Read Quechua Bolivia DC Bible 1 CRÓNICAS 11 Bible Online

1 CRÓNICAS 11 - Quechua Bolivia DC Bible bible

1 CRÓNICAS 11

¹Tukuy israelitas tantakorqanku, Hebronmantaj Davidwan parlaj rerqanku. Chaypitaj nerqanku: Noqaykoqa yawar masiyki kayku.

²Cheqamanta Saulqa reyniyku kashajtimpis, qampuni israelitastaqa maqanakuman rejtinku pusaj kanki. Chay jawaqa Señor Diosniyki nisorqa qan pusanaykita, kamachinaykitataj kay Israel aylluykitaqa.

³Chay jinamanta Israelpa tukuy kurajkunasnenqa Hebronman Davidwan parlaj rerqanku, Davidtaj paykunawan Señorpa ñaupaqempi uj tratota ruwarqanku. Chaypacha paykunaqa Davidta ajllakorqanku aceitewan jawispa, Israel ukhupi reyninku kanampaj, imaynatachus Samuelnejta Señor nisqanman jina.

⁴Davidwan tukuy israelitaswan Jerusalenman rerqanku, Jebus nisqa chay llajtaman. Chaypeqa jebuseos tiyakorqanku.

⁵Paykunataj Davidman nerqanku: Qan mana kayman yaykumuyta atinkichu, nispa. Chaywampis Davidqa sinch'i jark'achisqa Sión llajtata jap'erparerqa. Kunantaj chay llajtaqa Davidpa llajtan nisqa kashan.

⁶Davidtaj nisqa: Pichus ñaupajta jebuseoswan maqanakoj rejtaqa, kuraj kaj kamachej kanampaj churasaj, nispa. Ñaupajta maqanakuman rej runaqa Serviaj wawan Joab karqa. Jinataj payqa kurajpaj churasqa karqa.

⁷Chaymantataj Davidqa sinch'i jark'achisqa llajtapi tiyakaporqa. Chayrayku Davidpa llajtan nispa suticharqanku.

⁸Chay muyuyninmantaj llajtata jataricherqa Nilomantapacha llajta kancha perqakama. Joabtaj chay wakin llajtataqa jataricherqa.

⁹Davidqa astawan atiyniyojman tukusharqa tukuy atiyniyoj Señor paywan kasqanrayku.

¹⁰Kaykuna karqanku Davidpa aswan allichaj kaj soldadosnin. Paykunaqa kamachishajtin sumajta yanaparqanku, tukuy israelitaswan khuskataj reyninkupaj Davidta ajllakorqanku, israelitasman Señor nisqanman jina.

¹¹Kaykuna karqanku Davidpa allichaj soldadosnimpa sutisnin: Hacmonej wawan Jasobeam, chay kinsantin wawas wapu soldadosmanta kamachejkuna karqanku; uj kutipi payqa kinsa pachaj runasta lanzanwan wañuracherqa.

¹²Paypa qhepantataj Eleazar karqa, payqa ahohita Dodoj wawan karqa, kinsantin wapu soldadosmanta ujnin kaj karqa.

¹³Payqa Davidwan Pas-damin llajtapi karqa maypachachus filisteos maqanakupaj chaypi tantakorqanku chaypacha. Chaypi karqa cebada tarpusqa chajra, maypachachus israelitas filisteosmanta ayqerqa chaypacha, payqa chay tarpusqa chajra chaupipi sayaykukuspa paykunamanta jark'akuspa filisteosta atipaykorqa. Jinamanta Señorqa jatun atipayta qorqa.

¹⁵Uj kutipitaj chay kinsa chunka kurajkunamanta kinsantillanku Adulam chhanka jusk'uman Davidwan tinkoj rerqanku. Filisteosmanta soldadostaj Refaim vallepi jarasqas karqanku.

¹⁶Davidqa chhanka jusk'upi kasharqa, maypachachus filisteosmanta soldados Belempi kasharqanku chaypacha.

¹⁷Chaypacha Davidqa kay jinata parlarikorqa: Pillapis Belén llajta punkupi kashan chay pozomanta orqhomuspa yakuta jaywariwanman, nispa.

