Read Quechua Bolivia DC Bible 1 CRÓNICAS 12 Bible Online

1 CRÓNICAS 12 - Quechua Bolivia DC Bible bible

1 CRÓNICAS 12

¹David maypachachus Cispa wawan Saulpa ñaupaqenmanta wijch'usqallaraj kashajtin, Siclagpi David kashajtin chayman jamorqanku uj mashkha sumaj wapu maqanakojkunamanta, paykunaqa Davidta yanaparqanku.

²Paykunaqa wach'ina arcosniyoj karqanku, rumista choqaytataj yacharqanku, flechastapis kachariyta yacharqanku pañawantaj, lloq'ewantaj. Saulpa ayllun Benjamimpa ayllunmanta kaykuna karqanku: Kamachejninku Ahiezer Joaspiwan. Paykunaqa Gabaa llajtamanta Semaj wawasnin karqanku; Azmavetpa wawasnin Jezielwan Peletwan. Anatot llajtamanta Beracawan Jehuwan.

⁴Gabaonmanta Ismaías, payqa kinsa chunka wapu soldadosmanta ujnin kaj karqa, paykunaj kamachejninkutaj. Gederamanta Jeremías, Jahaziel, Johanán, Josabat ima.

⁵Eluzai, Jerimot, Bealías, Semarías, Sefatías, arufitasmanta kaj. Elcana, Isías, Azareel, Joezer, Jasobeampiwan coreitasmanta kajkuna; Gedormanta Jerohampa wawasnin Joelawan Zabadiaswan ima.

⁸Gadpa ayllunmanta kajkunapis wakinkuna Davidpaman pasampullarqankutaj chay ch'in pampapi sinch'i jark'achisqa kashajtin. Paykunaqa may wapu maqanakojkuna karqanku, maqanakupaj sumaj wakichisqas, escudowan, jinataj lanzawan ima. Uyasninkutaj leonesman rijch'akojkuna karqanku, orqosnejtataj tarukas jina usqhayllata correj kanku.

⁹Kaykuna karqanku: Ñaupaj kajqa Ezer karqa; iskay kajtaj Obadías karqa; kinsa kajtaj Eliab karqa;

¹⁰tawa kajtaj Mismana karqa; phishqa kajtaj Jeremías karqa;

¹¹sojta kajtaj Atai karqa; qanchis kajtaj Eliel karqa;

¹²pusaj kajtaj Johanán karqa; isq'on kajtaj Elgabat karqa;

¹³chunka kajtaj Jeremías karqa; chunka ujniyoj kajtaj Macbanai karqa.

¹⁴Kaykuna Gagpa ayllunmanta soldadosta kamachejkuna karqanku. Paykunamanta aswan sullk'a kaj pachaj soldadoswan ninakoj, chay aswan kuraj kajtaj waranqa soldadoswan ninakoj.

¹⁵Kaykuna Jordán mayuta chimparqanku chay ñaupaj kaj killapi, maypachachus mayu junt'a yaku wasaykurispa correshajtin. Chaypacha chay tukuy vallespi kajkunataj ayqerqanku inti llojsimuynej ladoman jinataj inti yaykuynej ladomampis.

¹⁶Chay jawaqa wakin runas Benjamimpa ayllunmanta kajkuna jinataj Judáj ayllunmanta kajkunapis Davidwan tinkoj rerqanku chay jark'achisqa cheqapi kashajtin.

¹⁷Davidtaj paykunaman tinkoj rerqa: Noqaman jamushankichej allin kaypi yanapanawaykichejpaj chayqa, tukuy sonqowan munasaj ujchakunawaykichejta, sitajchus wasanchanawaykichejpaj, enemigosniymantaj jaywanawaykichejpaj jamunkichej chayqa, mana ima juchayoj kashajtiy; jina kanman chayqa ñaupa tatasninchejpa Diosnin chayta rikuspa qankunata jasut'ichun.

¹⁸Chaypacha chay kinsa chunka runaspa kamachejninku Amasaiman Espíritu jamorqa, paytaj qhaparerqa: Isaej wawan David qanwan sonqo tiyasqa kay kachun! Sonqo tiyasqa kay qampi kachun! Sonqo tiyasqa kay qanwan kachun, jinataj yanapasojkunawampis, qanta Dios yanapasusqanrayku! Davidtaj paykunata jap'erqa soldadosnimpa kamachejkunamantaj tukucherqa.

¹⁹Manasespa ayllunmanta wakinkuna Davidpa ladoman riporqanku, maypachachus filisteoswan Saulpa contranta maqanakunankupaj risharqa chaypacha. Chaywampis Davidqa filisteosta yanapayta mana aterqachu, filisteospa kamachejkunasninku parlanakuytawan kachaporqanku, kay jinata nispa: Davidqa noqanchejta wañurparichiytawankama wiraqochin Saulman riponqa!, nispa.

