Read Quechua Bolivia DC Bible 2 REYES 19 Bible Online

2 REYES 19 - Quechua Bolivia DC Bible bible

2 REYES 19

¹Rey Ezequiasqa kay tukuy imasta uyariytawan, p'achasninta llik'ikuspa, qhashqa p'achasta churaykukuspataj Señorpa wasinman rerqa.

²Reytaj mayordomon Eliaquinta, qelqerin Sabnata, sacerdotespa kurajkunasninkutawan, qhashqa p'achaswan p'achallisqasta Amospa wawan profeta Isaiaspaman kacharqa, nimunankupaj:

³Rey Ezequiasqa kay jinata nin: Kunan p'unchayqa may jatun llakiymin jasut'i p'unchay, p'enqay p'unchaytaj, imaraykuchus wawasqa nacenapaj jina kashanku, pichus nacichikojtaj mana kallpayojñachu kashan.

⁴Ichapis Señorqa uyarinña, chay kuraj kamachejpa parlasqasninta, pitachus wiraqochin Asiriamanta reyqa kachamorqa, kausaj Diosmanta sajrata parlanampaj. Señor Diosniykeqa chay ch'ichi palabrasninta uyarispa jasut'ichun. Kunanqa kaypi qhepakojkunarayku Diosmanta mañay ari.

⁵Rey Ezequiaspa kamachisqasnenqa Isaiaspaman jamorqanku.

⁶Isaiasqa kuticherqa: Kay jinata ninkichej wiraqochiykichejman: Señorqa ajinata nin: Chay jinata palabrasta uyarisqaykimanta ama manchachikuychu, Asiriamanta reypa kamachisnin noqaj contrayta parlasqankumanta.

⁷Kayqa noqa payman uyarichisaj uj ch'ajwata llajtanman kutipunampaj, chaypitaj espadawan wañuchisaj.

⁸Kuraj kamachejqa Asiriamanta reynin Lebna llajtawan maqanakushajta tariparqa, imaraykuchus uyarisqa Laquismanta ripun nejta.

⁹Asiriamanta reyqa uyarispa Etiopiamanta rey Tirhaca paywan maqanakoj llojsimusqanta. Chantá payqa kutiporqa. Kamachisnintataj Ezequiaspawan kacharqa:

¹⁰Judamanta rey Ezequiasman ninkichej: Mayqen Diospichus qan atienikushanki chayqa, ama qhasita kusichisuchunchu, ninaykipaj: Jerusalenqa Asiriamanta reypa makinman mana jaywasqachu kanqa.

¹¹Chayqa yachankiña Asiriamanta rey imastachus ruwasqanta, chay tukuy nacionesta chinkachisqantapis. Chanta qampunichu ayqekuwaj?

¹²Chay ujkuna nacionespa dioskunasninta tatasniy urmachishajtin kay llajtasta librarqankuchu, Gozanta, Haranta, Resefta Edenmanta kajkuna Telasarpi tiyakojkunata?

¹³Maypitaj kachanku reyesninku Hamatpata, Arfadpata, Sefarviampata, Hanajta, Ivapata imari?

¹⁴Ezequiastaj chay kachasmanta carta qelqasqasta jap'erqa. Chayta leespataj Señorpa wasinman wicharerqa, chaypitaj Ezequiasqa Señorpa ñaupaqenman churarqa.

¹⁵Señorpa ñaupaqempitaj Ezequiasqa mañakorqa: Israelpa Señor Diosnin janaj pachakunapi angelkunaj chaupimpi tiyakoj, qanllamin tukuynin jallp'a patapi reinospa Diosnenqa kanki. Qanlla janaj pachata kay pachatawan ruwarqanki.

¹⁶Señoríy uyariway ari, ñawisniykita kichariy, qhawarimuytaj, Senaqueribpa parlasqantapis uyariy, payqa kausaj Diospa contranta parlajta kachamun.

¹⁷Señor, cheqamanta Asiriamanta reyesqa kay pachapi nacionesta, jallp'asnintawan chinkachin.

¹⁸Dioskunasninkutapis ninaman churaykorqanku, imaraykuchus chaykunaqa mana dioskunachu karqanku, manachayqa runaj makisninwan ruwasqaslla, k'aspimanta, rumimantawan, chayrayku paykunaqa dioskunata chinkacherqanku.

¹⁹Kunanqa Señor Diosniyku, mañakuyki makinkumanta qhechunawaykuta, tukuy naciones qan sapallayki Dios kasqaykita yachanankupaj.

