa ch'aukiyasunkichej.

³³Ima naciompa diosnintaj Asiria reypa makinmanta, jallp'anta librayta aterqari?

³⁴Hamatpatawan, Asfatpatawan, maypitaj dioskunasninku kashan? Maypitaj kashan Sefarvainpata, Henajta, Ivajtawan dioskunasninri? Paykunaqa Samariata makiymanta qhechuyta aterqankuchu?

³⁵Mayqen diostaj tukuynin nacionespa dioskunasninmanta noqaj makiymanta nacionninta qhechuyta aterqari? Imaraykutaj yuyankichej Señorqa makiymanta Jerusalenta libranantari?

³⁶Chanta runasqa mana imatapis kuticherqankuchu, imaraykuchus reyqa kamachisqa: Ama imatapis kutichinkichejchu, nispa.

³⁷Chantataj Hilciaspa wawan reypa mayordomon Eliaquim, qelqerin Sebnawan, reypa yanapajnin Joaspiwan p'achasninkuta llik'ikuspa rey Ezequiaspaman jamorqanku, Asiriamanta kuraj kamachejpa nisqanta reyman willarqanku.