¹⁸Chaypacha chay kinsantin wapu soldadosqa filisteospa jarankuman yaykuspa, Belenman yaykuna punkumanta uj ladopi kasharqa chay pozomanta yakuta orqhomuspa Davidman aparqanku. Davidtaj mana ujyarqachu, manachayqa Señorpaj nispa pampaman jich'arqa.

¹⁹Chantá nerqataj: Dios jark'awachun kay yakuta ujyanamantaqa. Chayta ujyayman chayqa, chay runaspa yawarnintachari ujyaspa jinayman, paykunaqa wañuyta mana manchachikuspa yakuta apamporqanku. Davidqa mana ujyarqachu. Kaytaqa chay kinsa wapu soldados ruwarqanku.

²⁰Joabpa hermanon Abisaeqa chay kinsa chunka ajllasqas kajkuna ukhupi kamachejninku karqa. Uj kutipirí maqanakoj churakorqa, lanzanwantaj kinsa pachaj runasta wañuracherqa. Jinamanta chay kinsa chunka soldados ukhupi may uyarisqa karqa.

²¹Tukuyninkumanta astawan k'achapaj qhawasqa karqa, kamachejninkutaj karqa. Chaywampis manapuni chay kinsa wapusmanqa kikinchakorqachu.

²²Joidaj wawan Benaiqa, Cabseelqa uj wapu runaj wawan karqa, ashkha t'ukuna imastataj ruwarqa. Payllataj Moabmanta Arielpa iskaynin qhari wawasnintapis wañucherqa. Uj p'unchaypiri rit'imusharqa chaypacha uj jusk'uman yaykorqa, chay ukhupitaj uj leonta wañucherqa.

²³Wañuchillarqataj uj jatun sayayniyoj egipcio runata. Chay runaqa iskay metro khuskanniyoj jina sayayniyoj karqa, payqa uj lanzawan armasqa purej. Chay lanzanqa awanaj bola k'aspinman rijch'akorqa. Benaiataj uj k'aspiwan maqaj churakorqa, chay lanzanta kacharparicherqa, chay kikin lanzallanwantaj wañurparicherqa.

²⁴Ajinata Joiadaj wawan Benaiaqa kaykunata ruwarqa, kinsa chunka wapu runas ukhupitaj may uyarisqa karqa.

²⁵Paykunamanta nisqaqa astawan allimpaj qhawasqa karqa. Chaywampis manapuni kinsa aswan wapu runaspis paymanqa jap'ikorqachu. Davidqa paywan khuska purej, soldadosnimpa kurajnimpaj churasqanrayku.

²⁶Chay wapu soldadosqa karqanku: Joabpa hermanon Asael, Belenmanta Dodoj wawan Elhanán; Herdmanta Samot; pelonita nisqa Heles; Tecoamanta Iquespa wawan Ira; Anatotmanta Abiezer; Husamanta Sibecai; ahotita nisqalla. Netofamanta Maharai; Baanaj wawan Heled, paypis Netofallamantataj karqa. Gabaonmanta Riboej wawallantaj. Chayqa Benjamimpa jallp'ampi kashan, Piratosmanta Benaia; Gaas mayumanta Hidai; arbatita nisqa Abiel; Bahurinmanta chay Azmavet; saalbonita nisqa Eliaba; Gizonita Jasempa wawasnin, ararita Sagej wawan Jonatán, Sacarpa wawan Ahiam, paypis aratitallataj karqa; Urpa wawan Elifal; mequeratita Hefer; pelonita Ahías; Carmelmanta Hezrai; Esbajpa wawan Naarai; Natampa hermanon Joel; Hagraejpa wawan Mibhar; amonita nisqa Selec, Berotmanta Naharai. Payqa Sarviaj wawan Joabpaj armasta apaykachajnin karqa. Jatirmanta chay Ira, Jatirllamantataj chay Careb; hitita Urías; Ahlaipa wawan Zabad; Sizaj wawan Adina, payqa rubenita karqa, chanta paykunaj kamachejninkutaj. Paywan khuskataj kinsa chunka runaswan im(...)