Read Quechua Bolivia DC Bible 1 CRÓNICAS 13 Bible Online

1 CRÓNICAS 13 - Quechua Bolivia DC Bible bible

1 CRÓNICAS 13

¹Davidqa tapurerqa chay waranqa soldadosta pusajkunata, pachaj soldadosta pusajkunata, kuraj kamachejkunatawan.

²Chanta tukuynin Israel ayllu tantasqaman nerqa: Qankunaman allin rijch'asunkichejman chayqa, Señor Diosninchejtaj munanman chayqa, willarachinachej tukuy llajta masisninchejman, tukuynin Israel jallp'api qhepakojkuna jamunankupaj, jinataj tukuy sacerdotesman, levitasman llajtasninkupi kashanku, jinataj chay michinanku jallp'aspi kashanku, paykunamampis tantakamunankupaj noqanchejwan.

³Diosninchejpa trato ruwasqa cajonninta apamunanchejpaj, imaraykuchus Saulpa tiemposninmantaña qonqarparinchej chaytaqa.

⁴Tukuy Israelmanta runastaj munarqanku chay jinata ruwakunanta, tukuyninkuman allin rijch'asqanrayku.

⁵Davidqa tantaykorqa tukuy Israel aylluta, Egiptowan tinkuy Sihormantapacha Hamat llajtaman yaykunakama, Queriat-jearim llajtamanta Diospa trato ruwasqa cajonninta apamunankupaj.

⁶Chaymantaqa tukuy israelitaswan khuska Baala nisqa Queriat-jearim llajtaman wicharerqa, chayqa kashan Judá jallp'api. Chaymanta Diospa trato ruwasqa cajonninta apamunankupaj, chaypeqa Señor querubines nisqa patapi tiyakun, chay cajón patapitaj Señormanta mañakuna kaj.

⁷Chay cajontaqa mosoj carreta pataman churaykuspa Abinadabpa wasinmanta apakamporqanku. Uzawan Ahiowantaj chay carretataqa pusasharqanku.

⁸Chaykamataj David tukuy Israel aylluwan, tukuy kallpankuwan takispa, tususpa arpaswan, salterioswan, panderoswan, platilloswan, jinataj trompetaswan risharqanku.

⁹Nacón nisqa ereman chayajtinkutaj, chaypacha Uzaqa makinta aysarerqa cajonta jap'inampaj bueyes misk'aspa thalarparisqankurayku.

¹⁰Señortaj chaymanta sinch'ita Uzapaj phiñarikorqa, chay cajonta makinwan llujchiykusqanrayku, chay kikimpitaj Diosqa Uzata wañurparicherqa.

¹¹Davidtaj sinch'ita phiñakorqa, Señorqa Uzata wañurparichisqanmanta, chayrayku chay cheqata suticharqa Perez-Uzata. Kunan p'unchaykunaskama chay sutiyoj kashan.

¹²Chay diapachataj Davidqa Diospa ñaupaqempi mayta mancharikorqa, qhaparispataj nerqa: Imapajtaj yuyallasajpis Diospa cajonninta apaytaqa!, nispa.

¹³Davidqa Diospa cajonninta llajtanman mana aparqachu, manachayqa Obed-Edompa wasinman apanankuta kamacherqa. Obed-edonqa Gat llajtamanta karqa.

¹⁴Diospa cajonnenqa Obed-edompa wasimpi kinsa killata qhepakorqa. Señortaj bendicerqa Obed-edompa wasi ayllunta, jinataj tukuy imasnintapis.