²⁰Manasespa ayllunmanta kajkuna runas Davidman chimpaporqanku, Siclagman chimpapushajtin. Chaykunaqa karqanku Adnas, Jozabad, Jediael, Micael, Jozabad, Eliú, Ziletai ima. Paykuna Manasespa soldadosninmanta kamachejkuna karqanku.

²¹Kaykuna karqanku Davidta yanapajkuna. Tukuyninku may wapu maqanakojkuna karqanku; soldadosnimpa kamachejkunasninmantaj tukorqanku.

²²Sapa p'unchaytaj Davidta yanapajkuna chayamullarqankupuni may ashkha soldados kanankama, may ashkha soldados Diospa jarampis kanman jina.

²³Kaykuna kanku tukuy soldados maqanakupaj jina wakisqas piskunachus Hebronman Davidpaman jamorqanku Saulpa kamachinan kajta Davidman pasachimunankupaj Dios kamachisqanman jina:

²⁴Judá ayllumanta kajkuna sojta waranqa pusaj pachajniyoj runas escudosnintin, lanzasnintin, maqanakupaj wakichisqas.

²⁵Simeompa ayllunmanta kajkunamantataj qanchis waranqa pachajniyoj, wapu maqanakojkuna, jinataj maqanakupaj sumaj wakisqas.

²⁶Levéj ayllunmanta kajkunataj tawa waranqa sojta pachajniyoj, kinsa waranqa qanchis pachajniyojtaj Aarompa ayllunmanta kajkuna. Joiadataj kamachejninku karqa, Sadocwan ima, payqa wapu maqanakoj wayna runa karqa ayllun ukhumanta iskay chunka iskayniyoj kamachejkunasninwan.

²⁹Benjamimpa ayllunmanta kajkunataj chay Saulpa kikin ayllunmanta, kinsa waranqa runas karqanku. Paykunaqa yaqha tukuyninku Saulman sayasqaslla karqanku.

³⁰Efraimpa ayllunmantataj karqanku, iskay chunka waranqa pusaj pachajniyoj may wapu soldados. Ayllunkupitaj may mentasqas karqanku.

³¹Manasespa khuskan ayllunmantataj chunka pusajniyoj waranqa karqanku. Paykuna mink'asqas karqanku Davidpa kamachejninkupaj jina churamunankupaj.

³²Isacarpa ayllunmanta kajkunataj yachajkuna karqanku Israel ayllu imastachus ruwana kajmanta yachajkuna, paykunaqa karqanku iskay pachaj kamachejkuna, ayllunkumanta kajkunataj chaykunaj nisqankuman jina ruwaj kanku.

³³Zabulompa ayllunmanta kajkunataj phishqa chunka waranqa karqanku. Paykunaqa tukuy laya armaswan wakichisqas soldados karqanku, mana iskayrayaspa Davidta yanaparinankupajtaj may k'uchis karqanku.

³⁴Neftaléj ayllunmantataj karqanku waranqa kamachejkuna, kinsa chunka qanchisniyoj soldadostaj lanzaswan escudoswan maqanakupaj wakisqas.

³⁵Dampa ayllunmanta kajkunataj, iskay chunka pusajniyoj waranqa sojta pachajniyoj soldados karqanku.

³⁶Aserpa ayllunmanta kajkunataj, tawa chunka waranqa maqanakupaj wakisqa soldados karqanku.

³⁷Chay jawaqa Jordán mayu chay chimpamanta, Rubempa ayllunmanta kajkuna, Ajadpa ayllunmanta kajkuna, jinataj Manasespa khuskan ayllunmanta kajkunapiwan pachaj iskay chunkayoj waranqa karqanku, paykunaqa tukuy laya armasniyoj karqanku.

³⁸Kay tukuy maqanakoj soldadosqa Hebronman rerqanku, wakisqas maqanakuman rinankupaj jina allin sonqowan Davidta tukuy Israel ukhupi kamachejkunata jina churanankupaj; ajinallatataj Israel tukuy aylluntin uj yuyaylla karqanku chayta ruwanankupaj.

³⁹Chaypi Davidwan kinsa diasta karqanku mikhuspa, ujyaspataj, llajta masisninku chay tukuyta wakichisqankurayku.

⁴⁰Chay jawaqa qayllasninkupi kajkuna kausaqesninkupis Isacarmanta kajkuna, Zabulonmanta kajkuna, jinataj Neftalejpamantapis burrospi, camellospi, mulaspi, bueyespi ima kay tukuy mikhunasta aparqanku: Jak'uta, higo t'antasta, k'isasta, vinota, aceiteta, wakasta, ovejasta ima, tukuy imasmanta ashkhata aparqanku, Israel ayllu ukhupi sinch'i kusiy kasqayrayku.