Read Quechua Bolivia DC Bible 2 REYES 4 Bible Online

2 REYES 4 - Quechua Bolivia DC Bible bible

2 REYES 4

¹Ujnin kaj profetaspa warmintaj, Eliseoman qhaparispa willakorqa: Kamachiyki qosayqa wañupun; yachanki jina payqa Señorta allinta yupaychaj. Manuwarqayku chay runataj jamuspa, iskaynin wawasniyta apakapuyta munan kamachisnin kanampaj.

²Eliseotaj taporqa: Imatataj noqa qampaj ruwayta atiymanri? Willaway imataj wasiykipi tiyan, nispa. Chanta warmitaj nerqa: Kay kamachiykejtaqa mana imampis kanchu, wasiypi uj yurupi aceitellay tiyan.

³Eliseotaj nerqa: Riytawan llajta masisniykimanta ashkha yurusta ch'usaj puruta mañarikamuy.

⁴Chanta wawasniykiwan wasiykiman yaykuspa punkuta wisq'aykakamuy. Chay yurumantaj aceiteta jich'ay, junt'achiytawantaj wajnejman churanki.

⁵Warmitaj ripuytawan wawasninwan punkuta wisq'aykakamorqanku. Chaypitaj wawasnin yurusta jaywarqanku, paytaj aceiteta jich'aj.

⁶Yurusman junt'arajtintaj, ujnin kaj wawanta nerqa: Astawan yurusta apamuway. Wawantaj nerqa: Manaña astawan yurusqa kanchu. Chanta aceiteqa manaña jich'akamorqañachu.

⁷Chanta warmitaj Diospa runanman jamuspa willarqa. Paytaj nerqa: Rispa chay aceiteta vendemuy, manusniykimantaj pagampuy, nispa.

⁸Uj p'unchay Eliseoqa Sunem llajtanejta pasasharqa. Chaypitaj uj qhapaj warmi tiyakorqa, paytataj wasimpi mikhunampaj sapa kuti wajyaj. Chanta Eliseoqa sapa kuti chay llajtaman rispaqa, chay warmej wasinmampuni mikhoj rej.

⁹Chay warmeqa qosanman nerqa: Noqa yachani sapa kuti wasinchejman mikhoj jamun chay runaqa Diospa profetan kasqanta.

¹⁰Noqa mañakuyki. Manachu wasi patapi uj juch'uy cuartota ruwachipusunman, chaymantaj uj puñunata, mesata, sillata, uj k'anchanatawan churapusunman, chanta mayk'ajpis noqanchejta watukoj jamuwajtinchej, chaypi qhepakunampaj?, nispa.

¹¹Uj p'unchaytaj Eliseoqa chaynejta jamuspa, chay wasita ruwachipusqankupi puñorqa.

¹²Chanta Eliseoqa kamachin Gieziman nerqa: Chay Sunamita warmita wajyarimuy, nispa. Wajyamojtintaj, payqa chay rato Eliseoj ñaupaqenman jamorqa.

¹³Chanta kamachin Gieziman nillarqataj: Kay wasiyoj warmiman kay jinata niy: Chay chhika k'achapuni noqaykupaj kasqaykimanta, tukuy ima allinkunasta ruwaspa. Kunan imatataj noqayku qampaj ruwayta atiykumanri? Qampaj allinniykipaj reywan parlanaykuta munankichu, chayri soldadospa kurajninwanchu? Paytaj kutichispa nerqa: Mana imapis pisiwanchu kay tiyakusqay llajtapeqa, nispa.

¹⁴Eliseotaj kamachinman nerqa: Imatataj paypaj ruwapusunmanri? Giezitaj Eliseoman nerqa: Kay warmejtaqa mana wawan kanchu, qosampis machu runaña.

¹⁵Chaymanta Eliseo nerqa: Wajyamuy, nispa. Pay wajyamojtintaj chay warmeqa wasi punkumpi sayaykukorqa.

¹⁶Eliseotaj warmiman nerqa: Wata kunan jina, wawata ichuykachashanki, nispa. Paytaj kuticherqa: Ama, Diospa runan, wiraqochíy, kay kamachiykita ajinata ch'aukiyaychu, nispa.

¹⁷Chanta chay warmeqa onqoj rikhurerqa. Watampajtaj imaynatachus Eliseoj nisqanman jina, uj wawata nacechikorqa.

¹⁸Chay wawataj wiñarqa. Uj p'unchaytaj maypichus tatan ruthojkunata qhawasharqa chayman rerqa:

¹⁹Tatanmantaj nerqa: Ay! Umay, umay nanawan!, nispa. Tatantaj ujnin kamachinman nerqa: Mamampaman kay wawata pusapuway, nispa.

²⁰Paytaj pusamuspa mamanman pusarqa. Mamantaj arphin patapi ichuykacharqa khuskan p'unchaykama, wawataj wañuporqa.

²¹Paytaj wawata Diospa runa Eliseoj puñunan wasiman apaspa camampataman churaykorqa. Punkuta wisq'aykuytawantaj llojsiporqa.

²²Qosanta wajyaytawantaj nerqa: Ujnin kamachiwan uj china burrota aysachimuway, Diospa runanman usqhayta rerqonaypaj, chanta kutichimpunaypaj.

²³Qosantaj payman nerqa: Imapaj kunan riwajri? Mana killa rikhuriychu, nitaj samakuna p'unchaychu, nispa. Paytaj nerqa: Qanqa sonqo tiyasqalla kakuy.

