Read Quechua Bolivia DC Bible 2 REYES 8 Bible Online

2 REYES 8 - Quechua Bolivia DC Bible bible

2 REYES 8

¹Sunempi tiyakoj warmej wawanta Eliseo kausaricherqa, chay warmimanta Eliseoqa nerqa: Señorqa kay llajtaman qanchis watata yarqhayta apachimonqa, chayrayku kaymanta ripuychej, maymanchá munankichej chayman, qanwan tukuy familiaykiwan ima.

²Chay warmeqa tukuy familianwan, imaynatachus Diospa runan nisqanman jina; filisteospa jallp'anman riporqa, chaypitaj qanchis watata tiyakamorqa.

³Chay qanchis wata junt'akojtintaj, filisteospa jallp'anmanta jamporqa. Chayamuytawantaj payqa reypaman rerqa parlaj wasinmanta, jallp'asninmantawan kutichipunankupaj.

⁴Profeta Eliseoj kamachin Gieziwan reyqa parlasharqa: Willaway ari, Eliseoj sumaj ruwasqasninmanta, nispa.

⁵Chanta Giezeqa reyman willasharqa imaynatachus wañusqata uj warmej wawanta kausarichisqanta. Chayllaman chay warmeqa rikhurimorqa; reyman chimpaspataj mañakaporqa, wasinta jallp'asnintawan kutichipunankuta. Chanta Giezeqa reyman nerqa: Wiraqochi reyníy, kaymin chay warmeqa, kaytaj Eliseoj kausarichisqan chay wawapis.

⁶Rey chay warmita tapurejtin, payqa tukuy imata willarqa. Chantataj reyqa ujnin kaj kuraj kaj yanapajninta kamacherqa: Kay warmiman tukuy imasninta kutichichipuy, jallp'asnimpa poqoynintawan, mayk'ajchus riporqa chaymantapacha kunankama, nispa.

⁷Chanta Eliseoqa Damascoman rerqa. Siriamanta rey Ben-adadtaj onqosqa kasharqa, chaypitaj payman willarqanku, Diospa runan kayman chayamun, nispa.

⁸Chanta reytaj Hazaelman nerqa: Uj t'inkata apaspa Diospa runanwan tinkumuy, Señortataj paynejta tapuripuway, kay jinata: Kay onqoyniymanta thañikapusajchus manachus chayta.

⁹Hazaeltaj Damascomanta sumaj poqoykunasninta, tawa chunka camellosman chajnaykukuspa, taripaj rerqa. Paypa ñaupaqenman chayaspataj nerqa: Siriamanta wawayki rey Ben-adad kachamuwan qanta tapusunaypaj, kay onqoyniymanta thañikapusajchu manachu, nispa.

¹⁰Eliseotaj nerqa: Thañikapullanki, nispa nimullay. Chaywampis Señorqa ñapis willawanña, cheqamanta wañupunanta.

¹¹Diospa runantaj Hazaelta mana kachariyta qhawaspa pukayaricherqa; chanta Eliseoqa waqayta qallarerqa.

¹²Chanta Hazaelqa payman nerqa: Imaraykutaj, wiraqochíy, waqashankiri? Paytaj kuticherqa: Ñapis yachaniña israelitasta imayna sajratachus ruwanaykita; jark'achisqa llajtasninta ninawan enqhaykunki, waynas kajtapis cuchillowan wañurachinki, wawasnintapis wañurachinki, onqoj warmispa wijsasnintapis kicharanki.

¹³Hazaeltaj nerqa: Chantá, noqa ima kasqani kay alqo kamachiyki chay jina jatuchaj imasta ruwanaypajri? Eliseotaj nerqa: Ñapis Señorqa rikuchiwanña Siriapi qan kamachinaykita.

¹⁴Hazaelqa wiraqochimpaman riporqa. Reytaj tapurerqa: Ima nisunkitaj Eliseori?, nispa. Paytaj kuticherqa: Thañikapullanqa nisunki, nispa.

¹⁵Q'ayantenqa uj phulluta joq'ochaykuspa, chaywan Ben-adadpa uyanta qhataykorqa. Jinapitaj reyqa wañuporqa, cuentampitaj Hazael kamacherqa.

¹⁶Acabpa wawan Joram Israelpi phishqa watataña kamachishajtin, Josafatpa wawan Joramqa Judapi kamachiyta qallarerqa.

¹⁷Kamachiyta qallarishaspataj, kinsa chunka iskayniyoj watayoj karqa, Jerusalempitaj pusaj watata kamacherqa.

¹⁸Israelmanta reyespa ñankunasnimpitaj purerqa. Acabpa wasinmanta kajkuna kikinta ruwaspa, Acabpa ujnin wawan paypa warmin kasqanrayku, Señorpa ñaupaqempitaj sajratapuni ruwarqa.

¹⁹Chay tukuywampis Señorqa mana Judata tukuchiyta munarqachu, kamachin Davidta munakusqanrayku; imaraykuchus Señorqa payman nisqa, k'anchayqa wiñaypaj kanallantapuni paypaj, miraynimpajpis.

²⁰Jorampa p'unchaykunasnimpitaj edomitas uj reyta churakuspa, Judáj contrampi oqharikorqanku.

²¹Chanta Joramqa tukuynin soldadosninwan, carretasninwan ima, Zairman rerqa, chaypitaj edomitasqa ñapis paykunata muyuykusqankuña, paytaj chay tuta jatariytawan maqanakorqa, israelitastaj wasisninkuman ayqekorqanku.

²²Ajinata Edomqa Judáj atiyninmanta librakorqa, kunankamataj ajina kashan. Chaypachallataj Libnamanta kajkunapis Israelpa atiyninmanta librakorqanku.

²³Jorampa tukuy ima waj ruwasqasnin, manachu qelqasqa kashan Judamanta reyespa ruwasqasnin libropi?

²⁴Joram wañupojtintaj, tatan Davidpa llajtampi p'amparqanku; paypa cuentampitaj wawan Ocozias kamacherqa.

²⁵Acabpa wawan Joram Israelpi chunka iskayniyoj watastaña kamachishajtin, Jorampa wawan Ocoziasqa kamachiyta qallarerqa.

²⁶Ocoziasqa kamachiyta qallarishaspa iskay chunka iskayniyoj watasniyoj karqa. Jerusalempitaj uj watata kamacherqa. Paypa mamantaj Israelmanta rey Omrej wawan Atalía karqa.

²⁷Ocoziasqa Acabpa wawasninmanta kajkunaj ñankunasnimpi purerqa, Señorpa ñaupaqempi sajrata ruwaspa, payqa Acabpa familianmanta tolqa kasqanrayku.

²⁸Acabpa wawan Ocoziaswan Joramwan ujchakorqa Ramot Galaadpi maqanakuman rinankupaj, Siriamanta rey Hazaelpa contrampi. Siriostaj Joramta nanarpacherqanku.

²⁹Chantá Ramot Galaadpi sirios nanaykuchisqankumanta jampikunampaj rey Joramqa Jezreelman kutimporqa. Ajina onqosqa kasqanrayku Judamanta rey Ocoziasqa Jezreelman payta watukoj jamorqa.