²⁰Chanta Amospa wawan Isaiasqa Ezequiasman kacharqa nimunankupaj: Ajinata Israelpa Señor Diosnenqa nin: Asiriaj reynin Senaqueribmanta mañakusqaykita ñapis uyariykiña.

²¹Asiria reymanta Señorpa nisqanqa kay jina kashan: Sión llajtaqa, uj sipas jina, Senaquerib, qanmanta asikusunki. Jerusalentaj qanmanta umanta khiwirispa asikusunki qan karunchakojtiykikama.

²²Pimantataj qan rimaqakunki sajrata parlaspari? Pej contrampitaj qan chay jinata parlakunkiri? Ñawisniykitapis patapata patata qhawarispari? Israelpa Santo Diosnimpi contrampi?

²³Qampa kachasniykinejta Señormanta asikunki, nerqankitaj: Mana yupay atina carretasninwan, orqo puntasman wicharini, Libanomanta mana wichariy atinaman. Jatuchaj kaj cedrosninta k'utumuni, allin ajllasqa pinosnintawan. Aswan jatun kaj orqo puntasnimpitaj jatarikuni, ashkha sach'asnin chaupipitaj tiyarikuni.

²⁴Waj jallp'aspitaj pozota allarqani, chay yakustataj ujyarqani. Chakiywan saruspataj, Egiptoj tukuynin mayusninta ch'akicherqani.

²⁵Manachu yacharqanki, noqa Señorman, kay tukuy imasta unanchasqayta? Unaymantapacha kay imastaqa noqa wakicherqani, kunantaj chaykunata junt'ashani. Chayrayku chay sumaj jark'achisqa llajtasta urmachishanki, qhasi mana kaj rumi qotusman jina tukuchishanki.

²⁶Chaypi tiyakojkunataj mana kallpayoj kanku, sinch'i mancharisqas, p'enqaypitaj. Campo qhorasman jina tukukunku; q'omer qhoras jinataj kanku, wasi patapi wiñakoj qhora jina, ch'akirapunku manaraj poqoshaspa.

²⁷Yachanitaj imaynachus kasqaykita, yaykusqaykita, llojsisqaykitapis, noqapaj phiñakusqaykitawan.

²⁸Noqaj contraypi phiñakusqaykirayku, chhikata jatunchakusqaykirayku, ningrisniyman chayamusqanraykutaj, argollayta senqaykiman churasqayki, simiykimantaj frenota jina churasqayki, may ñannejtachus jamusqallaykitataj kutirichisqayki.

²⁹Isaiasqa Ezequiasman nerqa: Kaytaj kanqa yachanaykipaj; qankunaqa kay wata, qhepan watatawan poqojllata, sapanmanta poqojllata mikhunkichej. Kinsa kaj watapitaj atinkichej tarpuyta, oqhariytapis.

³⁰Judamanta qhepakojkunaqa sach'as jina kanqanku, ukhuman saphiykusqanku patapitaj poqoyta apanqanku.

³¹Jerusalempi puchojkuna qhepakonqanku. Sión orqopitaj kausajkuna kanqankuraj. Kaytaqa Atiyniyoj Señorpa jatun munaynillan ajinata ruwanqa.

³²Señorqa Asiriaj reyninmanta kay jinata nin: Mana kay llajtaman yaykumonqachu. Manataj flechallantapis kachaykonqachu, manataj payman escudosninwan jamonqachu, manataj muyuyninmampis jark'anata churanqachu.

³³May ñantachus jamorqa, chayllatataj kutiponqa. Noqa Señor kaytaqa niykichej: Manataj kay llajtaman yaykumonqankuchu.

³⁴Noqataj kay llajtata waqaychasaj. Noqallataj salvasaj. Noqa kikiyta munakusqayrayku, kamachiy Davidta khuyakusqayraykutaj.

³⁵Chay kikin ch'isipitaj Señorpa angelnin llojsispa, asiriospa soldadosninta pachaj pusaj chunka phishqayoj waranqata jarankupi wañuracherqa. Q'ayantin sut'iyayta jatarimunankupajtaj ayasllaña karqa.

³⁶Chanta Asiriamanta rey Senaqueribqa, jatarispa Niniveman kutiporqa, chaypitaj qhepakaporqa.

³⁷Chanta uj p'unchay payqa diosnin Nisrocpa wasinman yaykuspa chaypi qonqorikushajtin, wawasnin Adramelecwan, Sarezerwantaj, cuchillowan wañucherqanku. Chaymantataj Ararat jallp'aman ayqekorqanku. Paypa cuentampitaj wawan Esarhadon kamacherqa.