Read Quechua Bolivia DC Bible 2 REYES 20 Bible Online

2 REYES 20 - Quechua Bolivia DC Bible bible

2 REYES 20

¹Chay p'unchaykunapi Ezequiasqa sinch'itapuni onqoykorqa. Amozpa wawan profeta Isaías payta watukoj jamuspa nerqa: Señorqa ajinata nin: Wasiykipi kajkunata allinta kamachiykuy, imaraykuchus ñapis wañupunkiña, manaña kausawajchu.

²Chantá, payqa perqa k'uchunejman kutirikuspa, Señormanta mañakorqa: Señorníy, yuyarikuy noqamanta, imaynatachun cheqanta, allin sonqowantaj ñaupaqeykipi purisqaymanta, munayniykiman jina ruwaspa. Ajinata Ezequiasqa maytapuni waqarqa.

⁴Isaías manaraj khuskan patioman chayashajtin, Señorpa palabran payman jamorqa: Kutispa aylluypa kurajnin Ezekiasman nimuy, ñaupa tatayki Davidpa Señor Diosnin ajinata nin: Mañakusqaykita noqa uyarini, imaynatachus waqasqaykitapis rikullanitaj. Kunanqa thañichisqayki, kaymanta kinsa p'unchaymantaj Señorpa wasinman wicharinki.

⁶Chunka phishqayoj watatawan kausayniykiman yapaykusqayki; Asiria reypa makinmanta qanta, kay llajtatawan librasqaykichej; kay llajtata noqa kikiy jark'asaj noqata munakusqayrayku, kamachiy Davidta khuyakusqayraykutaj.

⁷Chanta Isaiasqa nerqa: Higosta ch'aqerqospa chaywan churaykuychej, nispa. Higosta ch'aqerqospataj chaywan nanasqanman churarqanku, chaywantaj thañikaporqa.

⁸Ezequisastaj Isaiasman: Ima señalpitaj yachayman Señor thañichinawanta, kinsa p'unchaymanta Señorpa wasinman rinaytawanri?

⁹Isaiasqa kuticherqa: Yachanaykipaj Señormanta señalqa kay jina kanqa. Munankichu Señorqa chunka gradasta llanthuta ñaupajman kutirichinanta, chayri chunka gradasta chay llanthu qhepaman kutirinanta?, nispa.

¹⁰Ezequiasqa kuticherqa: Llanthu chunka gradasta ñaupajman rinanqa atikullan; chunka gradasta qhepaman rinanqa mana atikunmanchu, nispa.

¹¹Chantataj Isaías profetaqa Señormanta mañakorqa. Señortaj Acazpa relojnimpi llanthuta chunka gradasta qhepaman kutiricherqa.

¹²Chay p'unchaykunapeqa Baladadpa wawan Merodac-baladán reyqa Babiloniamanta kamachisninta kachamorqa, chaparasta, cartastawan apachimuspa, Ezequías onqosqa kashan nejta uyarispa.

¹³Ezequiastaj paykunata wajyarispa, wasimpi tukuy ima kajkunata rikucherqa: Qorita, qolqeta, q'apaj jawinasta, q'apaj aceitetawan, maypichus armasnin waqaychasqa karqa chaykunatawan, chanta imaschá wasimpi waqaychasqas karqanku chaykunatawan; manataj imapis qhepakorqachu Ezequiaspa mana rikuchisqanqa, wasimpi kajkunamanta, tukuy kamachiynimpi kajkunamantawan.

¹⁴Chaymanta profeta Isaiasqa rey Ezequiaspaman jamorqa, nerqataj: Maymantataj chay runas kankuri, ima nisunkutajri?, nispa. Ezequiastaj kuticherqa: Paykunaqa karumanta Babiloniamantapacha jamunku.

¹⁵Isaiastaj watejmanta tapullarqataj: Imatataj wasiykipi rikunkuri? Ezequiastaj kuticherqa. Paykunaqa wasiypi tukuy imasniyta rikunku, tukuy waqaychasqasniymanta mana imapis qhepakunchu mana rikusqankoqa.

¹⁶Chanta Isaiasqa Ezequiasman nerqa: Uyariy Señorpa palabranta: Kunanqa jamoj p'unchaykunapi tukuynin imasta kaymanta Babiloniaman apakaponqanku, tukuynin palacioykipi kaj imasta, mashkhatachus tatasniykipis jallch'arqanku kunankama chay tukuytawan. Ajinata Señorqa nin. Qampa mirayniykimanta kajkunatapis jap'ispa aparanqanku, Babiloniapi reypa kamachisnin kanankupaj.

¹⁹Chantataj Ezequiasqa Isaiasman nerqa: Chay Señorpa palabranta parlasqaykeqa allillan. Chay jawataj nillarqataj: Kausanay p'unchaykamallapis allin kachun, nispa.

²⁰Ezequiaspa tukuy ima ruwasqasnin, waj ruwasqasnin, wapu kasqan, imaynatachus estanqueta ruwachisqan, larq'ata ruwachisqan, chayninta llajtaman yakuta apanampaj chay imaqa, manachu Judamanta reyespa ruwasqasninku libropi qelqasqa kashan?

²¹Ezequías wañupojtintaj, paypa cuentampi wawan Manasés kamacherqa.