²⁴Burrota karunaykuchiytawantaj kamachinman nerqa: Jaku, ñaupajta riy, usqhayta pusaway ama sayarispa noqa nisunaykama.

²⁵Rispataj Diospa runan Carmelo orqopi kasharqa chayman rerqanku. Eliseotaj karumanta rikuspa kamachin Gieziman nerqa: Sunamita warmi jamushan.

²⁶Kunanqa correspa tariparqamuy ari, chanta tapuriytaj: Qanta allillanchu risunki? Qosaykiri allillanchu kashan, wawaykipis allillanchu? Paytaj nerqa: Allillan kashanku, nispa.

²⁷Warmitaj maypichus Diospa runan kasharqa chayman chayaytawan, paypa chakisninmanta jap'iykukorqa. Giezitaj kacharichiyta munaspa chimparqa. Diospa runantaj nerqa: Saqellay imaraykuchus paypa alman ancha phutiypi tarikun, Señortaj manaraj sut'inchawanchu, imamantachus llakisqa kasqanta.

²⁸Chanta paytaj nerqa: Noqaqa qan wiraqochiymanta wawata mañakorqaykichu? Manachu nerqayki ama ch'aukiyanawaykita?

²⁹Chanta Eliseoqa kamachin Gieziman nerqa: Wakichikuy, tojnuyta apariykukuspataj riy. Piwampis ñampi tinkukuspaqa ama napaykunkichu, pi napankusojtimpis ama uyarinkichu. Chayaspataj chay tojnuyta chay wawaj uyanman churaykunki.

³⁰Chay wawaj mamantaj Eliseoman nerqa: Señorpa sutimpi, qampa sutiykipiwan jurani, mana qanwanqa manapuni risajchu, nispa.

³¹Jatariytawantaj Eliseoqa chay warmej qhepanta rerqa. Giezirí paykunamanta ñaupajtaña rerqa. Chay wañusqa wawaj uyanmantaj Eliseoj tojnunta churaykorqa; wawajtarí mana samaynillampis karqachu. Chanta jinaman saqerparispa Eliseota taripaj kutimporqa. Eliseomantaj willarqa, chay wawaqa mana kausarinchu, nispa.

³²Eliseo wasiman chayamunampajtaj wawaqa paypa caman patapi wañusqa wijch'ukusharqa.

³³Eliseotaj yaykuytawan punkuta wisq'aykakamuytawan, Señormanta mañakorqa.

³⁴Chaymanta wicharispa wañusqa wawaj patanman winkuykorqa. Simintapis wawaj siminman k'umuykuspa, ñawisnintapis ñawisnin pataman, makisnintapis wawaj makisnin pataman churaykuspa. Ajinata chay wawaj patanman siriykuspa, wawaj ukhunta q'oñitatacherqa.

³⁵Wasi ukhupitaj kayman jaqayman puriykacharqa. Chanta ujtawan chay wawaj patanman siriykullarqataj. Chay rato wawataj qanchis kutita achhiytawan ñawisninta kicharerqa.

³⁶Chantataj Eliseoqa Giezita wajyaspa, nerqa: Chay sunamita warmita wajyay. Paytaj wajyamorqa. Chay warmi yaykumojtintaj, nerqa: Kay wawaykita jap'ikapuy, nispa.

³⁷Warmitaj yaykuytawan, Eliseoj chakisninman wijch'uykukuspa, pampamantaj k'umuykukorqa. Chaymantaqa wawanta oqhariykukuspa llojsimporqa.

³⁸Jatun yarqhay kashajtin Eliseoqa Gilgalman kutimorqa. Profetastaj paywan kasharqanku. Kamachinmantaj nerqa: Churay uj jatun mankata, mikhuytataj profetaspaj wayk'uy.

³⁹Ujnintaj campoman rerqa q'omerkunata mask'aj, chaypitaj tarerqa uj ch'ipakuspa wiñaj qhorata, chaymantataj ashkha lakayusta jina t'impimorqa. Kutimuytawantaj chayta t'unaraspa mankaman churaykorqa, mana yachaspalla imachus kasqanta.

⁴⁰Chantataj runas mikhunampaj qarararqa; mikhuyta llamiriytawantaj, jatunmanta qhaparerqanku: Diospa runan, kay mikhuypi wañuy kasqa!, nispa. Chanta manaña mikhuyta aterqankuchu.

⁴¹Eliseotaj nerqa: Jak'uta apamuwaychej. Chay jak'uwantaj mankaman t'akaykorqa, nerqataj: Kunanqa runasman mikhunankupaj qoychej. Manañataj ima sajrapis chay mankapi karqañachu.

⁴²Uj runataj Baalsalisamanta jamorqa, paytaj Diospa runan Eliseoman ñaupaj t'antasta apamorqa, iskay chunka cebada t'antasta, mosoj trigotapis espigantillanta. Eliseotaj nerqa: Kay runasman qoychej mikhunankupaj.

⁴³Kamachintaj kutichispa nerqa: Kaysituta imaynatataj pachaj runaspa ñaupaqenman churasajri? Eliseoqa watejmanta nillarqataj: Runasman qoychej mikhunankupaj. Señorqa nin: Mikhonqanku, puchonqataj, nispa.

⁴⁴Chantaqa runaspa ñaupaqenman churarqa, mikhorqankutaj, chanta puchorqataj maychus Señorpa palabranman jina.