Read Quechua Bolivia DC Bible 2 REYES 24 Bible Online

2 REYES 24 - Quechua Bolivia DC Bible bible

2 REYES 24

¹Joacimpa p'unchaykunasnimpitaj Babiloniamanta rey Nabucodonosor maqanakoj llojsimorqa, Joacimtaj chay reypata kinsa watata kamachin karqa. Jina kashaspataj paypa contrampi oqharikorqa.

²Chanta Señorqa Joacimpa contrampi ashkha soldadosta kachamorqa, caldeosta, siriosta, moabitasta, amonitastawan. Chaykunata kachamorqa Judata chinkachinankupaj, imaynatachus Señorpa palabran kamachisnin profetasninnejta nisqa kasqanman jina.

³Cheqamanta kaykunaqa Señorpa nisqanman Judáj contrampi jamorqanku, Señorpa ñaupaqenmanta qhechusqas kanankupaj Manasespa juchasninrayku, tukuy ima sajrata ruwasqanmantawan.

⁴Mana juchayojkunaj yawarninta jich'aspa, Jerusalén llajtaman yawarwan junt'achisqanmanta. Chayrayku Señorqa manapuni perdonayta munarqachu.

⁵Joacimpa tukuy ima ruwasqasnin, waj ruwasqasnimpiwan manachu Judamanta reyespa ruwasqasninku libropi qelqasqa kashan?

⁶Joacim wañupojtintaj wawan Joaquín paypa cuentampi kamacherqa.

⁷Egiptomanta reytaj manañapuni jallp'amanta ujtawampis llojserqachu, imaraykuchus Babiloniamanta reyqa paypa kajta Egipto mayumantapacha Eufrates mayukama jap'ikaporqa.

⁸Joaquenqa chunka pusajniyoj watayoj kamachiyta qallarerqa. Jerusalempitaj kinsa killata kamacherqa. Mamanqa Jerusalenmanta Elnatampa wawan Nehusta karqa. Sajratapunitaj Señorpa ñaupaqempi ruwarqa, imaynatachus tatan ruwaj chay kikinta.

¹⁰Chay p'unchaykunapitaj rey Nabucodonosorpa soldadosnin Babiloniamanta maqanakoj jamuspa Jerusalén llajtata muyuykorqanku.

¹¹Rey Nabucodonosortaj kamachisnin llajtaj contrampi maqanakushajtinku chayamorqa.

¹²Chanta Judamanta rey Joaquenqa Babiloniamanta reypaman llojsimorqa, mamanwan, kuraj runasnin soldadosta kamachejkunasnimpiwan. Babiloniamanta reyqa pusaj wata kamachiynimpi paykunata presochaykorqa.

¹³Nabucodonosorqa Señorpa wasinmantataj tukuynin waqaychasqa kajkunata orqhomorqa, reypa wasimpi waqaychasqasnintawan ima. Israelpa reynin Salomón Señorpa wasimpaj tukuy imata qorimanta ruwasqasnintapis p'akirarqa, imaynatachus Señorqa nisqanman jina.

¹⁴Jerusalén runastataj tukuyninkuta presosta aparqa, kurajkunata, wapu runasnintawan, tukuynimpi chunka waranqa presosta, tukuynin herrerostawan, llank'ajkunastawan ima. Paykunamanta manaña pipis qhepakorqachu, manachayqa wajchaslla.

¹⁵Apallarqataj Nabucodonosorqa Joaquinta presochaspa mamantawan, reypa warmisnintawan, kuraj runasnintawan, llajtamanta tukuy atiyniyojkunatawan. Chay tukuyta Jerusalenmanta Babiloniaman aparqanku.

¹⁶Maqanakupaj apasqa soldadosqa qanchis waranqa karqanku. Llank'ajkunawan, herreroswantaj uj waranqa karqanku. Kaykunata maqanakunankupaj, tukuynin wapu runasnintawan Babiloniamanta reyqa aparqa.

¹⁷Babiloniamanta reyqa Mataniasta sobrinon Joaquimpa cuentampi kamachejta churarqa, sutintataj Sedequías nispa suticharqa.

¹⁸Sedequiasqa kamachiyta qallarishaspa iskay chunka ujniyoj watayoj karqa. Jerusalempitaj chunka ujniyoj watata kamacherqa. Mamantaj Libnamanta Jeremiaspa wawan Hamutal karqa.

¹⁹Paytaj sajratapuni Señorpa ñaupaqempi ruwarqa, tatan Joacim jina.

²⁰Chayrayku Señorpa phiñakuynin Jerusalempa, Judajpa contrampi ima jamorqa, paypa ñaupaqenmanta qharqonankama. Chaymanta Sedequiasqa Babiloniamanta reypa contrampi oqharikorqa.