Read Quechua Bolivia DC Bible 1 CRÓNICAS 10 Bible Online

1 CRÓNICAS 10 - Quechua Bolivia DC Bible bible

1 CRÓNICAS 10

¹Filisteosqa israelitaswan maqanakorqanku, israelitastaj paykunaj ñaupaqenmanta ayqerqanku. Gilboa orqopi ashkha israelitas wañorqanku.

²Filisteostaj Saulpa qhepanta qhatiykorqanku wawasintawan khuska. Wañucherqankutaj Jonatanta, Abinadabta, Malquisuata ima.

³Chaymantataj Saulpa qayllampi maqanakoqa sinch'i karqa. Flechasta kacharejkunaqa payta taripajtinkutaj, nanaykucherqanku.

⁴Chayrayku pichus armasta apaysej nerqa: Espadaykita orqhokuy. Chaywantaj t'ojsispa pasarparichiway Diosta mana rejsejkuna runas ama asikunawankupaj. Chay yanapajnintaj mana munarqachu sinch'ita mancharikusqanrayku. Chaypacha Saulqa espadanta jap'iytawankama, espadan pataman urmarparerqa.

⁵Chay yanapajnin runaqa Saulta wañojta rikuspaqa, paypis kikillantataj espadan pataman urmaykuspa wañullarqataj.

⁶Ajinata chay p'unchaypi wañorqanku, Saul, kinsantin wawasnin, tukuy aylluntin ima.

⁷Chay vallepi tukuy tiyakojkuna israelitasqa ayqesqankuta rikuspa. Saúl kinsantin wawasnintin ima, wañusqankutataj yachaspa, paykunapis llajtasninkuta saqespa ayqerikapullarqankutaj. Chaypacha filisteosqa jamuspa chay llajtaspi tiyakaporqanku.

⁸Q'ayantin filisteosqa wañusqaspa imasninkuta jap'ikapoj rerqanku. Gilboa orqopitaj Saulta, wawasnintawan, wañusqas wijch'urayashajta tarerqanku.

⁹Chaypacha Saulpa ayanmanta p'achasta lluch'orqanku, umanta armasnintawantaj apakaporqanku, willarachimorqankutaj filisteo jallp'api tukuy runasninkuman lantisninkuman ima.

¹⁰Chaymantataj Saulpa armasnintaqa lantista churananku wasiman churaykamorqanku, umantataj Dagonta yupaychananku wasiman warkhuykamorqanku.

¹¹Galaadpi kaj Javesmanta tukuy runas yachaspa filisteos imaynatachus Saulta ruwasqankuta. Chaypacha tukuy wapu runasnin kajkuna parlanakorqanku, Saulpa ayanta, jinataj wawasnimpatapis Jabes llajtaman aparqanku. Chaypitaj chay ayasninkuta uj sach'a uraman p'ampaykorqanku. Chaymanta qhepamantaj qanchis diasta ayunarqanku.

¹³Ajinatamin Saulqa wañorqa juchasninrayku. Payqa juchallerqa Señorpa kamachisqasninta mana kasuspa, uj yatiri warmita tapukamusqanraykutaj.

¹⁴Señortaqa mana taporqachu. Chayraykumá Señorqa kausayninta qhechorqa, kamachinan jallp'atataj Isaéj wawan Davidman qoporqa.